ବନବିଭାଗ ଦ୍ବାରା ଉଦ୍ଧାର ହେଲା କଲରାପତରିଆ ବାଘ
ବାଲେଶ୍ଵର,୦୯/୬/୨୪- ବାଲେଶ୍ଵର ଜିଲ୍ଲା ଖଇରା ବ୍ଲକ ନୟାଖଣ୍ଡି ପଞ୍ଚାୟତ ଅନ୍ତର୍ଗତ ଗଡ ଗ୍ରାମରେ ତା ୦୮/୬/୨୪ ରିଖରେ କଲରାପତରିଆ ବାଘ ଆତଙ୍କରେ ମୋଟ ୬ ଜଣ ଆହତ ହୋଇଥିବା ଖବର ସଂଗ୍ରହରୁ ଜଣାଯାଇଛି । ଅନ୍ୟ ସାମାନ୍ୟ ଆହତ ମାନେ ମେଡିକାଲକୁ ଆସିନଥିଲେ । ଫରେଷ୍ଟ ଗାର୍ଡଙ୍କ ସମେତ ୫ ଜଣଙ୍କୁ ଚିକିତ୍ସା ନିମନ୍ତେ ବିଭିନ୍ନ ମେଡିକାଲକୁ ସ୍ଥାନାନ୍ତର କରାଯାଇଥିଲା । ଶେଷରେ ବନବିଭାଗ ଦ୍ବାରା ବାଘ ଉଦ୍ଧାର ହେଲା । ପ୍ରକାଶ ଥାଉକି ଗତକାଲି ଗ୍ରାମର ଗଣନାଥ ନାୟକଙ୍କ ପତ୍ନୀ ସତ୍ୟଭାମା ନାୟକ(୫୦) ନିଜ ପୁଅ ଓ ସ୍ୱାମୀଙ୍କ ସହ ଘର ନିକଟସ୍ଥ ବାଡ଼ିରେ କାମ କରୁଥିବା ସମୟରେ ବାଘଟି ପ୍ରଥମେ ସତ୍ଯଭାମାଙ୍କୁ ଆକ୍ରମଣ କରିଥିଲା । ଚିତ୍କାର ଶୁଣି ନିକଟରେ ଥିବା ପୁଅ ଓ ସ୍ୱାମୀ ତାଙ୍କ ନିକଟକୁ ଦୌଡି ଯାଇଥିଲେ । ଏହା ଦେଖି ବାଘଟି ସେଠାରୁ ଗର୍ଜନକରି ଗ୍ରାମ ମଧ୍ୟକୁ ପ୍ରବେଶ କରିଥିଲା । ପରେ ଗ୍ରାମବାସୀ ଏକତ୍ର ହୋଇ ବାଘଟିକୁ ଗୋଡ଼ାଇବାକୁ ପ୍ରୟାସ କରିବାରୁ ବାଘଟି କେଉଁଠାରେ ଲୋଚି ଯାଇଥିଲା ପାଇନଥିଲେ । ଖବରପାଇ ଗ୍ରାମରେ ବନ ବିଭାଗର କର୍ମଚାରୀ ମାନେ ପହଂଚି ଗ୍ରାମବାସୀଙ୍କ ସହ ମିଶି ନିକଟରେ ଥିବା ଏକ ବଣରେ ବାଘକୁ ଖୋଜି ଥିଲେ । ଏହି ସମୟରେ ବାଘଟିଟି ପୁନର୍ବାର ସତ୍ୟଭାମାଙ୍କ ପୁଅ ରାଧାକାନ୍ତ ନାୟକ(୨୦)କୁ ଆକ୍ରମଣ କରିବା ସହ ସେଠାରେ ଉପସ୍ଥିତ ଥିବା ଟଙ୍କଧର କେଶି (୫୫) ଓ ରାଧାକାନ୍ତ ନାୟକ(୨୦) ଉପରକୁ ଆକ୍ରମଣ କରି ପୁନର୍ବାର କୌଣସି ବୁଦାମୂଳରେ ଲୋଚି ଯାଇଥିଲା । ପ୍ରାୟ ୧୧ ଘଣ୍ଟାରୁ ଉର୍ଦ୍ଧ୍ବ ସମୟ ଧରି ସ୍ଥାନୀୟ ଅଞ୍ଚଳ ଓ ଗ୍ରାମରେ ଭୟ ଏବଂ ଆତଙ୍କ ଖେଳି ଥିବାବେଳେ ବାଘକୁ ଧରିବା ଲାଗି ଉଭୟ ଗ୍ରାମବାସୀ ଓ ବନ କର୍ମଚାରୀ ଜୋରଦାର ପ୍ରୟାସ ଚଳାଇଥିଲେ । ଅର୍ଜୁନପୁର ଗ୍ରାମର ପ୍ରଫୁଲ୍ଲ ଦାସ, କଡମିଆଁ ଗ୍ରାମର ନିରଞ୍ଜନ ମୁଖୀ ଓ ଔପଦା ଫରେଷ୍ଟର କିଶୋର ଭୂୟାଁ ଆକ୍ରମଣରେ ଗୁରୁତର ହୋଇପଡ଼ିଥିଲେ । ଗୁରୁତରଙ୍କୁ ପ୍ରଥମେ ଖଇରା ଓ ପରେ ଭଦ୍ରକ ଏବଂ କଟକକୁ ସ୍ଥାନାନ୍ତରିତ କରାଯାଇଥିଲା । ବନ୍ଯଜନ୍ତୁ ଗାଁ ମୁହାଁ ହେବାର ମୁଖ୍ୟ କାରଣ ହେଉଛି ଜଙ୍ଗଲରେ ଖାଦ୍ଯାଭାବ । ଖାଦ୍ୟ ଅନ୍ଯୁଷଣରେ ବୁଲୁଥିବା ସମୟରେ ଶାରିଶୁଆପାହାଡ଼ର ବେଆଇନ ବ୍ଳାଷ୍ଟିଂରେ ଭୟଭୀତ ହୋଇ ଜନବସତିକୁ ବାଘ ଓ ହରିଣ ଭଳି ବନ୍ଯଜନ୍ତୁ ପଶିଆସି ଧନଜୀବନ ହାନି କରୁଥିବାର ସମ୍ପୃକ୍ତ ଅଞ୍ଚଳବାସୀଙ୍କ ଆଲୋଚନାରୁ ଜଣାପଡେ । ବାଘଟି ଭୟଭୀତ ହୋଇ ଶେଷରେ ଗଡ଼ ଗ୍ରାମର ମୁକୁନ୍ଦ ଷେଣ୍ଢଙ୍କ ଗୁହାଳ ଘରେ ପଶି ଯାଇଥିଲା । ଵନ ବିଭାଗ ଗୁହାଳ ଘରକୁ ଜାଲ ବିଛାଇ ଘେରି ରଖିଥିଲେ । ସିମିଳିପାଳରୁ ଏକ ଟିମ ପହଞ୍ଚି ଵାଘକୁ ଟ୍ରାଙ୍କୁଲାଇଜର ସାହାଯ୍ୟରେ ଉଦ୍ଧାର କରି ସିମିଳିପାଳକୁ ନେଇଯାଇଥିଲେ । ବହୁ ଲୋକ ରୁଣ୍ଡ ହୋଇଥିଲେ ମଧ୍ୟ ବିଳମ୍ବିତ ରାତି ପର୍ଯ୍ୟନ୍ତ ବାଘକୁ କେହି ଦେଖିବାର ସୁଯୋଗ ପାଇନଥିଲେ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
