ଅଭିମାନ
ରାଗ :-ବଙ୍ଗଳା ଶ୍ରୀ
ମାନବ ଜୀବନ
କେତେହସ କେତେ
ଲୁହ କାନ୍ଦ ସ୍ନେହ ଭରା
ମମତା ସାଗର
ମଧୁର ନିର୍ଝର
ଅମୃତର ପୂର୍ଣ୍ଣଝରା |1|
ଜୀବନେ ଯୌବନ
ହୁଏ ଉବୁଟୁବୁ
ବହେସଦା ଫଲ୍ଗୁ ଧାରା
ମଳୟ ପବନ
ସୁବାସ ଚନ୍ଦନ
ଛୁଇଁଯାଏ ଦେହ ସାରା |2|
ଯୁବକ ଯୁବତୀ
ସୁନ୍ଦର ଉଦ୍ୟାନେ
ମଗ୍ନ ସଦା ମଧୁବନେ
ଅଧାଛାଇ ଅଧା
ତନ୍ଦ୍ରା ଭରା ନିଦ
ରମଣୀୟ ଉପବନେ |3|
ବେସୁରା ରାଗିଣୀ
ବିପଞ୍ଚିର ସ୍ୱର
ଇଥରେକମ୍ପନ ଜାତ
ସଦ୍ୟ ସ୍ନାତାମଧୁ
ପାନେ ରତ ଜନ
ମାରିଥାନ୍ତି ବାଜିମାତ |4|
ମାନ ଅଭିମାନ
ଟିକେରୁଷା ଟିକେ
ଲୁହେ ହୁଏ ସମାଧାନ
ଟିକିଏ ସ୍ନେହରେ
ଅକୁହା କାହାଣୀ
ସ୍ନେହ ଭରା ଅଭିମାନ |5|
ଯେଉଁ ଦମ୍ପତିରେ
ନାହିଁ ରାଗ ରୁଷା
ନାହିଁ କିଛି ଗଣ୍ଡଗୋଳ
ସେପରି ସୁନ୍ଦର
ଘର କାହିଁ ଅଛି
ପ୍ରେମେହେବା ପାଇଁଭୋଳ |6|
ସ୍ୱର୍ଗ ପାରିଜାତ
ତୋଳି ଥାନ୍ତି ପ୍ରେମୀ
ପାଇଥାନ୍ତି ସ୍ୱର୍ଗ ସୁଖ
ମାନ ଅଭିମାନ
ଟିକେ ଖଟା ମିଠା
ନଥାଏ ଟିକିଏ ଦୁଃଖ |7|
ସରଗୁ ସୁନ୍ଦର
ସ୍ୱାମୀ ସ୍ତ୍ରୀର ନିତି
ପ୍ରେମ ପୂର୍ଣ୍ଣ ଖେଳଘର
ଜଗତ ଯାକର
ସୁଧା ପୂରି ଥାଏ
ଶାନ୍ତି ଝରେ ଝର ଝର |8|
ବୈକୁଣ୍ଠ ସମାନ
ଅଟେ ସେହିଘର
ରହିଥିଲେ ଅଭିମାନ
ସଂସାର ସାଗରେ
ସଦା ଝରିଥାଏ
ଆନନ୍ଦର ସ୍ୱାଭିମାନ |9|
ପ୍ରକୃତି ପୁରୁଷ
କ୍ରୀଡ଼ାସ୍ଥଳୀ ବିଶ୍ୱ
ରମଣୀୟ ବାସସ୍ଥାନ
ପ୍ରଜାପତି ମହା
ମିଳନ ନିକୁଞ୍ଜ
ବଞ୍ଚିଥିଲେ ଅଭିମାନ |10|
ଶ୍ରୀ ବିଦ୍ୟାଧର ମହାନ୍ତ,
ତମ୍ବାହରା , ହରିଚନ୍ଦନପୁର, କେନ୍ଦୁଝର
