ସ୍ୱାଧୀନତା ଦିବସ ପାଳନ ନେଇ ଜୁନାଗଡ଼ରେ ବହୁଜନ ସଂଗ୍ରାମ ସମିତିର ପ୍ରସ୍ତୁତି ବୈଠକ
ଜୁନାଗଡ଼,୧୧/୮.(ମନୀ ସ):ଆସନ୍ତା ସ୍ୱାଧୀନତା ଦିବସକୁ ମହାଆଡ଼ମ୍ବର ତଥା ଉତ୍ସାହର ସହ ପାଳନ କରିବା ନେଇ ଜୁନାଗଡ଼ ବହୁଜନ ସଂଗ୍ରାମ ସମିତି ପକ୍ଷରୁ ଏକ ସ୍ୱତନ୍ତ୍ର ପ୍ରସ୍ତୁତି ବୈଠକ ମଙ୍ଗଳବାର ଜୁନାଗଡ଼ ବସଷ୍ଟାଣ୍ଡସ୍ଥିତ ବାବା ସାହେବ ଡଃ ଭୀମରାଓ ଆମ୍ବେଦକରଙ୍କ ପ୍ରତିମୂର୍ତ୍ତି ସମ୍ମୁଖରେ ଅନୁଷ୍ଠିତ ହୋଇଯାଇଛି। ସମିତିର ସଭାପତି ରଂଜନ କୁମାର ଜାଲଙ୍କ ନେତୃତ୍ୱରେ ଆୟୋଜିତ ଏହି ବୈଠକରେ ଆଗାମୀ ସ୍ୱାଧୀନତା ଦିବସ ପାଳନକୁ ସୁଚାରୁ ଓ ସଫଳ ଭାବେ ସମ୍ପନ୍ନ କରିବା ପାଇଁ ବିଭିନ୍ନ ବିଷୟରେ ଆଲୋଚନା କରାଯାଇଥିଲା। ବୈଠକରେ ସ୍ୱାଧୀନତା ଦିବସର ମହତ୍ତ୍ୱ, ଦେଶର ସ୍ୱାଧୀନତା ପାଇଁ ତ୍ୟାଗ ଓ ବଳିଦାନ ଦେଇଥିବା ମହାନ ବ୍ୟକ୍ତିବିଶେଷଙ୍କୁ ସ୍ମରଣ କରିବା ସହ ବାବା ସାହେବ ଆମ୍ବେଦକରଙ୍କ ସମାନତା, ସାମାଜିକ ନ୍ୟାୟ ଓ ସମ୍ବିଧାନିକ ଅଧିକାରର ବାର୍ତ୍ତାକୁ ସମାଜରେ ପହଞ୍ଚାଇବା ନେଇ ମଧ୍ୟ ମତ ବିନିମୟ ହୋଇଥିଲା। ଆସନ୍ତା କାର୍ଯ୍ୟକ୍ରମକୁ ଶୃଙ୍ଖଳିତ ଓ ଗରିମାମୟ ଭାବେ ପାଳନ କରିବା ପାଇଁ ସମିତିର ସମସ୍ତ କର୍ମକର୍ତ୍ତା ଏକଜୁଟ ହୋଇ କାର୍ଯ୍ୟ କରିବାକୁ ମତ ପ୍ରକାଶ କରିଥିଲେ। ଏହି ଅବସରରେ କାର୍ଯ୍ୟକ୍ରମର ରୂପରେଖା, ଦାୟିତ୍ୱ ବଣ୍ଟନ, ଆୟୋଜନର ବିଭିନ୍ନ ପ୍ରସ୍ତୁତି ଓ ଆଗାମୀ ଦିନରେ କରାଯିବାକୁ ଥିବା କାର୍ଯ୍ୟକ୍ରମ ସମ୍ପର୍କରେ ସଦସ୍ୟମାନେ ନିଜ ନିଜ ମତ ଓ ପ୍ରସ୍ତାବ ରଖିଥିଲେ। ସମସ୍ତଙ୍କ ସହଯୋଗ ଓ ସହଭାଗିତାରେ ସ୍ୱାଧୀନତା ଦିବସ ପାଳନକୁ ସଫଳ କରିବା ପାଇଁ ବୈଠକରେ ସଂକଳ୍ପ ନିଆଯାଇଥିଲା।ଏହି ପ୍ରସ୍ତୁତି ବୈଠକରେ ବହୁଜନ ସଂଗ୍ରାମ ସମିତିର କର୍ମକର୍ତ୍ତା ପୂର୍ଣ୍ଣେନ୍ଦୁ ମାଝୀ (ନିଲୁ), ନରେନ୍ଦ୍ର କ୍ଷିତି, ଉଗ୍ରସେନ କନ୍ଦପାନ, ନେପାଳ ଚନ୍ଦ୍ର ବାଗ, ମିନୁ କନ୍ଦପାନ, ଅଞ୍ଜନ କ୍ଷିତି, ଶରତ ଶବର, ଗୌରାଙ୍ଗ ସୁନା, ଶିବ ମହାନନ୍ଦ, ଘାସିରାମ କ୍ଷିତି, ଲକ୍ଷ୍ମଣ ପୋଡ଼,ଭୋକରଧନ ଧ.ମାଝୀଙ୍କ ସମେତ ଅନ୍ୟାନ୍ୟ କର୍ମକର୍ତ୍ତା ଓ ସଦସ୍ୟମାନେ ଉପସ୍ଥିତ ରହି ଆଗାମୀ କାର୍ଯ୍ୟକ୍ରମର ସଫଳତା ପାଇଁ ନିଜ ନିଜ ମତ ପ୍ରକାଶ କରିଥିଲେ ।
ନରେନ୍ଦ୍ର କ୍ଷିତି ଙ୍କ ରିପୋର୍ଟ୍
