ନାରୀ ତୁହି ବନ୍ଦନୀୟା
ସୁତାରୂପେ ତୁହି ମାତାରୂପେ ତୁହି
ଭଗିନୀ-ଭାମିନୀ-ଜାୟା
ତ୍ଯାଗରେ ପାଞ୍ଚାଳି କ୍ରୋଧରେ ମା’କାଳୀ
ନାରୀ ତୁହି ବନ୍ଦନୀୟା |(୧)
ସହିଷ୍ଣୁତା ପଣେ ମାତା ସୀତା ନାମେ
ଅଦିତି ପୁଣି ଅହଲ୍ୟା
ଧୀରତା ତ୍ୟାଗରେ କର୍ତ୍ତବ୍ୟ ପଥରେ
ସର୍ବଦା ସିଏ ଅତୁଲ୍ୟା |(୨)
ଦ୍ଵାପର ଯୁଗର ଶାଶ୍ଵତ ପ୍ରେମର
ପ୍ରେମୀକା ଭାବେ ରାଧିକା
ଭାବ-ଭକତିର ପରାକାଷ୍ଠା ଯା’ର
ମୀରା ମୁରାରୀ ସାଧିକା |(୩)
କଥିତ ପୁରାଣେ ପଞ୍ଚସତୀ ନାମେ
ଯୁଗେ ଯୁଗେ ଯେ ପୂଜିତା
ଜ୍ଞାତି-କୁଟୁମ୍ବର ସାଜଇ ଆଧାର
ସାଜି ନିପୁଣା ଦୁହିତା |(୪)
ନାରୀ ଯଶସ୍ଵିନୀ ବିଦୁଷୀ-ସୁଗୁଣୀ
ବିଶ୍ଵବାରା -ଲୋପାମୁଦ୍ରା
ଜୈମିନିକା ପରି ଗାର୍ଗୀ ଯେ’ ମଇତ୍ରୀ
ଶିକ୍ଷା-ଶିରୀ ଯିଏ ସଦା |(୫)
ଶକ୍ତି-ଭକ୍ତି-ମୁକ୍ତି ଦୟା-କ୍ଷମାମୂର୍ତ୍ତି
ଅଭିଜିତା ଯେ’ ବନ୍ଦିତା
ଆଦିଶକ୍ତି-ମହାଶକ୍ତି ସେ ମୃଣ୍ମୟୀ
ଦେବୀ ସେ ଜଗତଜିତା |(୬)
ଅଦ୍ୟତନ କାଳେ ନଭେ-ଜଳେ-ସ୍ଥଳେ
ଉଡା଼ଏ ଦେଶର ନେତ
ବିଶ୍ଵ ବିଜୟିନୀ ଶକ୍ତି ସ୍ଵରୂପିଣୀ
ସୁରକ୍ଷାଦାୟିନୀ ସେତ |(୭)
ସୃଷ୍ଟିରେ ସଂସ୍କାରେ ଅବା ସମାଜରେ
ଯା’ ଗୁଣ ଅବର୍ଣ୍ଣନୀୟା
ସାହା-ଭରସାର ସର୍ବ ଗୁଣେ ସାର
ନାରୀ ତୁହି ବନ୍ଦନୀୟା
ନାରୀ ତୁହି ବନ୍ଦନୀୟା |(୮)
ଶ୍ରୀମତୀ ପ୍ରିୟଦର୍ଶିନୀ ମିଶ୍ର
ଜୁନାଗଡ଼ (କଳାହାଣ୍ଡି)
ଜନ୍ମଭୂମି :- ମଣ୍ଡଳ ( ବଲାଙ୍ଗୀର)