ବିଶ୍ୱାସ

 

         ବେଣୁଧର ସୂତାର

 

ବିଶ୍ୱାସ ଅଟଇ ଦରଦୀ ହୃଦର

ପବିତ୍ର ପାବକ ଧାର

ବିଶ୍ବାସ ଟି ସିନା ଜୀବନ ସତ୍ତାର

ଅଲିଖିତ ଇସ୍ତାହାର

ସମର୍ପିତ ଜୀବନର

ଜୀବନ ଜୀବିକା ଯୁଗଳ ବନ୍ଦୀର

ଭାବମୟ ଉପହାର ।।

 

ବିଶ୍ୱାସ ଅଟଇ ଜନ ଜୀବନର

ମଙ୍ଗଳ ଆଲୋକ ଦିଶା

ଜୀବନ ବେଦର ରସାଳ ନିର୍ଯ୍ୟାସ

ଅଭାବରେ ଭାବ ମିଶା

ଭିନ୍ନ ଏକ ଉପାଦାନ

ଜୀବନ ଦର୍ଶନ ପୁଣ୍ୟ ପରିଧିର

ମଧୁମୟ ମୂଲ୍ୟାୟନ ।।

 

ବିଶ୍ୱାସଟି ଦିବ୍ୟ ସୌଭାଗ୍ୟମଞ୍ଜରୀ

ମୁକୁଳା ହୃଦୟ ବନେ

ଅମୃତର ଧାରା ଆଶିଷ ପସରା

ଏ ସୃଷ୍ଟିର ଅନୁଦାନେ

ମିଠା ମିଠା ଅନୁରାଗ

ପରିଶୁଦ୍ଧ ମନ ମହତ ଚିନ୍ତନ

ହୃଦୟର ଭାବାବେଗ ।।

 

ସିଦ୍ଧି ସାଧନାର ଜୀବନ ଆଧାର

ଆତ୍ମ ବିଶ୍ୱାସର ସ୍ଥିତି

ବିଶ୍ବାସେ ମିଳଇ ଚିନ୍ମୟ ସତ୍ତାର

ଭାବମୟ ଭବଭୂତି

ବିଶ୍ବାସର ବେଦୀ ତଳେ

ପରମ ପ୍ରୀତିର ପବିତ୍ର ବିଭୂତି

ମିଳେ ସମ୍ବେଦନଶୀଳେ ।।

 

ବିଶ୍ବାସରେ ବନ୍ଧା ଏବିଶ୍ବଜୀବନ

ବିଧି ବିଧାନର ଛଳେ

ଅବିଶ୍ବାସୀ ସିନା ବିଚିତ୍ର ବେଭାରେ

ବିଶ୍ୱାସ ସାଥିରେ ଖେଳେ

ବଢଇ ତା ପାପରାଶି

ଅହଂକାରୀ ମନ ଅନଳ ସମାନ

କୁଳଧର୍ମ ଦିଏ ନାଶି. ।।

 କେଶଦୁରାପାଳ 

   କେନ୍ଦୁଝର