ନାଟ୍ୟ ନିର୍ଦ୍ଦେଶକ, ଗବେଷକ ଶୈଳେନ୍ଦ୍ର ପ୍ରସାଦ ଆଚାର୍ଯ୍ୟଙ୍କ ଦେହାନ୍ତ : ସ୍ତବ୍ଧ ଅଞ୍ଚଳବାସୀ
ମ.ରାମପୁର,୧୪/୧୨ (ମସୀହା): କଳାହାଣ୍ଡି ଜିଲ୍ଲାର ଜଣେ ସୁପରିଚିତ ନାଟ୍ୟ ନିର୍ଦ୍ଦେଶକ, ଗବେଷକ ତଥା ମ .ରାମପୁର ମହାବିଦ୍ୟାଳୟର ଓଡ଼ିଆ ବିଭାଗର ପୂର୍ବତନ ଅଧ୍ୟାପକ ଶୈଳେନ୍ଦ୍ର ପ୍ରସାଦ ଆଚାର୍ଯ୍ୟ (୬୧)ଙ୍କ ଆଜି ପ୍ରାୟ ସାଢେ଼ ଏକ ଘଣ୍ଟା ସମୟରେ ଗରଗଡସ୍ଥିତ ବିକାଶ ବେସରକାରୀ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମୃତ୍ୟ ବରଣ କରିଛନ୍ତି l ତାଙ୍କ ମୃତ୍ୟୁ ଖବର ମ.ରାମପୁର ତଥା ଆଖପାଖ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି l ସେ ଗତ ଅଗଷ୍ଟ ମାସରେ ଅଧ୍ୟାପନାରୁ ଅବସର ଗ୍ରହଣ କରିଥିଲେ l ସେ ଲୋକ ନାଟକ, ଲୋକ ସଂସ୍କୃତି ର ଗବେଷକ ଏବଂ ନାଟ୍ୟ ନିର୍ଦ୍ଦେଶକ ଥିଲେ l ସ୍ଥାନୀୟ ଅଞ୍ଚଳ ରେ ଲୋକ କଳାର ପ୍ରଚାର ପ୍ରସାର ଦିଗରେ ସେ ନିରବଚ୍ଛିନ୍ନ ଭାବରେ ପ୍ରୟାସ ଜାରି ରଖିଥିଲେ l ତାଙ୍କ ପ୍ରଚେଷ୍ଟାରେ ଅନେକ ନାଟ୍ୟ ସଂସ୍ଥା, ଅନୁଷ୍ଠାନ ଗଢି ଉଠିଛି l ତାଙ୍କ ରଚନା ଏବଂ ନିର୍ଦ୍ଦେଶନାରେ ପାଇକପଡ଼ାର ରାମଜୀ ନାଟ୍ୟ ସଂଘ ର ରାମଲୀଳା ଜିଲ୍ଲା ତଥା ଜିଲ୍ଲା ବାହାରେ ବହୁ ପ୍ରସିଦ୍ଧି ଲାଭ କରିଛି l ସେ ଏକା ଧାରରେ ଜଣେ ନାଟ୍ୟକାର,ଲୋକ ନାଟକ ଗବେଷକ , କଳାକାର ତଥା ସଂସ୍କୃତିର ପୂଜାରୀ ଥିଲେ l ତାଙ୍କ ସ୍ଥାନ କେହି ପୂରଣ କରି ପାରିବେ ନାହିଁ l ଜିଲ୍ଲା ତଥା ଅଞ୍ଚଳ ପାଇଁ ଏକ ଅପୂରଣୀୟ କ୍ଷତି l ଅଞ୍ଚଳବାସୀ ଜଣେ ଦକ୍ଷ ସଂଗଠକ , ଜଣେ ପ୍ରତିଭାବାନ ବ୍ୟକ୍ତିଙ୍କୁ ଅକାଳରେ ହରେଇ ଦୁଃଖରେ ମ୍ରିୟମାଣ l ତାଙ୍କ ମୃତ୍ୟୁରେ ରାମଜୀ ନାଟ୍ୟ ସଂଘ,ଚନ୍ଦ୍ରମଣି ନାଟ୍ୟ ସଂଘ, ଯୁଗଯାତ୍ରୀ ସାହିତ୍ୟ ସଂସଦ, ଆଞ୍ଚଳିକ କାମନାଦଣ୍ଡ ସାଂସ୍କୃତିକ ପରିଷଦ , ଅନେକ କାମନାଦଣ୍ଡ ପୀଠ,ଦଣ୍ଡ ଗୁରୁ ତଥା ଅନେକ ସାଂସ୍କୃତିକ ଅନୁଷ୍ଠାନ ଓ ବୁଦ୍ଧିଜୀବୀ , ସାଧାରଣ ଜନତା, ଛାତ୍ର ଛାତ୍ରୀ ଗଭୀର ଶୋକ ବ୍ୟକ୍ତ କରିଛନ୍ତି l