ବଦଳିଲା ନବମ ଓ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ସ୍କୁଲ୍ ୟୁନିଫର୍ମ । ଏଣିକି ଆଉ ଧଳା-ନୀଳ ନୁହଁ ବରଂ ଚେକ୍ ସାର୍ଟ ଓ ଫୁଲ୍ ପ୍ୟାଣ୍ଟରେ ସ୍କୁଲ୍ ଆସିବେ । ସପ୍ତାହକୁ ଦିନେ ପିନ୍ଧିବେ ଟି ସାର୍ଟ ଓ ଟ୍ରାକ୍ ପ୍ୟାଣ୍ଟ । ଜୋତା ଓ ମୋଜା ପିନ୍ଧି ଆସିବେ ସ୍କୁଲ୍ । ଏଥିସହ ‘ଆମେ ଗଢ଼ିବୁ ନୂଆ ଓଡ଼ିଶା’ ଲୋଗୋ ଥିବା ଟୋପି ମଧ୍ୟ ଦିଆଯିବ ।
ପୂରା ଘରୋଇ ସ୍କୁଲ ପିଲାଙ୍କ ପରି ୟୁନିଫର୍ମ ପ୍ରସ୍ତୁତ କରାଯାଉଛି । ଏସବୁ ପରିଧାନ ସାମଗ୍ରୀକୁ ‘ମୁଖ୍ୟମନ୍ତ୍ରୀ ଛାତ୍ରଛାତ୍ରୀ ପରିଧାନ ଯୋଜନା’ରେ ବଣ୍ଟନ କରାଯିବ । ପ୍ରତି ପିଲା ପିଛା ୧ହଜାର ଟଙ୍କା ବହନ କରିବେ ରାଜ୍ୟ ସରକାର । ଆସନ୍ତା ଅଗଷ୍ଟ ୧୫ରେ ସ୍କୁଲ୍ରେ ନୂଆ ୟୁନିଫର୍ମ ବଣ୍ଟନ ହେବ । ମହିଳା ସ୍ୱୟଂ ସହାୟକ ଗୋଷ୍ଠୀ ଓ ମଧ୍ୟମ କ୍ଷୁଦ୍ର ଶିଳ୍ପ ଉଦ୍ୟୋଗୀ ଏହି ୟୁନିଫର୍ମ ତିଆରି କରିବେ । ଆସନ୍ତା ଅଗଷ୍ଟ ୧୫ ଠାରୁ ନୂଆ ୟୁନିଫର୍ମ ପିନ୍ଧିବେ ହାଇସ୍କୁଲ୍ ଛାତ୍ରଛାତ୍ରୀ । ନୂଆ ଲୁକ୍ ଓ ନୂଆ ରଙ୍ଗର ପୋଷାକରେ ଆସିବେ ସ୍କୁଲ୍ ।
ଏବେ ଛାତ୍ରଛାତ୍ରୀମାନେ ଧଳା ରଙ୍ଗର ସାର୍ଟ ଓ ନୀଳ ରଙ୍ଗର ପ୍ୟାଣ୍ଟ ପିନ୍ଧି ସ୍କୁଲ୍ ଆସୁଛନ୍ତି । ୟୁନିଫର୍ମ ବଦଳିବା ପରେ ଏହାର ରଙ୍ଗ ମଧ୍ୟ ବଦଳାଯାଇଛି । ଏଥର ଛାତ୍ରମାନେ ହୋଲି ଗ୍ରୀନ୍ ଓ ଧଳା ରଙ୍ଗର ଚେକ୍ ସାର୍ଟ ଓ ହୋଲି ଗ୍ରୀନ୍ ରଙ୍ଗର ଫୁଲ୍ ପ୍ୟାଣ୍ଟ ପିନ୍ଧିବେ । ଛାତ୍ରୀମାନେ ହୋଲି ଗ୍ରୀନ୍ ଓ ଧଳା ରଙ୍ଗର ଚେକ୍ ସାଲ୍ୱାର୍ ସାଙ୍ଗକୁ ହୋଲି ଗ୍ରୀନ୍ ରଙ୍ଗର ଜ୍ୟାକେଟ୍ ଓ କାମିଜ୍ ପିନ୍ଧିବେ । ଏଥିସହ ସପ୍ତାହକୁ ଗୋଟିଏ ଦିନ ଉଭୟ ଛାତ୍ରଛାତ୍ରୀ ଟି ସାର୍ଟ ଓ ଟ୍ରାକ୍ ପ୍ୟାଣ୍ଟ ପିନ୍ଧି ସ୍କୁଲ୍ ଆସିବେ । ଏଥିପାଇଁ ୪ଟି ରଙ୍ଗ ରଖାଯାଇଛି । ନୀଳ, ନାଲି, ହଳଦିଆ, ସବୁଜ ରଙ୍ଗର ଟି ସାର୍ଟ ପ୍ରସ୍ତୁତ କରାଯିବ ।
