ଆବାସସ୍ଥଳକୁ ସଂଯୋଗ କରିବା, ବନ୍ୟଜନ୍ତୁଙ୍କ ସମୃଦ୍ଧି” ବାର୍ତ୍ତାରେ ବନ୍ୟଜନ୍ତୁ ସୁରକ୍ଷା ସଚେତନତା କାର୍ଯ୍ୟକ୍ରମ
ନବରଙ୍ଗପୁର:(ତା. ୨୯.୦୯.୨୦୨୬)(ରବି ନାରାୟଣ ମହାନ୍ତି)ବନ୍ୟଜନ୍ତୁ ସୁରକ୍ଷା, ସେମାନଙ୍କ ପ୍ରାକୃତିକ ଆବାସସ୍ଥଳୀର ସଂରକ୍ଷଣ ଏବଂ ଜୈବ ବିବିଧତାର ସୁରକ୍ଷା ନେଇ ଜନସଚେତନତା ସୃଷ୍ଟି ଉଦ୍ଦେଶ୍ୟରେ ନବରଙ୍ଗପୁର ବନଖଣ୍ଡ ପକ୍ଷରୁ “ଆବାସସ୍ଥଳକୁ ସଂଯୋଗ କରିବା, ବନ୍ୟଜନ୍ତୁଙ୍କ ସମୃଦ୍ଧି” ବିଷୟବସ୍ତୁକୁ ଆଧାର କରି ସ୍ଥାନୀୟ ଖଣ୍ଡିୟ ବନ ଅଧିକାରୀଙ୍କ କାର୍ଯ୍ୟାଳୟ ସ୍ଥିତ ସମିଳନୀ କକ୍ଷ ଠାରେ ଏକ ସଚେତନତା ମୂଳକ କାର୍ଯ୍ୟକ୍ରମ ଆୟୋଜିତ ହୋଇଯାଇଛି।କାର୍ଯ୍ୟକ୍ରମରେ ବନ୍ୟଜନ୍ତୁ ସୁରକ୍ଷା ଓ ସେମାନଙ୍କ ଆବାସସ୍ଥଳୀ ସଂରକ୍ଷଣର ଗୁରୁତ୍ୱ ସମ୍ପର୍କରେ ଆଲୋଚନା କରାଯାଇଥିଲା। ପ୍ରାକୃତିକ ପରିବେଶର ସନ୍ତୁଳନ ବଜାୟ ରଖିବାରେ ବନ୍ୟଜନ୍ତୁଙ୍କ ଭୂମିକା, ଜଙ୍ଗଲ ସୁରକ୍ଷା ଏବଂ ଜୈବ ବିବିଧତା ସଂରକ୍ଷଣର ଆବଶ୍ୟକତା ଉପରେ ଉପସ୍ଥିତ ଅତିଥିମାନେ ଆଲୋକପାତ କରିଥିଲେ।ବନ୍ୟଜନ୍ତୁଙ୍କ ଆବାସସ୍ଥଳୀ ଦିନକୁ ଦିନ ବିଭିନ୍ନ କାରଣରୁ ପ୍ରଭାବିତ ହେଉଥିବା ପରିପ୍ରେକ୍ଷୀରେ ଜଙ୍ଗଲ ଓ ପ୍ରାକୃତିକ ଆବାସସ୍ଥଳୀର ସୁରକ୍ଷା ପାଇଁ ସମନ୍ୱିତ ପଦକ୍ଷେପ ନେବାର ଆବଶ୍ୟକତା ନେଇ ସଚେତନ କରାଯାଇଥିଲା। ବନ୍ୟଜନ୍ତୁଙ୍କ ସୁରକ୍ଷା କେବଳ ବନ ବିଭାଗର ଦାୟିତ୍ୱ ନୁହେଁ, ବରଂ ସ୍ଥାନୀୟ ସମୁଦାୟ, ବନ ସୁରକ୍ଷା ସମିତି ଓ ସାଧାରଣ ଜନତାଙ୍କ ସକ୍ରିୟ ସହଯୋଗ ମାଧ୍ୟମରେ ଏହି ଦାୟିତ୍ୱକୁ ସଫଳତାର ସହିତ ସମ୍ପାଦନ କରାଯାଇପାରିବ ବୋଲି ମତପ୍ରକାଶ କରାଯାଇଥିଲା।
ମାନବ-ବନ୍ୟଜନ୍ତୁ ସହାବସ୍ଥାନ ଉପରେ ଗୁରୁତ୍ୱ
