ରାଉରକେଲା/ ରାଉରକେଲା କଞ୍ଜୁମର ଫ୍ରଣ୍ଟ ତରଫରୁ କୋଏଲନଗର ଖାଉଟି ସୁରକ୍ଷା ଭବନ ଠାରେ ବିଶ୍ବ ଉପଭୋକ୍ତା ଅଧିକାର ଦିବସ ପାଳନ କରାଯାଇଛି । ଫ୍ରଣ୍ଟ ର ସଭାପତି ସୁଧୀର ସୁନ୍ଦରରାୟ ଙ୍କ ସଭାପତିତ୍ବ ଓ ସାଧାରଣ ସଂପାଦକ ମିହିର ରାୟ ଙ୍କ ଆବାହକତ୍ବ ତଥା ସଂଯୋଜନାରେ ଜିଲ୍ଲା ଉପଭୋକ୍ତା ଫୋରମ ର ସଭାପତି ରାଜେନ୍ଦ୍ର ପ୍ରସାଦ ମୁଖ୍ୟଅତିଥି ଓ ସମ୍ମାନିତ ଅତିଥି 
ଭାବେ ସମାଜସେବୀ ବ୍ରିଜମୋହନ ଅଗ୍ରୱାଲ, ଅର୍ବାନ କୋ ଅପରେଟିଭ ବ୍ୟାଙ୍କର ସଭାପତି ଦିଲ୍ଲୀପ ମହାପାତ୍ର ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ଆଲୋଚ୍ୟ ବିଷୟ ‘ ସ୍ବଚ୍ଛ ଶକ୍ତି ସ୍ଥାନାନ୍ତର ମାଧ୍ୟମରେ ଉପଭୋକ୍ତାଙ୍କୁ ସଶକ୍ତିକରଣ କରିବା ‘ ଓ ଉପଭୋକ୍ତା ସୁରକ୍ଷା ଆଇନ ଅନ୍ତର୍ଗତ ଉପଭୋକ୍ତା ମାନଙ୍କର 
ଅଧିକାର ସଂପର୍କରେ ସଚେତନ କରାଇଥିଲେ । ମୁଖ୍ୟଅତିଥି ଶ୍ରୀ ପ୍ରସାଦ ଉପଭୋକ୍ତାଙ୍କ ସଚେତନତା କୁ ଗୁରୁତ୍ବାରୋପ କରିଥିବା ବେଳେ ଅର୍ଥ ବଦଳରେ ଉପଯୁକ୍ତ ସେବା ଓ ବସ୍ତୁ ନପାଇବା, ସେବା ପାଇବାରେ ବିଳମ୍ବ, ଶିକ୍ଷା କ୍ଷେତ୍ରରେ ଠକାମି,କ୍ୟାରୀ ବ୍ୟାଗ୍ ପାଇଁ ଅର୍ଥ ଆଦି ଦାବିକରିବା ଭଳି ଉପଭୋକ୍ତା ଙ୍କ ସହ ଠକାମି ଅନୁଭବ 
ହେଲେ ଆଇନ ର ଆଶ୍ରୟ ନେବାପାଇଁ ମତରଖିଥିଲେ। ସମ୍ମାନିତ ଅତିଥି ଶ୍ରୀ ଅଗ୍ରୱାଲ ସଂପ୍ରତି ବଜାରରେ ସଂପର୍କର ମୂଲ୍ୟ, ସାମାଜିକ ସୁରକ୍ଷା ଓ ଖାଉଟିମାନେ ଜାଣିବାର ଅଧିକାର ଉପରେ ଗୁରୁତ୍ବାରୋପ କରିଥିବାବେଳେ ଅନ୍ୟତମ ଅତିଥି ଶ୍ରୀ ମହାପାତ୍ର ଉପଭୋକ୍ତାଙ୍କ ମାନସିକ ଦୁର୍ବଳତା ଠକାମୀର ଅନ୍ୟ ଏକ କାରଣ 
ବୋଲି ମତ ରଖିଥିଲେ । ଏହି ଅବସରରେ ଟାଟା ପାୱାର ସୋଲାର ତରଫରୁ ରୁପକ ପଟ୍ଟନାୟକ ବକ୍ତବ୍ଯ ରଖିଥିଲେ । ସଭାପତି ଶ୍ରୀ ସୁନ୍ଦରରାୟ ସଭାପତିତ୍ବ ଅଭିଭାଷଣ ସହ ଅତିଥିଙ୍କ ପରିଚୟ ପ୍ରଦାନ କରି ଆଲୋଚ୍ୟ ବିଷୟର ଆବଶ୍ୟକତା ଉପରେ ମତ ରଖିଥିଲେ । 
ସଂପାଦକ ଶ୍ରୀ ରାୟ ସାଂପ୍ରତିକ ସ୍ଥିତିରେ ଉପଭୋକ୍ତା ନିଜର ଅଧିକାର ଓ ସୁରକ୍ଷା ସଂପର୍କରେ ଅଧିକ ସଚେତନ ହେବା ଉପରେ ଗୁରୁତ୍ବାରୋପ ସହ କାର୍ଯ୍ୟକ୍ରମ ପରିଚାଳନା କରିଥିଲେ । ଶେଷରେ ଉପସଭାପତି ସୁରେନ୍ଦ୍ର ରାଉତ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ସହରର ବହୁ ଜଣାଶୁଣା ବ୍ୟକ୍ତିତ୍ବ ସର୍ବଶ୍ରୀ ନାରାୟଣ ପତି, ଶଶଧର ପାତ୍ର, ଶୈଳେନ୍ଦ୍ର ମହାନ୍ତି,ଜଗନ୍ନାଥ ରାଉତ, ପ୍ରଶାନ୍ତ ଦାସ, ମିଟୁ ବେଉରିଆ, ନିରଞ୍ଜନ ଦାସ ଙ୍କ ସମେତ ଫ୍ରଣ୍ଟ ର କର୍ମକର୍ତ୍ତା, ସଚେତନ ନାଗରିକ ପ୍ରମୁଖ ଉପସ୍ଥିତ ଥିଲେ ।
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ
