ଶୀତଳଷଷ୍ଠୀ ପାଇଁ ରୁପ୍ରା – ଖମ୍ବପଡ଼ା ଶୈବପୀଠରେ ଥାଳଉଠା କାର୍ଯ୍ୟକ୍ରମ
ନର୍ଲା, ୨୫।୫: କଳାହାଣ୍ଡି ଜିଲ୍ଲା ନର୍ଲା ବ୍ଲକ ଅନ୍ତର୍ଗତ ରୁପ୍ରା – ଖମ୍ବପଡ଼ା ଶୈବପୀଠରେ ଶିବ ବିବାହ – ଶୀତଳଷଷ୍ଠୀ ପାଇଁ ଥାଳଉଠା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ପ୍ରତିବର୍ଷ ପରି ଏବର୍ଷ ମଧ୍ୟ ଆସନ୍ତା ଜୁନ୍ ୧୯ ତାରିଖରେ ବାବା ବିଶେଶ୍ୱରଙ୍କର ଶୀତଳଷଷ୍ଠୀ ପର୍ବ ଆୟୋଜିତ ହେବ। ସେଥିପାଇଁ ଶିବକର୍ତ୍ତା ଭାବେ ଧଅଁରାମାଲ ନିବାସୀ ବ୍ରଜ ରଣା ଓ ବିଦୁସୂତା ରଣା ଏବଂ ପାର୍ବତୀ କର୍ତ୍ତା ଭାବେ ଟୁଟିଙ୍ଗ ନିବାସୀ ରାଜକୁମାର ଯୋଶୀ ଓ ରଜନୀ ଯୋଷୀ ଦାୟିତ୍ୱ ନିର୍ବାହ କରିବେ। ତେବେ ଥାଳଉଠା କାର୍ଯ୍ୟକ୍ରମରେ ଉଭୟ ପକ୍ଷ ଉପସ୍ଥିତ ରହି ଥାଳ ଅଦଳ ବଦଳ କରିଥିଲେ। ପୂଜକ ଗୋପାଳ ପୂଝାରୀ ପୂଜାକାର୍ଯ୍ୟ ସମ୍ପାଦନ କରିଥିଲେ। ଏ ଅବସରରେ ରୁପ୍ରା ସମେତ ଆଖପାଖ ଅଞ୍ଚଳର ଶ୍ରଦ୍ଧାଳୁମାନେ ସମବେତ ହୋଇଥିଲେ। ଶିବଶକ୍ତି ସାଂସ୍କୃତିକ ଅନୁଷ୍ଠାନର ସମସ୍ତ କର୍ମକର୍ତ୍ତା ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିବା ପାଇଁ ସହଯୋଗ ଆହ୍ୱାନ କରିଥିଲେ। ସୂଚନାଯୋଗ୍ୟ ଯେ ରୁପ୍ରା – ଖମ୍ବପଡ଼ା ବିଶେଶ୍ୱର ଶୈବପୀଠ ଏକ ପ୍ରାଚୀନ ଶୈବପୀଠ ଭାବେ କଳାହାଣ୍ଡି ଜିଲ୍ଲାରେ ଜଣାଶୁଣା। ସ୍ୱାଧୀନତା ପୂର୍ବବର୍ତ୍ତୀ କାଳରୁ ଏହା ପରିଚିତ ଥିବାବେଳେ ଶିବଶକ୍ତି ସାଂସ୍କୃତିକ ଅନୁଷ୍ଠାନ ପକ୍ଷରୁ ଅନେକ କାର୍ଯ୍ୟକ୍ରମ ବର୍ଷତମାମ ଆୟୋଜିତ ହୋଇଆସୁଛି।
ଦୀପକ ଠାକୁର ଙ୍କ ରିପୋର୍ଟ୍
