ଅନ୍ଧବିଶ୍ୱାସର କରାଳ ରୂପ
ଡାହାଣୀ ସନ୍ଦେହରେ ମହିଳାଙ୍କୁ ନିର୍ମମ ଆକ୍ରମଣ; ୫ ଅଭିଯୁକ୍ତଙ୍କୁ ବାନ୍ଧିଲା ଯୋଡ଼ା ପୁଲିସ
ଯୋଡ଼ା, : ବିଜ୍ଞାନ ଓ ଆଧୁନିକ ଶିକ୍ଷାର ଯୁଗରେ ମଧ୍ୟ ସମାଜରୁ ଅନ୍ଧବିଶ୍ୱାସ ଓ କୁସଂସ୍କାରର ମୂଳ ଉପୁଡ଼ି ଯାଇନାହିଁ। ବିଶେଷକରି ଦୁର୍ଗମ ଓ ଗ୍ରାମାଞ୍ଚଳରେ ଡାହାଣୀ, ଗୁଣିଗାରେଡ଼ି ଭଳି ଅନ୍ଧବିଶ୍ୱାସକୁ କେନ୍ଦ୍ର କରି ନିରୀହ ଲୋକଙ୍କୁ ହଇରାଣ, ନିର୍ଯାତନା ଓ ଆକ୍ରମଣ କରାଯିବା ଘଟଣା ଏବେ ବି ସମାଜ ପାଇଁ ଚିନ୍ତାର ବିଷୟ। ଏଭଳି ଏକ ସମ୍ବେଦନଶୀଳ ଘଟଣା କେନ୍ଦୁଝର ଜିଲ୍ଲା ଯୋଡ଼ା ଥାନା ଅଞ୍ଚଳର ପଞ୍ଚାନନପୁର ଗ୍ରାମରୁ ସାମ୍ନାକୁ ଆସିଛି।ଡାହାଣୀ ଓ ଗୁଣିଗାରେଡ଼ି କରୁଥିବା ସନ୍ଦେହରେ ଜଣେ ମହିଳାଙ୍କୁ ସଂଘବଦ୍ଧ ଭାବେ ମାରଣାତ୍ମକ ଆକ୍ରମଣ କରାଯାଇଥିବା ଅଭିଯୋଗ ଘଟଣାରେ ଶୁକ୍ରବାର ଯୋଡ଼ା ପୁଲିସ ୫ ଜଣଙ୍କୁ ଗିରଫ କରିଛି। ଗିରଫ ପରେ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବାରୁ ଘଟଣାଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଘଟଣାଟି ଯୋଡ଼ା ଥାନା ଅନ୍ତର୍ଗତ ଆସେଇଁକଳା ପଞ୍ଚାୟତର ପଞ୍ଚାନନପୁର ଗ୍ରାମରେ ଘଟିଥିବା ଜଣାପଡ଼ିଛି। ପୁଲିସରେ ଦିଆଯାଇଥିବା ଅଭିଯୋଗ ଅନୁଯାୟୀ, ପ୍ରାୟ ୪ରୁ ୫ ଦିନ ପୂର୍ବେ କୌଣସି ଏକ କାରଣକୁ ନେଇ ୫ ଜଣ ବ୍ୟକ୍ତି ୫୮ ବର୍ଷୀୟା ସରୁ ମୁଣ୍ଡାଙ୍କୁ ଡାହାଣୀ ଓ ଗୁଣିଗାରେଡ଼ି କରୁଥିବା ସନ୍ଦେହ କରିଥିଲେ। ଏହି ସନ୍ଦେହକୁ ନେଇ ପ୍ରଥମେ ତାଙ୍କୁ ଗାଳିଗୁଲଜ କରିବା ସହ ପରେ ସଂଘବଦ୍ଧ ଭାବେ ତାଙ୍କ ଉପରେ ଆକ୍ରମଣ କରାଯାଇଥିବା ପୀଡ଼ିତା ଅଭିଯୋଗ କରିଛନ୍ତି।
ଅଭିଯୋଗ ଅନୁସାରେ, ଆକ୍ରମଣରେ ମହିଳା ଜଣକ ଗୁରୁତର ଭାବେ ଆହତ ହୋଇ ରକ୍ତାକ୍ତ ହୋଇଥିଲେ। ଘଟଣା ପରେ ପୀଡ଼ିତା ସରୁ ମୁଣ୍ଡା ଯୋଡ଼ା ଥାନାରେ ପହଞ୍ଚି ଲିଖିତ ଅଭିଯୋଗ ଦାଖଲ କରିଥିଲେ। ଅଭିଯୋଗକୁ ଆଧାର କରି ଯୋଡ଼ା ପୁଲିସ ମାମଲା ରୁଜୁ କରିବା ସହ ଘଟଣାର ବିଧିବଦ୍ଧ ତଦନ୍ତ ଆରମ୍ଭ କରିଥିଲା।
