ଛନ୍ଦହୀନ ଶ୍ରାବଣୀ

ଧାରା ଶିରାବଣେ କଜ୍ଵଳ ବରଣା

     ସାଥେ ଚପଳା ଚମକ

ନୁପୁର ନିକ୍ୱଣେ ନବୀନ ଉଲ୍ଲାସେ

     ତୋଳେ ରିମଝିମ ନାଦ l 

ଶେଷ ଶିରାବଣ ଭୋଦୁଅ ଆଗମେ

      ଟାଇଁ ଟାଇଁ ଖରା ତାତି

ଶୁଭେ ମରୁଡିର ମୃଦୁ ପଦଧ୍ଵନି

    ଚାଷୀର ପରାଣେ ଭୀତି l 

ପଥ ଭୁଲି କିବା ନିଦାଘ ଆସିଲା

   ଧରା ବକ୍ଷେ ବାହୁଡ଼ିଣ 

ଅସହ୍ୟ ଉତ୍ତାପେ ଛଟପଟହୋଇ

   ଅତିଷ୍ଠ ଜୀବଜଗତ l 

ଛନ୍ଦହୀନ ସାଜି ରୁଷିଛି ଗୁମାନେ

  ଅଭିମାନିନୀ ଶ୍ରାବଣୀ

କ୍ଷେତେ ଫାଟ ଦେଖି ପଲ୍ଲୀପ୍ରାଣଧନ

     ନୟନେ ଶଙ୍କା ଚାହାଣୀ l 

କରଜରେ ବୁଡି ସାହୁକାର ଜାଲେ

    ମୀନ ସମ ଦଶା ଭୋଗ

ମନେ ଥିଲା ଆଙ୍କି ଆଶା ଇନ୍ଦ୍ରଧନୁ

    ଫସଲେ ଭରିବ ଋଣ l 

ନଦୀପଠାପରେ ଘୁମନ୍ତ ନୟନେ

       ଶୁଷ୍କ ରୂପ କାଶ ତଣ୍ଡୀ

ପୁଷ୍ପ ଆଞ୍ଜୁଳାରେ ଜଗଜ୍ଜନନୀଙ୍କ

ଚରଣ ବନ୍ଦନା ପାଇଁ l 

ଫେରିଆ ଶ୍ରାବଣୀ ଅନୁନୟ କଣ୍ଠେ

  ସକଳ ହୃଦ ପୁକାରେ

ହସିଉଠୁ ଧରା ପରଶ ଲଭିଣ

   ସବୁଜିମା ସୁଷମାରେ l 

ନର୍ମଦା ନାୟକ

ରାଉରକେଲା