ଶାଖା ଡାକଘର କମ୍ପ୍ୟୁଟର ଦୀର୍ଘଦିନ ଧରି ଅଚଳ
କଟକ : ୪୨ ମୌଜା ବେଣ୍ଟକାର ଉପ ଡାକଘରେ ଖୋଲାଯାଇଥିବା ଝାରକଟା ଶାଖା ଡାକଘର କମ୍ପ୍ୟୁଟର ମେସିନ୍ ଗତ ମାସ ୧୯ ତାରିଖରୁ ଅଚଳ ହୋଇ ପଡ଼ିରହିଛି। ପ୍ରତିଦିନ ବହୁ କଷ୍ଟମର ସେମାନଙ୍କ ସଞ୍ଚୟ ଜମା ବହିରେ ଟଙ୍କା ଜମା କରିବା, ଟଙ୍କା ଉଠାଣ, ଆର.ଡି, ଆର.ପି.ଏଲ୍.ଆଇ ଓ ଫିକ୍ସଡ ଡିପୋଜିଟ ଇତ୍ୟାଦି କାର୍ଯ୍ୟ ନହେବାରୁ ଫେରୁଛନ୍ତି। ଫଳରେ ଝାରକଟା ଶାଖା ଡାକଘର ଡାକସେବା ଗୁରୁତର ବ୍ୟାହତ ହେବା ସହ ହିତାଧିକାରୀ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସଂପୃକ୍ତ ଶାଖା ପରିଚାଳକ ବିଭାଗୀୟ ଅଧିକାରୀଙ୍କୁ ଏବିଷୟ ମେଲ୍ ଯୋଗେ ଜଣାଇଥିଲେ ମଧ୍ୟ ଏପର୍ଯ୍ୟନ୍ତ ଉକ୍ତ କମ୍ପ୍ୟୁଟର ମେସିନ୍ ମରାମତି ହୋଇନାହିଁ। ବେଣ୍ଟକାର ଉପ ଡାକଘରେ କାର୍ଯ୍ୟଭାର ଅଧିକ ଥିବାରୁ ଉପ ଡାକଘର କର୍ମଚାରୀମାନେ ଝାରକଟା ଶାଖା ଡାକଘର କଷ୍ଟକର ମାନଙ୍କ କାର୍ଯ୍ୟ କରିବାକୁ ଅମଙ୍ଗ ହେଉଛନ୍ତି। ଏଣୁ ବିଭାଗୀୟ ଅଧିକାରୀ ଉପରୋକ୍ତ ବିଷୟକୁ ଗୁରୁତର ସହ ବିଚାରକୁ ନେଇ ଝାରକଟା ଶାଖା ଡାକଘର କମ୍ପ୍ୟୁଟର ମେସିନ୍ କୁ ଯଥାଶୀଘ୍ର କାର୍ଯ୍ୟକ୍ଷମ କରାଇବାର ବ୍ୟବସ୍ଥା କରିବାକୁ ୪୨ମୌଜା ବିକାଶ ପରିଷଦ ଉପଦେଷ୍ଟା ତଥା ୪୨ମୌଜା ଯାଦବ ମହାସଭା ସଭାପତି ବରିଷ୍ଠ ନାଗରିକ ବୁଲେଇ ବେହେରା ବିଭାଗୀୟ ଅଧିକାରୀଙ୍କୁ ମେଲ୍ ଯୋଗେ ଜଣାଇବା ସହ ପ୍ରେସ ବିଜ୍ଞପ୍ତିରେ ଅନୁରୋଧ କରିଛନ୍ତି।
ଶ୍ରୀକାନ୍ତ ବେଉରା ଙ୍କ ରିପୋର୍ଟ୍