ତଦନ୍ତ ପ୍ରକ୍ରିୟାରେ ପୁଲିସ ଘଟଣା ସହ ସମ୍ପୃକ୍ତ ଥିବା ଅଭିଯୋଗରେ ପଞ୍ଚାନନପୁର ଗ୍ରାମର ୫ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ବିରୋଜ ମୁଣ୍ଡା (୨୩), ଏମ୍.ଏଲ୍. ତୁରୀ ମୁଣ୍ଡା (୩୧), କ୍ରିଷ୍ଣ ଗାଗରାଇ/ମୁଣ୍ଡା (୨୯), ଗେରାସ ମୁଣ୍ଡା (୩୫) ଓ ଦିଗରାଜ ଗାଗରାଇ/ମୁଣ୍ଡା (୩୫)।
ଏନେଇ ଯୋଡ଼ା ଥାନାରେ କେସ୍ ନମ୍ବର ୨୫୯/୨୦୨୬ ରୁଜୁ ହୋଇଛି। ପୁଲିସ ପକ୍ଷରୁ ଦିଆଯାଇଥିବା ତଥ୍ୟ ମୁତାବକ, ଅଭିଯୁକ୍ତମାନଙ୍କ ବିରୋଧରେ ବିଏନ୍ଏସ୍ର ଧାରା ୩୩୩, ୧୧୫(୨), ୭୪, ୧୦୯(୧), ୩୫୧(୩), ୪୯୩(୫) ସମେତ ଓଡ଼ିଶା ପ୍ରିଭେନସନ୍ ଅଫ୍ ୱିଚ୍ ହଣ୍ଟିଂ ଆକ୍ଟ ଅନୁଯାୟୀ ମାମଲା ରୁଜୁ ହୋଇଛି। ପରବର୍ତ୍ତୀ ଆଇନଗତ ପ୍ରକ୍ରିୟା ଜାରି ରହିଛି।
ଡାହାଣୀ ସନ୍ଦେହ ଭଳି ଅନ୍ଧବିଶ୍ୱାସ କେବଳ ଜଣେ ବ୍ୟକ୍ତିଙ୍କ ସାମାଜିକ ସମ୍ମାନ ଓ ମର୍ଯ୍ୟାଦାକୁ କ୍ଷୁଣ୍ଣ କରେ ନାହିଁ, ବରଂ ଏହା ଅନେକ ସମୟରେ ହିଂସା, ନିର୍ଯାତନା, ସାମାଜିକ ବାସନ୍ଦ ଏପରିକି ଜୀବନହାନିର ମଧ୍ୟ କାରଣ ପାଲଟିଥାଏ। ତେଣୁ ଏଭଳି ଘଟଣାକୁ କେବଳ ଏକ ଅପରାଧିକ ଘଟଣା ଭାବେ ନଦେଖି, ଏହା ପଛରେ ଥିବା ଅନ୍ଧବିଶ୍ୱାସ ଓ କୁସଂସ୍କାରର ମୂଳ କାରଣକୁ ଚିହ୍ନଟ କରିବା ଆବଶ୍ୟକ।
ଗ୍ରାମାଞ୍ଚଳରେ ଅନ୍ଧବିଶ୍ୱାସ ଦୂରୀକରଣ ପାଇଁ ପୁଲିସ ଓ ପ୍ରଶାସନ ସହିତ ସ୍ଥାନୀୟ ଜନପ୍ରତିନିଧି, ଶିକ୍ଷିତ ଯୁବଗୋଷ୍ଠୀ, ସାମାଜିକ ସଂଗଠନ ଓ ସଚେତନ ନାଗରିକଙ୍କ ସମନ୍ୱିତ ପ୍ରୟାସ ଅତ୍ୟନ୍ତ ଆବଶ୍ୟକ। ଡାହାଣୀ କିମ୍ବା ଗୁଣିଗାରେଡ଼ିର ଅଭିଯୋଗକୁ ଆଧାର କରି କୌଣସି ବ୍ୟକ୍ତିଙ୍କ ଉପରେ ହିଂସା କରିବା ଆଇନତଃ ଦଣ୍ଡନୀୟ ଅପରାଧ।
ପଞ୍ଚାନନପୁରର ଏହି ଘଟଣା ଆଧୁନିକ ସମାଜରେ ଅନ୍ଧବିଶ୍ୱାସର ଭୟାବହ ପ୍ରଭାବକୁ ପୁଣିଥରେ ସାମ୍ନାକୁ ଆଣିଥିବା ବେଳେ, ଏଭଳି କୁସଂସ୍କାର ବିରୋଧରେ ତୃଣମୂଳ ସ୍ତରରୁ ବ୍ୟାପକ ସଚେତନତା ସୃଷ୍ଟି ସହ ଆଇନର କଡ଼ା ଅନୁପାଳନ ଜରୁରୀ ହୋଇପଡ଼ିଛି।
ଉର୍ମିଳା ପଣ୍ଡା ଙ୍କ ରିପୋର୍ଟ୍
