ଗୋଡ଼ ଭାଙ୍ଗି ଯିବାରୁ ରୋଜଗାର ହରାଇଥିଲେ,
ସ୍ୱାଧୀନତା ଦିବସରେ ସରପଞ୍ଚ ଦେଲେ ଟ୍ରାଇ ସାଇକଲ
କୋକସରା,୧୮/୮ // କଳାହାଣ୍ଡି ଜିଲ୍ଲା କୋକସରା ବ୍ଲକ ଆମପାଣି ପଞ୍ଚାୟତର ବୁଦ୍ଧଦେବ ମାଝୀ । ପ୍ରାପ୍ତବୟସରେ ପନିପରିବା ଚାଷ କରି ପାଞ୍ଚ ପ୍ରାଣୀ କୁଟୁମ୍ବ ବେଶ୍ ଆରାମରେ ଚଳି ଯାଉଥିଲେ । ହଠାତ୍ ଏକ ଦୁର୍ଘଟଣା ତାଙ୍କ ରୋଜଗାର ଛଡାଇ ନେଇଥିଲା । ଗୋଡ଼ ଭାଙ୍ଗିଯିବା ଫଳରେ ସେ ଚିକିତ୍ସା ଓ ଅର୍ଥାଭାବରୁ ଏବେ ଶଯ୍ୟାଶାୟୀ । ୮୦ ବର୍ଷୀୟ ବୃଦ୍ଧ ବୁଦ୍ଧଦେବଙ୍କ ଏଭଳି ଅବସ୍ଥା ଦେଖି ଆମପାଣି ସରପଞ୍ଚ ରୁକ୍ମିଣୀ ବାଣୁଆ ବ୍ଲକ ପ୍ରଶାସନ ସହଯୋଗକ୍ରମେ ସ୍ଵାଧୀନତା ଦିବସରେ ଉପହାର ସ୍ୱରୂପ ଏକ ଟ୍ରାଇ ସାଇକଲ ପ୍ରଦାନ କରିଛନ୍ତି । ସୂଚନା ଯୋଗ୍ୟ ଯେ ସରପଞ୍ଚ ସବୁ ସ୍ୱାଧୀନତା ଦିବସ ଓ ଅନ୍ୟାନ୍ୟ ଶୁଭ ଦିନ ମାନଙ୍କରେ କିଛି ନା କିଛି ସେବାକାର୍ଯ୍ୟ ଦ୍ୱାରା ସଚେତନତା ବାର୍ତ୍ତା ବାଣ୍ଟିଥାନ୍ତି । ଅନ୍ୟପଟେ ଟ୍ରାଇ ସାଇକଲ ପାଇ ବୁଦ୍ଧଦେବଙ୍କ ଖୁସି କହିଲେ ନସରେ । ପୁଣି ସେ ବୁଲି ପାରିବେ, କିଛି କରିବାକୁ ଚେଷ୍ଟା କରିବେ ବୋଲି କହିଛନ୍ତି । ସମିତି ସଭ୍ୟ ନର୍ତ୍ତକୀ ଦଣ୍ଡସେନା, କାର୍ଯ୍ୟ ନିର୍ବାହୀ ଅଧିକାରୀ ଗିରିଶ ଚନ୍ଦ୍ର ନାଏକ ତଥା ସମସ୍ତ ସଭ୍ୟ, ସଭ୍ୟା ଉପସ୍ଥିତ ରହି ବୁଦ୍ଧଦେବଙ୍କ ମଙ୍ଗଳ କାମନା କରିଥିଲେ ।
ମସିହା ନିୟୁଜ୍ ସର୍ଭିସ୍
