ଡାବୁଗାଁରେ ଠାକୁର ଅନୁକୂଳ ଚନ୍ଦ୍ର ଙ୍କ ୧୩୬ ତମ ଜନ୍ମ ମହୋତ୍ସବ ପାଳିତ
ଡାବୁଗାଁ, ୪/୨ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ବ୍ଳକ ସଦର ମହକୁମା ରାଜ୍ୟ ରାଜପଥ ପାର୍ଶ୍ଵରେ ଥିବା ସତସଙ୍ଗ ବିହାର ପରିସରରେ ପରମ ପ୍ରେମମୟ ଶ୍ରୀ ଶ୍ରୀ ଠାକୁର ଅନୁକୂଳ ଚନ୍ଦ୍ର ଙ୍କ ୧୩୬ ତମ ଜନ୍ମ ମହୋତ୍ସବ ମହା ସମାରୋହରେ ରବିବାର ପାଳିତ ହୋଇଯାଇଛି l ସତସଙ୍ଗ ପୂର୍ବରୁ ଦିବା ୯ ଘଣ୍ଟା ରୁ ଡାବୁଗାଁ ସହରରେ ଠାକୁରଙ୍କ ଫଟୋଚିତ୍ର ଥିବା ରଥରେ ସଜ୍ଜିତ କରି ନଗର ସଂକୀର୍ତ୍ତନ କରି ସହର ପରିକ୍ରମା କରାଯାଇଥିଲା l ଏହି ଅବସରରେ ଦିବା ଠିକ ୧୧ ଘଣ୍ଟା ୩୦ ମିନିଟ୍ ସମୟରେ ନବରଙ୍ଗପୁର ଜିଲାର ସହ ପ୍ରତି ଋତ୍ୱିକ ପ୍ରଦୀପ ଦାସ ଙ୍କ ଅଧ୍ୟକ୍ଷତାରେ ମୁଖ୍ୟ ବକ୍ତା କୁଆଖିଆ ର ସହ ପ୍ରତି ଋତ୍ୱିକ କୃଷ୍ଣ ଚନ୍ଦ୍ର କର, ସହ ପ୍ରତି ଋତ୍ୱିକ କମଳା କାନ୍ତ ସାହୁ, ଯାଜକ ଗିରିଧାରୀ ସାହୁ, ଗୋପିନାଥ ବେହେରା, ବିବେକାନନ୍ଦ ବାରିକ, ପଙ୍କଜ କୁମାର ମହାନ୍ତି, ମଦନ ପାତ୍ର ଓ ନବରଙ୍ଗପୁର ଜିଲାରୁ ବହୁ ପବିତ୍ର ପାଞ୍ଜା ଧାରୀ କର୍ମୀ ପ୍ରମୂଖ ଉପସ୍ଥିତ ରହିଥିବା ବେଳେ ନବରଙ୍ଗପୁର ଜିଲାର କୋଣ ଅନୁକୋଣ ରୁ ଗୁରୁମା ଓ ଗୁରୁଭାଇ ମାନେ ବହୁ ସଂଖ୍ୟାରେ ଉପସ୍ଥିତ ରହିଥିଲେ l ସତସଙ୍ଗ କାର୍ଯ୍ୟକ୍ରମ ଆରମ୍ଭ ହୋଇ ପ୍ରାତଃ ବିନତି, ପ୍ରାତଃ ଓ ସନ୍ଧ୍ୟା କାଳୀନ ବିନତି, ସଦ୍ ଗୁରୁ ବନ୍ଦନା, ଧ୍ୟାନ, ପବିତ୍ର ସତ୍ୟାନୁସରଣ ଗ୍ରନ୍ଥ ପାଠ ପରେ ଠାକୁର ଙ୍କ ଭଜନ କୀର୍ତ୍ତନ ର ଆସର ଜମି ଭକ୍ତିମୟ ପରିବେଶ ସୃଷ୍ଟି ହୋଇଥିଲା l ଇଷ୍ଟ ପ୍ରାଣ ଗୁରୁଭାଇ ଇଂ ଅଂଶୁ ପ୍ରକାଶ ରାଉତ ଙ୍କ ମନ ଛୁଆଁ ଭଜନ କୋରସ ସମସ୍ତଙ୍କୁ ମନମୁଗ୍ଧ କରି ଆପ୍ୟାୟିତ କରିଥିଲେ l ମୁଖ୍ୟ ବକ୍ତା ଙ୍କ ଓଜସ୍ଵିନୀ ଭାଷଣରେ ସମସ୍ତ ଶ୍ରଦ୍ଧାଳୁ ଭକ୍ତ ବୃନ୍ଦ ମନ୍ତ୍ର ମୁଗ୍ଧ ହୋଇ ଉଠିଥିଲେ l ବନ୍ଦେ ପୁରୁଷୋତ୍ତମ ଧ୍ୱନି ରେ ଗଗନ ପବନ ଧ୍ୱନୀତ ହୋଇ ଉଠିଥିଲା lସତସଙ୍ଗ କାର୍ଯ୍ୟକ୍ରମ ଦୁଇ ଘଣ୍ଟା ରେ ସମାପ୍ତ ହେବା ପରେ ଶ୍ରଦ୍ଧାଳୁ ଭକ୍ତ ମାନଙ୍କ ନିମନ୍ତେ ଅନ୍ନ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା l ପାଞ୍ଚ ଜଣ ଠାକୁର ଙ୍କ ଶତମନ୍ତ୍ରରେ ସତଦୀକ୍ଷା ଗ୍ରହଣ କରିଥିଲେ l