ତ୍ରିଭୁଜ 

ଆଶା ନିଶା ସହ ଭରସା ମିଶ୍ରଣେ 

          ଗଢ଼ା ଜୀବନ ତ୍ରିଭୁଜ

ଏକଇ ଭୂଜର ଅଭାବବୋଧରେ

       ପ୍ରତିକ୍ଷଣ ଶୂନ୍ୟ ଶୁନ୍ୟ l 

ଆଶା ପାରିଜାତ ମାନସ କାନନେ

        ହୋଇଗଲେ ବିକଶିତ 

ଜ୍ଞାନ ଭକ୍ତି କର୍ମ ସୁବାସ ବିତରେ

       ପରାଣଟା ବାସ୍ନାୟିତ l 

ଦେଖି ତ ହୁଏନି ଦେଖାଇ ହୁଏନି 

       ମରମରେ ଅନୁଭୂତ

ସୁନା ସୂତ୍ର ଡୋରେ ତନ୍ମୟତା ଭାବେ 

        ହୃଦୟେ ଅନୁବନ୍ଧିତ l 

ଆଶା ସହ ନିଶା ସଂଯୋଗ କରଣେ

        ଜାଗେ କର୍ମ ପ୍ରବଣତା

କୃଷି ଵା ବାଣିଜ୍ୟେ ସାହିତ୍ୟ ସଙ୍ଗୀତେ

        ପ୍ରତି ସ୍ତରେ ସଫଳତା l 

ନିଶା ବିନା ଆଶା ରହଇ ଅପୂର୍ଣ୍ଣ

        ଲଭେନି ପରିପୂର୍ଣ୍ଣତା

ବୈଜ୍ଞାନିକ ଶିଳ୍ପୀ ସାହିତ୍ୟିକଗଣ

        ନିଶା ରେ ସଫଳକାମା l 

ସୁଖ ବାଣ୍ଟୁଥିଲେ ବଢ଼ି ଚାଲୁଥାଏ

         ଦୁଃଖ ବଣ୍ଟନେ ଲାଘବ

ବିପଦ କାଳରେ ଭରସା ଟିକିଏ

       ଅନ୍ତରେ ଜାଗେ ପୁଲକ l 

ଭରସାର ମୂଲ ଅମୂଲ ଜୀବନେ

      ତାର ପଟାନ୍ତର କାହିଁ?

ବିଶ୍ୱାସ ତାହାର ଜନ୍ମଦାତା ସାଜେ 

        ଧୋକା କେବେ ଦିଏ ନାହିଁ l 

ଅଭାବରେ ମାତା ବିପଦରେ ସଖା

           ପରଂବ୍ରହ୍ମ ଦୟାମୟ

ତ୍ରିଭୁଜ ଧାରଣେ ଜୀବନ ସଂଗ୍ରାମେ

      ଲଭଇ ଦିଗ ବିଜୟ l 

ନର୍ମଦା ନାୟକ

ରାଉରକେଲା