ପ୍ରତ୍ୟେକ ଛାତ୍ରଛାତ୍ରୀଙ୍କୁ ମାଗଣାରେ ଏହି ସମସ୍ତ ପୋଷାକ ବଣ୍ଟନ କରାଯିବ । ମୁଖ୍ୟମନ୍ତ୍ରୀ ଛାତ୍ରଛାତ୍ରୀ ପରିଧାନ ଯୋଜନାରେ ପିଲାଙ୍କୁ ପୋଷାକ ଦିଆଯିବ । ଏଥିପାଇଁ ସରକାର ଜଣେ ପିଲା ପିଛା ୧ ହଜାର ଟଙ୍କା ବହନ କରିବେ । ଏଥିରେ ଛାତ୍ରଛାତ୍ରୀଙ୍କୁ ୨ ହଳ ୟୁନିଫର୍ମ, ହଳେ ଟି ସାର୍ଟ ଓ ଟ୍ରାକ୍ ପ୍ୟାଣ୍ଟ, ହଳେ ଜୋତା, ୨ ହଳ ମୋଜା ସହ ଟୋପି ଦିଆଯିବ। ଦୁଇ ହଳ ୟୁନିଫର୍ମ ପାଇଁ ୫୫୦ଟଙ୍କା, ଗୋଟିଏ ହଳ ଜୋତା ଓ ୨ହଳ ମୋଜା ପାଇଁ ୨୦୦ଟଙ୍କା, ଟି ସାର୍ଟ ପାଇଁ ୧୨୫ ଟଙ୍କା, ଟ୍ରାକ୍ ପ୍ୟାଣ୍ଟ ପାଇଁ ୧୨୫ଟଙ୍କା ଖର୍ଚ୍ଚ କରିବାକୁ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଓସେପା ଓ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ କୁହାଯାଇଛି । ଅଗଷ୍ଟ ୧୫ ସୁଦ୍ଧା ପୋଷାକ ତିଆରି ହୋଇ ବଣ୍ଟନ କରାଯିବ । ଏନେଇ ଗତ ୪ ତାରିଖରୁ ପ୍ରକ୍ରିୟା ଆରମ୍ଭ ହୋଇଛି। ଏସ୍ଏଚ୍ଜି ମହିଳା ମାନେ ୟୁନିଫର୍ମ ତିଆରି କରିବେ । ସ୍କୁଲ୍ କର୍ତ୍ତୁପକ୍ଷ ବିଭାଗରୁ ଟଙ୍କା ଆସିବା ପାଇଁ ଏକ ଜିରୋ ଆକାଉଣ୍ଟ ଖୋଲିବେ । ସ୍କୁଲ୍ ପ୍ରଧାନଶିକ୍ଷକ ବିଲ୍ ଦେଲେ ଟଙ୍କା ଆସିବ । ଏହାକୁ ପୋଷାକ ଯୋଗାଇଥିବା ଏସ୍ଏଚ୍ଜି ମହିଳା ଗୋଷ୍ଠୀ ତଥା ଏମ୍ଏସ୍ଇକୁ ଦିଆଯିବ । ସ୍କୁଲ୍ ୟୁନିଫର୍ମ ତିଆରି କରିବାକୁ ଇଚ୍ଛୁକ ଥିବା ଏସ୍ଏଚ୍ଜି ମହିଳା ଗୋଷ୍ଠୀ କିମ୍ବା ଏମ୍ଏସ୍ଇ ୟୁନିଟ୍ ମାନେ ଚଳିତମାସ ୨୦ ତାରିଖ ସୁଦ୍ଧା ଆବେଦନ ଦାଖଲ କରିବେ ।ସ୍କୁଲ୍ରେ ପିଲାଙ୍କ ବିଭିନ୍ନ ଆକ୍ଟିଭିଟି ପାଇଁ ହାଉସ କ୍ଲବ୍ କରାଯାଇଛି । ସପ୍ତାହର ଗୋଟିଏ ଦିନ ବିଭିନ୍ନ ଆକ୍ଟିଭିଟି କରାଯିବ । ଯେଉଁ ସ୍କୁଲ୍ରେ ନବମ ଓ ଦଶମ ଶ୍ରେଣୀରେ ୧୦୦ ତଳକୁ ଛାତ୍ରଛାତ୍ରୀ ରହିଛନ୍ତି ସେଠି ୨ଟି କ୍ଲବ୍ କରାଯିବ । ଯେଉଁଠି ୧୦୦ ଉପରକୁ ରହିଛନ୍ତି ସେଠି ୪ଟି କ୍ଲବ୍ କରାଯିବ । ତେବେ ରାଜ୍ୟର ଆଦର୍ଶ ବିଦ୍ୟାଳୟ ଗୁଡିକରେ ଆଗରୁ ଏହାକୁ ସରକାର ଲାଗୁ କରିଛନ୍ତି।