ଚୂଡାନ୍ତ ଭୋଟର ତାଲିକା ପ୍ରକାଶିତ
ରାୟଗଡ ତା ୨୧.୯.୨୦୨୬ ରାୟଗଡା :- ଓଡ଼ିଶା ନିର୍ବାଚନ ଆୟୋଗଙ୍କ ନିର୍ଦ୍ଦେଶ କ୍ରମେ ରାୟଗଡ ନିର୍ବାଚନ ମଣ୍ଡଳୀ ଅନ୍ତର୍ଗତ ୩୪୬ ଗୋଟି ଭୋଟ ଗ୍ରହଣ କେନ୍ଦ୍ର ର ଭୋଟର ତାଲିକା ସୋମବାର ପ୍ରକାଶିତ ହୋଇଛି । ଉପଜିଲ୍ଲାପାଳ ମୃଣାଲିକା ରାଠୋଡ, ସହକାରୀ ଜିଲ୍ଲାପାଳ କୈଳାଶ ଚନ୍ଦ୍ର ସ୍ୱାଇଁ ଓ ପ୍ରଫୁଲ୍ଲ କୁମାର ବେହେରା, ଭାରତୀ ଜେନା, ନିର୍ବାଚନ ବିଭାଗ ସମେତ ସମସ୍ତ କର୍ମକର୍ତ୍ତାଙ୍କ ଉପସ୍ଥିତିରେ ଏହା ପ୍ରକାଶିତ ହୋଇଥିଲା ।
ପ୍ରକାଶ ଥାଉକି ଗତ ୧୭.୫.୨୦୨୬ ଠାରୁ ସ୍ୱତନ୍ତ୍ର ସଘନ ସଂଶୋଧନ ଆରମ୍ଭ ହୋଇଥିଲା । ସେତେବେଳେ ରାୟଗଡ ନିର୍ବାଚନ ମଣ୍ଡଳୀର ଭୋଟର ୨ ଲକ୍ଷ ୫୭ ହଜାର ୩୯୪ ଜଣ ଥିଲେ । ବୁଥ ସ୍ତରୀୟ ଅଧିକାରୀ ଭୋଟର ତାଲିକାର ସମସ୍ତ ଯୋଗ୍ୟ ଭୋଟରଙ୍କୁ ଯାଞ୍ଚ କରିବା ସହ ମୃତ ଓ ସ୍ଥାନାନ୍ତର ଭଳି ଅଯୋଗ୍ୟ ଭୋଟରଙ୍କୁ ବାଦ୍ କରାଯାଇଥିଲା । ବିଭିନ୍ନ ରାଜନୈତିକ ଦଳ ଗୁଡ଼ିକର ସହ ଆଲୋଚନା କରାଯାଇ ପ୍ରତି ବୁଥ ସ୍ତରରେ ବୁଥ ସ୍ତରୀୟ ଏଜେଣ୍ଟ ମାନଙ୍କ ସହଯୋଗରେ ସ୍ୱତନ୍ତ୍ର ସଘନ ସଂଶୋଧନ ହୋଇଥିବା ସହକାରୀ ଜିଲ୍ଲାପାଳ ଶ୍ରୀ ସ୍ୱାଇଁ କହିଛନ୍ତି । ଏସ ଆଇ ଆର୍ ପ୍ରକ୍ରିୟା ସମୟରେ ୯ ହଜାର ୨୩୯ ଜଣ ଅଣ ସଂଯୋଜିତ ଓ ୪୭ ହଜାର ୨୧୮ ଜଣ ତ୍ରୁଟିପୂର୍ଣ୍ଣ ତଥ୍ୟ ଥିବା ଏପରି ମୋଟ ୫୬ ହଜାର ୪୫୦ ଜଣ ଭୋଟରଙ୍କୁ ଶୁଣାଣି ନିମନ୍ତେ ନୋଟିସ ଜାରି କରାଯାଇଥିଲା । ସେଥି ମଧ୍ୟରୁ କାଶୀପୁର ବ୍ଲକରୁ ୧୯ ଜଣ, ରାୟଗଡ ବ୍ଲକରୁ ୧୧ଜଣ o ରାୟଗଡ ପୌରାଞ୍ଚଳର ଜଣେ ଏପରି ୩୧ ଜଣ ଅଯୋଗ୍ୟ ଭୋଟର ଚିହ୍ନଟ କରାଯାଇଥିଲା ।
ଗତ ଜୁଲାଇ ପାଞ୍ଚ ତାରିଖରେ ପ୍ରକାଶିତ ଚିଠା ତାଲିକା ଅନୁସାରେ ୨ ଲକ୍ଷ ୪୧ ହଜାର ୫୬୭ ଜଣ ଭୋଟରଙ୍କ ତାଲିକା ପ୍ରକାଶିତ ହେବା ପରେ ଆପତ୍ତି ଅଭିଯୋଗ ଆହ୍ୱାନ କରାଯାଇଥିଲା । ସୋମବାର ଦିନ ପ୍ରକାଶିତ ଚୂଡାନ୍ତ ତାଲିକାରେ ମୋଟ ୨ ଲକ୍ଷ ୪୨ ହଜାର ୫୬୭ ଜଣ ଭୋଟର ଥିବା ଉପଜିଲ୍ଲାପାଳ ସୁଶ୍ରୀ ମୃଣାଲିକା ପ୍ରକାଶ କରିଛନ୍ତି । ସେଥି ମଧ୍ୟରୁ କାଶୀପୁର ବ୍ଲକରେ ୧ ଲକ୍ଷ ୯୧୧, ରାୟଗଡ ବ୍ଲକ ରେ ୮୫ ହଜାର ୯୧୦ ଓ ରାୟଗଡ ପୌରାଞ୍ଚଳ ରେ ୫୫ ହଜାର ୭୪୮ ଜଣ ଭୋଟର ଅଛନ୍ତି ।
ପ୍ରତି ବୁଥ ସ୍ତରରେ ଚୂଡାନ୍ତ ଭୋଟର ତାଲିକା ପ୍ରକାଶନ ସମୟରେ ଭୋଟର ଉପସ୍ଥିତ ରହି ନିଜ ନାମ ଓ ତଥ୍ୟ ଯାଞ୍ଚ କରିଥିବା ଦେଖିବାକୁ ମିଳିଛି । ରାୟଗଡ ବିଡିଓ ସୁଜିତ୍ କୁମାର ମିଶ୍ର ଉପାନ୍ତ ଦୂର୍ଗାପାଡୁ, ମିରାବାଲି ଓ ପିପଲଗୁଡ଼ା ଗ୍ରାମ ପଞ୍ଚାୟତର ଭୋଟ ଗ୍ରହଣ କେନ୍ଦ୍ର ଗୁଡିକରେ ପ୍ରକାଶନ ସମୟରେ ଉପସ୍ଥିତ ରହି ଭୋଟରଙ୍କ ସହ ଆଲୋଚନା କରିଥିବା ଜଣାପଡ଼ିଛି ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
