କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ରାଉରକେଲା ବିକାଶ ମଞ୍ଚର ଆଲୋଚନା
କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ରାଉରକେଲା ଗସ୍ତ ଅବସରରେ ରାଉରକେଲା ହାଉସଠାରେ ରାଉରକେଲା ବିକାଶ ମଞ୍ଚର ଆବାହକ ଡ଼କ୍ଟର ସୁମନ ଦତ୍ତଙ୍କ ନେତୃତ୍ୱରେ ବରିଷ୍ଠ ସଦସ୍ୟମାନେ ମାନେ ସାକ୍ଷାତ କରିଥିଲେ l ଆଲୋଚନା କାଳରେ ରାଉରକେଲା ବିମାନର ଉନ୍ନତିକରଣ , ନୂତନ ରେଳବାଇ ଡିଭିଜନ ପ୍ରତିଷ୍ଠା,ସରକାରୀ କଲେଜ ଠାରେ ଏକକ ବିଶ୍ୱବିଦ୍ୟାଳୟ ସ୍ଥାପନ ବିଷୟରେ ଆଲୋଚନା ହୋଇଥିଲା l ଏଇବର୍ଷ ହକି ବିଶ୍ବକପ ପରଠାରୁ ଆରମ୍ଭ ହୋଇଥିବା ରାଉରକେଲା ବିମାନ ସେବା ବିଭିନ୍ନ ଆଳରେ ବାଧାପ୍ରାପ୍ତ ହୋଇ ଆସୁଥିବାରୁ ବିମାନ ଯାତ୍ରା କରୁଥିବା ସମସ୍ତ ଯାତ୍ରୀଙ୍କ ସହ ବିକାଶ ମଞ୍ଚର କର୍ମକର୍ତ୍ତାମାନେ ଉଦବେଗ ପ୍ରକାଶ କରିଥିଲେ l ସେଇଭଳି ବିସ୍ତୃତ ଭିତ୍ତିଭୂମି ଥାଇ ସୁନ୍ଦରଗଡ଼ ଓ କେନ୍ଦୁଝର ଜିଲ୍ଲାରୁ ସିଂହଭାଗ ରାଜସ୍ବ ଦେବା ସହ ରାଉରକେଲା ଠାରେ ଇଷ୍ଟକୋଷ୍ଟ ରେଳବାଇ ଅଧୀନରେ ଏକ ନୂତନ ରେଳବାଇ ଡିଭିଜନ ଗଠନ ପାଇଁ ରେଳବାଇ କିମ୍ବା ସରକାରଙ୍କ ତରଫରୁ କୌଣସି ଉତ୍ସାହ ପରିଲକ୍ଷିତ ହେଉନଥିବାରୁ କ୍ଷୋଭ ପ୍ରକାଶ କରାଯାଇଥିଲା l ରାଉରକେଲା ସରକାରୀ ମହାବିଦ୍ୟାଳୟ ଠାରେ ଏକଶହ ତେୟାଳିଶ କଲେଜକୁ ନେଇ ଏକକ ବିଶ୍ୱବିଦ୍ୟାଳୟ ସ୍ଥାପନ ପାଇଁ ଦାବି ହେଉଥିଲେ ମଧ୍ୟ କୌଣସି ପଦକ୍ଷେପର ସୂଚନା ମିଳୁନାହିଁ l ଯାହାହେଉ ବିଳମ୍ବରେ ହେଲେ ମଧ୍ୟ ସରକାର ରାଉରକେଲା, ଅମର୍ଦାରୋଡ଼ ଓ ଜୟପୁର ବିମାନ ବନ୍ଦରର ଉନ୍ନତି କରଣ ପାଇଁ ବିସ୍ତୃତ ନକ୍ସା ପ୍ରସ୍ତୁତ କରିବା ପାଇଁ “ରାଇଟ୍ସ” କମ୍ପାନୀକୁ ଦାୟିତ୍ୱ ଦେଇଥିବାରୁ ବିକାଶ ମଞ୍ଚର ସଦସ୍ୟ ମାନଙ୍କ ସହ ଏ ଅଂଚଳବାସୀ ଖୁସି ପ୍ରକାଶ ସହ ସରକାରଙ୍କୁ ଧନ୍ୟବାଦ ଅର୍ପଣ କରିଛନ୍ତି l ବିସ୍ତୃତ ଆଲୋଚନା ପରେ ଏହି ଦାବି ଗୁଡିକର ଯଥାଶୀଘ୍ର ସମାଧାନ ପାଇଁ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ପ୍ରତିଶୃତି ଦେଇଥିବାରୁ ବିକାଶ ମଞ୍ଚ ତରଫରୁ ଧନ୍ୟବାଦ ଅର୍ପଣ କରାଯାଇଥିଲା l ଆଲୋଚନା ସମୟରେ ବୀରମିତ୍ରପୁର ବିଧାୟକ ଶଙ୍କର ଓରାମ, ରାଉରକେଲା ଇସ୍ପାତ କାରଖାନାର ଭାରପ୍ରାପ୍ତ ନିର୍ଦ୍ଦେଶକ ଅତନୁ ଭୌମିକ, ଏନଆଇଟିର ନିର୍ଦ୍ଦେଶକ ପ୍ରଫେସର ଉମା ମାହେଶ୍ୱର ରାଓ ଓ ମଞ୍ଚର ବରିଷ୍ଠ ଉପଦେଷ୍ଟା ଅଭୟ ଦାସ, ଅମୂଲ୍ୟ ବରାଳ, ସଂଜୀବ ମହାନ୍ତି, ସୁପ୍ରତିକ ମିଶ୍ର ଆଦି ଆଲୋଚନାରେ ଅଂଶ ଗ୍ରହଣ କରି ଶୀଘ୍ର ସୁଫଳର ଆଶା ପ୍ରକାଶ କରିଥିଲେ l