ସୁଦର୍ଶନ ପୂଜାରୀଙ୍କ ପ୍ରଚେଷ୍ଟାରେ ନବୋଦୟ ଓ ଆଦର୍ଶ ପିଲାଙ୍କ ନିମନ୍ତେ ମାଗଣା କୋଚିଂ ବ୍ୟବସ୍ଥା
ଡାବୁଗାଁ, ୨୨/୧୨ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ବ୍ଲକ ମେଦନା ପଞ୍ଚାୟତ ଅନ୍ତର୍ଗତ ଚାଟିଗୁଡା ଗ୍ରାମର ଜଣେ ସମାଜସେବୀ ସୁଦର୍ଶନ ପୂଜାରୀଙ୍କ ଉଦ୍ୟମରେ ମେଦନା ଅଞ୍ଚଳର ଆଦର୍ଶ ବିଦ୍ୟାଳୟର ପ୍ରବେଶିକା ପରୀକ୍ଷା ଓ ନବୋଦୟ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଆଦିବାସୀ ଗରିବ ଛାତ୍ରୀଛାତ୍ର ମାନଙ୍କୁ ମାଗଣା ଶିକ୍ଷାଦାନ ର ବ୍ୟବସ୍ଥା କରାଯାଇଛି । ଏହି ଉଦ୍ୟମକୁ ସ୍ଥାନୀୟ ଲୋକେ ବେଶ ପ୍ରଶଂସା କରୁଛନ୍ତି । ନିଜ ଝିଅ ପ୍ରିୟଦର୍ଶିନୀ ପୂଜାରୀ ଓଏଏସ ପରୀକ୍ଷାରେ ସଫଳତା ହାସଲ କରିବା ପରେ ଅଞ୍ଚଳର ଛାତ୍ରୀଛାତ୍ର ଙ୍କ ଭବିଷ୍ୟତ ଗଠନ କରିବା ପାଇଁ ସେ ଏକ ଛୋଟ ପ୍ରୟାସ କରିଥିବା ସେ ନିଜ ପ୍ରତିକ୍ରିୟାରେ ସମାଜସେବୀ ପୂଜାରୀ କହିଛନ୍ତି । ମେଦନା, ଅଞ୍ଚଳା, ରାମସା ପାଲିଆ ଆଦି ଅଞ୍ଚଳର ପାଖାପାଖି ୭୦ଜଣ ଛାତ୍ରୀ ଛାତ୍ର ମାନଙ୍କୁ ଚାଟିଗୁଡା ସରକାରୀ ପ୍ରାଥମିକ ବିଦ୍ୟାଳୟରେ ଏକତ୍ରିତ କରି ୬ଜଣ ଶିକ୍ଷକ ସକାଳ ୧୦ଘଟିକା ରୁ ଅପରାହ୍ନ ୧ଘଟିକା ପର୍ଯ୍ୟନ୍ତ ପାଠ ପଢ଼ାଉଛନ୍ତି । ଏହି କାର୍ଯ୍ୟକ୍ରମ ଡିସେମ୍ବର ୭ ତାରିଖ ଦିନ ଆରମ୍ଭ କରାଯାଇଛି | ପ୍ରତି ରବିବାର ଦିନ ସକାଳୁ ପିଲାଙ୍କ ପାଇଁ ଜଳଖିଆ, ମଧ୍ୟାହ୍ନ ଭୋଜନ ଓ ସେମାନଙ୍କ ପାଇଁ ମାଗଣା ବହି, ଖାତା, କଲମ, ରବର, ପେନସିଲ ଆଦିର ବ୍ୟବସ୍ଥା ସୁଦର୍ଶନ ନିଜେ ବହନ କରୁଛନ୍ତି । ଶିକ୍ଷକ ମାନଙ୍କ ମଧ୍ୟରେ ବେଣୁଧର ଭତରା, ତୁଳାରାମ ହରିଜନ, ଦୟାନିଧି ବଞ୍ଜରା, ପ୍ରଫୁଲ୍ଲ କୁମାର ମେହେର, ଧନୁର୍ଜୟ ସ୍ୱାଇଁ ପ୍ରମୁଖ ପ୍ରତି ରବିବାର ଦିନ ନିଜ ଅମୁଲ୍ୟ ସମୟ ପିଲାଙ୍କ ପ୍ରଶିକ୍ଷଣ ପାଇଁ ଦାନ କରୁଥିବା ସୂଚନା ମିଳିଛି ।
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