କାର୍ଯ୍ୟକ୍ରମରେ ମାନବ ଓ ବନ୍ୟଜନ୍ତୁଙ୍କ ମଧ୍ୟରେ ସୁସ୍ଥ ସହାବସ୍ଥାନ ସୃଷ୍ଟି ଉପରେ ବିଶେଷ ଗୁରୁତ୍ୱ ଦିଆଯାଇଥିଲା। ବନ୍ୟଜନ୍ତୁଙ୍କ ଆବାସସ୍ଥଳୀ ସୁରକ୍ଷିତ ରଖିବା, ଜଙ୍ଗଲ ନଷ୍ଟ ରୋକିବା ଏବଂ ବନ୍ୟଜନ୍ତୁଙ୍କ ସୁରକ୍ଷା ସମ୍ପର୍କରେ ସ୍ଥାନୀୟ ଲୋକଙ୍କୁ ନିୟମିତ ସଚେତନ କରାଇବା ଦିଗରେ ବିଭାଗୀୟ ପଦକ୍ଷେପ ସମ୍ପର୍କରେ ଅବଗତ କରାଯାଇଥିଲା।ଏଥିସହ ବନ ସୁରକ୍ଷା ସମିତି (VSS) ଓ ସ୍ଥାନୀୟ ସମୁଦାୟର ସହଯୋଗରେ ବନ ସୁରକ୍ଷା କାର୍ଯ୍ୟକୁ ଅଧିକ ଫଳପ୍ରଦ କରିବା, ବନ୍ୟଜନ୍ତୁଙ୍କ ଆବାସସ୍ଥଳୀର ସୁରକ୍ଷା କରିବା ଏବଂ ପରିବେଶ ସନ୍ତୁଳନ ରକ୍ଷା କରିବା ନେଇ ଆଲୋଚନା ହୋଇଥିଲା।
ସାମୂହିକ ସହଭାଗିତା ଉପରେ ଆହ୍ୱାନ
ବନ୍ୟଜନ୍ତୁ ସୁରକ୍ଷା ଓ ପ୍ରାକୃତିକ ସମ୍ପଦର ସଂରକ୍ଷଣରେ ସାଧାରଣ ଜନତାଙ୍କ ସହଭାଗିତା ଅତ୍ୟନ୍ତ ଆବଶ୍ୟକ। ଏଥିପାଇଁ ଗ୍ରାମସ୍ତରରେ ସଚେତନତା ବୃଦ୍ଧି କରିବା, ବନ୍ୟଜନ୍ତୁଙ୍କ ପ୍ରତି ସମ୍ବେଦନଶୀଳ ଆଭିମୁଖ୍ୟ ଗଢ଼ି ତୋଳିବା ଏବଂ ଜଙ୍ଗଲ ସୁରକ୍ଷାରେ ସମସ୍ତଙ୍କୁ ସାମିଲ କରିବା ଉପରେ ଗୁରୁତ୍ୱ ଦିଆଯାଇଥିଲା। ଏହି ଅବସରରେ ପ୍ରକଳ୍ପ ନିର୍ଦେଶକ ଜଳ ବିଭାଜିକା ଚିନ୍ତାମଣି ବେହେରା, ନବରଙ୍ଗପୁରର ଏ.ସି.ଏଫ୍ ସୁବାଷ ଚନ୍ଦ୍ର ଖୁଣ୍ଟିଆ, ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀ ସତ୍ୟ ନାରାୟଣ ପ୍ରଧାନ, ଗ୍ରାମ ବିକାଶ ସଂଗଠନର ଅଧ୍ୟକ୍ଷ ଈଶ୍ୱର ଚନ୍ଦ୍ର ସାବତ, ଫରେଷ୍ଟ ରେଞ୍ଜର ଗୋପୀନାଥ ସାହୁ, ଦେବସ୍ମିତା ସାହୁ, ପୂର୍ଣ୍ଣଚନ୍ଦ୍ର ନନ୍ଦଙ୍କ ସମେତ ବନ ବିଭାଗର କର୍ମଚାରୀ, ବନ ସୁରକ୍ଷା ସମିତିର ସଦସ୍ୟ ଓ ସ୍ଥାନୀୟ ଅଂଶୀଦାରମାନେ ଉପସ୍ଥିତ ଥିଲେ।କାର୍ଯ୍ୟକ୍ରମ ଶେଷରେ ବନ୍ୟଜନ୍ତୁ, ଜଙ୍ଗଲ ଓ ପରିବେଶର ସୁରକ୍ଷା ପାଇଁ ସାମୂହିକ ପ୍ରୟାସ ଜାରି ରଖିବା ସହିତ ଆଗାମୀ ପିଢ଼ି ପାଇଁ ସୁସ୍ଥ ଓ ସନ୍ତୁଳିତ ପ୍ରାକୃତିକ ପରିବେଶ ସୁନିଶ୍ଚିତ କରିବାକୁ ସମସ୍ତଙ୍କୁ ଆହ୍ୱାନ କରାଯାଇଥିଲା।
ନବରଙ୍ଗପୁର ଜିଲ୍ଲାରୁ ରବି ନାରାୟଣ ମହାନ୍ତିଙ୍କ ରିପୋର୍ଟ ମସିହା ନିଉଜ୍
