ଓଏମସି କୁର୍ମିଟାର ଲୁହାପଥର ଖଣିରେ ଦୁର୍ଘଟଣା : ଜଣେ ଶ୍ରମିକଙ୍କ ମୃତ୍ୟୁ
ରାଉରକେଲା ୧୫/୫, ଓଡିଶା ମାଇନିଂ କର୍ପୋରେସନ ଅଧିନରେ ଥିବା ବରସୁଆଁର କୁର୍ମିଟାର ଲୁହାପଥର ଖଣିରେ, ଖଣି କାର୍ଯ୍ୟ ଚାଲୁଥିବା ସମୟରେ ଗତକାଲି ୧୪ ତାରିଖ ସନ୍ଧ୍ୟା ପ୍ରାୟ ୬ଟା ସମୟରେ ପଶ୍ଚିମ ଡମ୍ପିରେ ଏକ ସାଂଘାତିକ ଦୁର୍ଘଟଣା ଘଟିଯାଇ ଜଣେ ଶ୍ରମିକଙ୍କ ମୃତ୍ୟୁ ଘଟିଛି।
ସୂଚନା ଅନୁସାରେ ଘଟଣା ପରେ ଉଦ୍ଧାରକାରୀ ଦଳଗୁଡ଼ିକୁ ତୁରନ୍ତ କାର୍ଯ୍ୟରେ ନିୟୋଜିତ କରାଯାଇଥିଲା। ଉଦ୍ଧାର କାର୍ଯ୍ୟ ସମୟରେ, ଆଜି ବରସୁଆନ ଗ୍ରାମର ବାସିନ୍ଦା ଅବିନାଶ କେରକେଟ୍ଟା (୩୦)ଙ୍କ ମୃତଦେହ ଘଟଣାସ୍ଥଳରୁ ଉଦ୍ଧାର କରାଯାଇଛି। ଦୁର୍ଘଟଣାର ସଠିକ୍ କାରଣ ଏପର୍ଯ୍ୟନ୍ତ ଜଣାପଡିନାହିଁ। ଦୁର୍ଘଟଣାର କାରଣ ଜାଣିବା ପାଇଁ ଖଣି କର୍ତ୍ତୃପକ୍ଷ ଘଟଣାର ତଦନ୍ତ ଆରମ୍ଭ କରିଛନ୍ତି।
ଏହି ଦୁର୍ଭାଗ୍ୟଜନକ ଘଟଣା ସ୍ଥାନୀୟ ଅଞ୍ଚଳ ଏବଂ ଖଣିରେ କାର୍ଯ୍ଯ କରୁଥିବା ଶ୍ରମିକମାନଙ୍କ ମଧ୍ୟରେ ଶୋକ ପ୍ରକାଶ କରାଯାଇଛି। ଉଲ୍ଲେଖଯୋଗ୍ୟ, ଯେ କୋଇଡା ଖଣି ସର୍କଲ ଅନ୍ତର୍ଗତ ଏହି ଦୁଃଖଦ ଖଣି ଦୁର୍ଘଟଣାରେ, ଗୁରୁବାର ସନ୍ଧ୍ୟାରେ ଓଏମସି ଖଣ୍ଡାଧାର କୁର୍ମିଟାର ଲୁହାପଥର ଖଣିରେ ଖଣି କାର୍ଯ୍ୟରେ ନିୟୋଜିତ ଏକ ଡୋଜର ମେସିନ୍ ପ୍ରାୟ ୨୫୦ ଫୁଟ ଗଭୀର ଗାତରେ ଖସି ପଡ଼ିଥିବା ଜଣାପଡ଼ିଛି। ସୂଚନା ଅନୁସାରେ ଡୋଜରଟି ଖଣି ସ୍ଥାନରେ କାର୍ଯ୍ୟରତ ଠିକା ସଂସ୍ଥା ଧାତ୍ରୀ ମାଇନ୍ସ ରିସୋର୍ସ ପ୍ରାଇଭେଟ୍ ଲିମିଟେଡର ଥିଲା। ଖଣି କାର୍ଯ୍ୟ ଚାଲିଥିବା ସମୟରେ ସନ୍ଧ୍ୟା ପ୍ରାୟ ୬ଟା ସମୟରେ ଏହି ଦୁର୍ଘଟଣା ଘଟିଥିଲା।
ଘଟଣା ସମ୍ପର୍କରେ ସୂଚନା ପାଇବା ପରେ, ପୋଲିସ ଓ ଅଗ୍ନିଶମ ସେବା କର୍ମଚାରୀଙ୍କ ସହିତ ଶନିବାର ସନ୍ଧ୍ୟାରୁ ଏକ ବଡ଼ ଉଦ୍ଧାର କାର୍ଯ୍ୟ ଆରମ୍ଭ କରାଯାଇ ଅବିନାଶ କେରକେଟ୍ଟା ନାମକ ଡୋଜର ଅପରେଟରଙ୍କୁ ଖୋଜି ବାହାର କରାଯାଇଛି। ଘଣ୍ଟା ଘଣ୍ଟା ଧରି ଖୋଜାଖୋଜି ପରେ, ଆଜି ତାଙ୍କ ମୃତଦେହ ଉଦ୍ଧାର କରାଯାଇଥିଲା। ମୃତକ ଅବିନାଶ କେରକେଟ୍ଟା ବରସୁଆଁର ତାଲାବଜାର ଅଞ୍ଚଳର ଈଶ୍ୱର କେରକେଟ୍ଟାଙ୍କ ବଡ଼ ପୁଅ ବୋଲି ଜଣାପଡ଼ିଛି। ଏହି ଦୁଃଖଦ ଘଟଣା ଖଣି ଅଞ୍ଚଳରେ ସୁରକ୍ଷା ବ୍ୟବସ୍ଥା ଏବଂ କାର୍ଯ୍ୟର ପ୍ରୋଟୋକଲ ସମ୍ପର୍କରେ ଗମ୍ଭୀର ଚିନ୍ତା ସୃଷ୍ଟି କରିଛି। ସ୍ଥାନୀୟ ଲୋକ ଏବଂ ଶ୍ରମିକମାନେ ଖଣି ସୁରକ୍ଷା ବ୍ୟବସ୍ଥାର ପର୍ଯ୍ୟାପ୍ତତା ଉପରେ ପ୍ରଶ୍ନ ଉଠାଇଛନ୍ତି ଏବଂ ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛନ୍ତି।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
