ପ୍ରଭାତୀ ଅନୁଚିନ୍ତା

ବିଶାଳ ସଂସାରେ କ୍ଷୁଦ୍ରମୋର ସତ୍ତା

ହେପ୍ରିୟ ପରମ ପିତା,

ତୁମରି ଭିତରେ ଲୀନହେବା ଇଛା

ହେଉମୋର ଅନୁଚିନ୍ତା l

ତୁମେ ସାତସିନ୍ଧୁ ମୁଁ ଯେ ଜଳବିନ୍ଦୁ

ସମ୍ପର୍କ ରହିଛି ଯେଣୁ,

ଅଭିନୟ ଶେଷେ ତୁମ ସହିତରେ

ମିଶିଯିବି ପ୍ରଭୁତେଣୁ l

ତୁମଇଛା ପୂର୍ଣ୍ଣ କରିବା ପାଇଁକି

ପଠେଇ ଥିଲହେ ପିତା,

ଚେତାନରେ ଥାଇ କର୍ମଯଦି କରେ

ହୋଇବି ଜଗତ ଜିତା l

ମିଛହସ,କାନ୍ଦ ଅବା ଭଲ,ମନ୍ଦ

ତୁମେଏକା ସତ୍ୟପରା ,

ମାୟା,ମୋହପୂର୍ଣ୍ଣ ଘେରା କୁହୁଡିରେ

ତୁମେସିନା ଧ୍ରୁବତାରା l

ତୁମକୁ ନଚିନ୍ତି ବଡ଼ିମା ଦେଖାଏ

କେତେ ଆତ୍ମ ଅଭିମାନେ

ପାଣିର ଗାର ଏ ମିଥ୍ୟା ଅହମିକା

ନାହିଁଯା’ର କିଛିମାନେ l

କେତେ ମୁଁ ଜିତିଲି କେତେ ମୁଁ ହାରିଲି

ହିସାବମୋ ଲୋଡ଼ା ନାହିଁ,

ପ୍ରାଣମୋ ଅଧୀର ପ୍ରତି ମୁହୂର୍ତ୍ତରେ

କେବଳ ତୁମରି ପାଇଁ l

ସକାଳରୁ ସନ୍ଧ୍ୟା ମଝିରେ ଜୀବନ

ଏ ଦୁନିଆ ରଙ୍ଗମଞ୍ଚ,

କିଏନୁହଁ ବଡ଼ କିଏନୁହଁ ସାନ

କିଏନୁହଁ ନୀଚ୍ଚ,ଉଚ୍ଚ l

ତୁମେପିତା,ମାତା ତୁମେହିଁ ବାନ୍ଧବ 

ତୁମେ ସଖା ସହୋଦର,

ତୁମେ ପ୍ରିୟତମ ପ୍ରାଣର ସ୍ପନ୍ଦନ

ତୁମବିନା ସବୁପର l

ତୁମରି ପରଶ ପାଇବା ପାଇଁକି

ଜୀବନ ଉନ୍ମୁକ୍ତ ଦ୍ୱାରେ

କେତେ ରୁଷି ମୁନି ସାଧିଛନ୍ତି ତପ

ତୁମପାଇଁ ଜୀବନରେ l

ଶେଷ ଉପଲବ୍ଧି ତୁମେ ହିଁ କେବଳ

ତୁମେସତ୍ୟ ଅନୁଭବ,

ହୃଦୟ ତନ୍ତ୍ରୀରେ ସୁରକାର ତୁମେ

ତୁମପରି କିଏ ହେବ ?

ପ୍ରତିଟି ସକାଳ ତୁମରି ଚିନ୍ତନେ

ବିତିଯାଉ ଜୀବନରେ,

ତୁମଠାରେ ଧ୍ୟାନ ରଖି କର୍ମକରେ

ଏତିକି କାମନା କରେ l

ଅନୁତାପ ଅବା ଅବଶୋଷ ନାହିଁ

ଅଧୀର ପ୍ରାଣରେ ଆଜି,

ତୁମରି ଭାବନା କରେ ଆନମନା

ତୁମଧ୍ୟାନେ ଯାଏମଜ୍ଜି l

ସୁଜାତା ରାଉତ

ଓରାସାହି , ଚାନ୍ଦବାଲି , ଭଦ୍ରକ