ଆଦିବାସୀଙ୍କୁ ରୋଜଗାର ଯୋଗାଉଛି କେନ୍ଦୁପତ୍ର
ଡ଼ାବୁଗାଁ,୨/୫ (ମ.ନି.ସ.)- ନବରଙ୍ଗପୁର ଜିଲାର ଡ଼ାବୁଗାଁ ବ୍ଲକ ଏକ ଆଦିବାସୀ ଅଧ୍ୟୁଷିତ ବ୍ଲକ ହୋଇଥିବା ବେଳେ ବ୍ଲକରେ ବସବାସ କରୁଥିବା ପ୍ରାୟ ୯୦ ପ୍ରତିଶତ ଆଦିବାସୀ ଜଙ୍ଗଲଜାତ ଦ୍ରବ୍ୟ ଉପରେ ନିର୍ଭରଶୀଳ | ଜଙ୍ଗଲରୁ ବିଭିନ୍ନ ଫଳ ମୂଳ, ଝୁଣା, ପତ୍ର, କନ୍ଦମୂଳ ଓ ଔଷଧୀୟ ଚେରିମୂଳି ସଂଗ୍ରହ କରି ଦୁଇ ପଇସା ରୋଜଗାର କରିଥାନ୍ତି । ବାର୍ତ୍ତମାନ ସରକାରଙ୍କ କେନ୍ଦୁପତ୍ର ଯୋଜନା ସେମାନଙ୍କ ରୋଜଗାରର ଏକ ମାଧ୍ୟମ ପାଲଟିଛି । ସରକାର କେନ୍ଦୁପତ୍ର ତୋଳାଳୀ ମାନଙ୍କୁ ବିଡା ମୁତାବକ ପାଉଣା ପ୍ରଦାନ କରିବା ସହିତ କେନ୍ଦୁପତ୍ର ତୋଳାଳୀ ମାନଙ୍କ ପାଇଁ ବିଭିନ୍ନ ଯୋଜନା ମଧ୍ୟ କରି ଆଦିବାସୀ ମହିଳା ମାନଙ୍କ ମେରୁଦଣ୍ଡ ସୁଧାରିବାର ପ୍ରଯତ୍ନ କରୁଛନ୍ତି । ବିଶେଷ କରି ଏପ୍ରିଲ ଓ ମଇ ମାସରେ କେନ୍ଦୁପତ୍ର ତୋଳାଳୀମାନେ କେନ୍ଦୁପତ୍ର ସଂଗ୍ରହ କରି ସ୍ଥାନୀୟ ବିଭାଗୀୟ କର୍ମଚାରୀ ମାନଙ୍କ ପାଖରେ ଜମା ଦେଉଛନ୍ତି । ତୋଳାଳୀମାନେ ୧ ବିଡାରେ ୪୦ ରୁ ୪୪ ଗୋଟି ପତ୍ର ବାନ୍ଧୁଥିଵା ବେଳେ ୧୦୦ ବିଡାକୁ ସରକାର ୩୨୦ଟଙ୍କାରେ କିଣିବା ସହିତ ଦେଉଥିବା ତୋଳାଳୀକୁ ୨୫% ପ୍ରତିଶତ ବୋନସ ମଧ୍ୟ ପ୍ରଦାନ କରୁଛନ୍ତି । ତତସହିତ ୫୦୦ ବିଡାରୁ ଅଧିକ ବିକ୍ରି କରିଲେ ୨ ଲକ୍ଷର ବୀମା ପ୍ରଦାନ କରାଯିବା ସହିତ ପ୍ରତି ତିନି ବର୍ଷରେ ତୋଳାଳୀ ମାନଙ୍କୁ କପଡ଼ା, ଚପଲ, ଛତା ଓ ପାଣି ବୋତଲ ମାଗଣାରେ ଯୋଗାଉଛନ୍ତି । ଗ୍ରାମାଞ୍ଚଳରେ ବସବାସ କରୁଥିବା ଯୁବତୀ ଓ ମହିଳାମାନେ ଦଳ ଦଳ ହୋଇ ଆଖପାଖ ବନ ଜଙ୍ଗଲକୁ ଯାଇ କେନ୍ଦୁପତ୍ର ତୋଳି ଆଣି ସାହି ସାହିରେ ଦଳ ଦଳ ହୋଇ ଗୋଟେ ସ୍ଥାନରେ ବସି ପତ୍ର ବାନ୍ଧିବା ଓ ପରସ୍ପର ମଧ୍ୟରେ ବିଭିନ୍ନ ବିଷୟ ଆଲୋଚନା କରୁଥିବା ଦେଖିବାକୁ ମିଳୁଛି । ଏହି କେନ୍ଦୁପତ୍ର ତୋଳାଳି ମାନଙ୍କୁ କେନ୍ଦୁପତ୍ର ବିଡା ପିଛା ବର୍ତ୍ତମାନର ମୂଲ୍ୟ ଠାରୁ ସରକାର ବିଡା ପିଛା ମୂଲ୍ୟ ବୃଦ୍ଧି କରି ଆଦିବାସୀ ମହିଳା ମାନଙ୍କ ଆର୍ଥିକ ସ୍ଥିତି ରେ ଉନ୍ନତି ହେବ ବୋଲି ମହିଳା ମାନେ ପ୍ରକାଶ କରିଛନ୍ତି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
