ଏବେ ବି ତୁମେ ମୋ ମନ ଶ୍ରାବଣୀ
ପ୍ରକାଶ କୁମାର ମିଶ୍ର
ଏବେ ବି ତୁମେ ମୋ ମନ ଶ୍ରାବଣୀ
ଆକାଶରେ ଥାଇ ବରଷ ପାଣି ।
ତୁମେ ମୋ ମନର ବରଷା ରାଣୀ
ଶେଷ ଜୀବନର ଆଶା ଶ୍ରାବଣୀ ।।
ଏବେ ବି ତୁମେ ମୋ ମନ ଶ୍ରାବଣୀ ।।
ଟୁପୁରୁ ଟାପୁରୁ କଥା ହେଲାପରି
ଟିପିରି ଟିପିରି ଟିପିରି ପାଣି ।
ଝୁମୁରୁ ଝୁମୁରୁ ଝୁମୁକା ଶବଦେ
ଝୁପୁରୁ ଝୁପୁରୁ ଝରା ଶ୍ରାବଣୀ ।।
ଏବେ ବି ତୁମେ ମୋ ମନ ଶ୍ରାବଣୀ ।।
ତୁମେ ମୋ ମନର ଭସା ବାଦଲ
ଶୂନ୍ୟ ଆକାଶରେ ଭସାଇ ବୁଲ ।
ଟିକେ ଛାଇ ଟିକେ ଆଲୁଅ ଆଣି
ଦୁଃଖ ସୁଖ ଦେଇ ନେଉଛ ଟାଣି ।।
ଏବେ ବି ତୁମେ ମୋ ମନ ଶ୍ରାବଣୀ ।।
ନିର୍ମଳ ଝର ମୋ ଝରଣା ରାଣୀ
ଉପଳ ଛାତିର ଶୀତଳ ପାଣି ।
ପଥର ହୃଦର ମଧୁ ଯାମିନୀ
ଗରଳ ମନର ପୀୟୂଷ ବାଣୀ ।।
ଏବେ ବି ତୁମେ ମୋ ମନ ଶ୍ରାବଣୀ ।।
ଦୁଃଖ ଜୀବନର ଆଶା ଶ୍ରାବଣୀ
ସୁଖ ଚାରାର ମୋ ଜୀବନ ପାଣି ।
ଅଭାବ ମନର ଭାବ କାମିନୀ
ସ୍ନେହ ସମ୍ପର୍କର ପ୍ରେମ ବନ୍ଧନୀ ।
ଏବେ ବି ତୁମେ ମୋ ମନ ଶ୍ରାବଣୀ ।।
ତୁମେ ମୋ ଜୀବନେ ଶୀତଳ କନ୍ୟା
କ୍ରୋଧରେ ତ ତୁମେ ଶ୍ରାବଣ ବନ୍ୟା ।
ଭାଗ୍ୟ ଡୋରି ତୁମେ ମୋର ଅନନ୍ୟା
ସୁଖେ ହସି ଦୁଃଖେ ଝରାଅ ପାଣି ।
ଏବେ ବି ତୁମେ ମୋ ମନ ଶ୍ରାବଣୀ ।।
ତୁମେ ମୋ ଶ୍ରାବଣୀ ସୁଖର ଚାନ୍ଦ ।
ରିମ୍ ଝିମ୍ କରି ଦିଅ ଶବଦ ।
ସାଇଁ ସାଇଁ ସାଇଁ ପବନ ସାଥିରେ
ନୀଳ ନୟନରୁ ଝରାଅ ବୁନ୍ଦ ।
ଭରିଦିଅ ମୋର ମନ ତଟିନୀ ।
ଏବେ ବି ତୁମେ ମୋ ମନ ଶ୍ରାବଣୀ ।।
ମନ ଶ୍ରାବଣୀ ଗୋ ମୋ ଅଭିମାନୀ
ମନେ ଭରି ଦେଲ ମନେ ବିଷାଦ ।
ଝାଉଁଳି ଯାଉଛି ମନ କୁମୁଦ
କୁମୁଦ କି ବଞ୍ଚେ ନପାଇ ପାଣି ।।
ହସି ହସାଅ ମୋ ମନର ରାଣୀ ।
ଏବେ ବି ତୁମେ ମୋ ମନ ଶ୍ରାବଣୀ ।।
ପ୍ରକାଶ କୁମାର ମିଶ୍ର
