ଅଜଣା ବାଇକ ଧକ୍କାରେ ସାଇକେଲ ଆରୋହୀଙ୍କ ମୃତ୍ୟୁ, କ୍ଷତି ପୂରଣ ଦାବୀରେ ଜାତୀୟ ରାଜପଥ ଅବରୋଧ
ନବରଙ୍ଗପୁର(ମ ନି ସ)-ନବରଙ୍ଗପୁର ଜିଲ୍ଲା ପାପଡାହାଣ୍ଡି ଥାନା ଚିକିଲି ଛକରେ ଆଜି ସନ୍ଧ୍ୟା ୭ଟା ସମୟରେ ଏକ ଅଜଣା ବାଇକ ଧକ୍କାରେ ଜଣେ ସାଇକେଲ ଆରୋହୀଙ୍କ ମୃତ୍ୟୁ ହୋଇଛି | ମୃତକ ଚିକିଲି ଗ୍ରାମର କମଳ ଲୋଚନ ନାୟକ ବୋଲି ଜଣାପଡିଛି | କ୍ଷତି ପୂରଣ ଦାବିରେ ଗ୍ରାମବାସୀ ଜାତୀୟ ରାଜପଥ ୨୬କୁ ଅବରୋଧ କରିଛନ୍ତି | ଯଦ୍ୱାରା ନବରଙ୍ଗପୁର ରୁ କଳାହାଣ୍ଡି, ଉମରକୋଟ, ବିଶାଖାପାଟଣା, ରାୟପୁର ଆଦି ଅଞ୍ଚଳକୁ ଯାନ ବାହାନ ଚଳା ଚଳ ବନ୍ଦ ରହିଥିଲା | ଖବର ପାଇ ପାପଡାହାଣ୍ଡି ପୋଲିସ ଘଟଣାସ୍ଥଳରେ ପହଂଚିଛି | ସୂଚନା ମୁତାବକ କମଳଲୋଚନ ଏକ ସାଇକେଲରେ ଧାରଣାବେଢା କୁକୁଡ଼ା ଆଣିବା ପାଇଁ ଯାଇଥିଲେ, ଫେରିବା ସମୟରେ ଚିକିଲି ଛକରେ ତାଙ୍କୁ ଏକ ଅଜଣା ବାଇକ ଧକ୍କା ଦେବାରୁ ତାଙ୍କର ମୃତ୍ୟୁ ହୋଇଥିଲା | ଖବର ପାଇ ଗ୍ରାମବାସୀ କ୍ଷତି ପୂରଣ ଦାବିରେ ରାସ୍ତା ଅବରୋଧ କରିଛନ୍ତି | ପାପଡାହାଣ୍ଡି ଏସଆଇ ଶିବାଜୀ ପଣ୍ଡା ସହ ଥାନା ଅଧିକାରୀ ଘଟଣାସ୍ଥଳରେ ପହଁଚି ଉତ୍ୟକ୍ତ ଲୋକଙ୍କୁ ବୁଝା ସୁଝା କରୁଥିବା ବେଳେ ଲୋକେ ଜିଦରେ ଅଟଳ ହୋଇ ରାସ୍ତା ରୋକ ଚଳାଇଛନ୍ତି | ସେପଟେ ବାଇକର ପଛ ପଟେ ବସିଥିବା ଲୋକଙ୍କୁ ମଧ୍ୟ ଉଦ୍ଧାର କରାଯାଇ ତଦନ୍ତ ଜାରୀ ରହିଛି ଏହି ସମୟ ଯାତ୍ରୀ ଯାତାୟତ ସମୟ ରେ ବହୁ ଅସୁବିଧାର ସମ୍ମୁଖିନ କରିବାକୁ ପଡ଼ିଥିଲା ! ୪ ଘଣ୍ଟା ସମୟ ପର୍ଯନ୍ତ ଦୁଇ ପାର୍ଶ ରେ ଯାନ ବାହନ ଅଟକ ରହିଥିଲା । ଘଟଣା ସ୍ଥାନ ରେ ଏଡିଏମ ମହେଶ୍ୱର ଚନ୍ଦ୍ର ନାୟକ ପହଞ୍ଚି ପୀଡ଼ିତା ପରିବାର ଙ୍କୁ ରେଡ୍ କ୍ରସ ତରଫ ରୁ ୧୦ ହଜାର ଟଙ୍କା ,ସମସ୍ତଙ୍କ ସୁବିଧା ନିମନ୍ତେ ସେହି ସ୍ଥାନ ରେ ବାରମ୍ବାର ଦୁର୍ଘଟଣା ହେଉ ଥିବାରୁ ହମ୍ପସ୍ ଓ ଲାଇଟ୍ ବ୍ୟବସ୍ଥା କରିବା ପାଇଁ ସ୍ଥାନୀୟ ଲୋକଙ୍କୁ ପରାମର୍ଶ ଦେଇଛନ୍ତି। ତାପରେ ରାସ୍ତା ଅବରୋଧ ହଟି ଥିଲା l