ଲାଞ୍ଜିଗଡ଼ଠାରେ କେନ୍ଦ୍ରମନ୍ତ୍ରୀ ଅର୍ଜୁନ ମୁଣ୍ଡାଙ୍କୁ ଫେରାଦ ହେଲେ ବିସ୍ଥାପିତ ପରିବାର
ଲାଞ୍ଜିଗଡ଼,୧୩/୦୬(ମନିସ)– କଳାହାଣ୍ଡି ଜିଲ୍ଲାର ଏକମାତ୍ର ବୃହତ ଶିଳ୍ପ ପ୍ରକଳ୍ପ ଲାଞ୍ଜିଗଡସ୍ଥିତ ବେଦାନ୍ତ ଲିମିଟେଡ ପକ୍ଷରୁ ଏହାର ପ୍ରକଳ୍ପ ସଂପ୍ରସାରଣ କରାଯାଉଛି । ଏଥିପାଇଁ ଲାଞ୍ଜିଗଡ ପ୍ରକଳ୍ପକୁ ଲାଗି ରହିଥିବା ବନ୍ଧଗୁଡା, ରେଙ୍ଗୋପାଲି ଓ କୋଟଦ୍ୱାର ଗାଁକୁ ବିସ୍ଥାପିତ କରିବାକୁ କଂପାନୀ ତରଫରୁ ପ୍ରକ୍ରିୟା ଆରମ୍ଭ ହୋଇଛି । ତେବେ ବିନା ଅନୁମତିରେ ସଂପ୍ରସାରଣ କାର୍ଯ୍ୟ ଆଗେଇ ଚାଲିଥିବାବେଳେ ସମସ୍ତ ପ୍ରକାର ବିସ୍ଥାପନ ନୀତିକୁ ଉଲ୍ଲଂଘନ କରି କଂପାନୀ ତାର ପ୍ରକଳ୍ପ ସଂପ୍ରସାରଣ କାର୍ଯ୍ୟ ଚଳାଇଥିବା ନେଇ ଅଭିଯୋଗ ଉଠିଛି । ଏପରିକି ଅନେକ ଚାଷୀଙ୍କ ଚାଷଜମି ଓ ସ୍ଥାନୀୟ ବାସିନ୍ଦାଙ୍କ ଜମିକୁ ଅଧିଗ୍ରହଣ କରିଥିବାବେଳେ ଏଥିପାଇଁ ଧାର୍ଯ୍ୟ କ୍ଷତିପୂରଣ ରାଶି ବି ପ୍ରଦାନ କରାଯାଇନଥିବା ଅଭିଯୋଗ ହେଉଛି ।
ଏହିପରି ଭାବେ ତିନୋଟି ଗାଁର ଲୋକଙ୍କୁ ବିସ୍ଥାପନ ପରେ ରହିବା ପାଇଁ ନିୟମଗିରି ବେଦାନ୍ତ ନଗର ସାମ୍ନାରେ ନୂତନ ବିସ୍ଥାପିତ କଲୋନୀ ତିଆରି କରାଯାଉଛି । ତେବେ ଏହି କାମ କରୁଥିବା ଠିକାସଂସ୍ଥା ଅତ୍ୟନ୍ତ ନିମ୍ନମାନର କାମ କରୁଥିବା ନେଇ ଅଭିଯୋଗ କରିଛନ୍ତି ବିସ୍ଥାପିତ ହେବାକୁ ଯାଉଥିବା ରେଙ୍ଗୋପାଲି, ବନ୍ଧଗୁଡା ଓ କୋଟଦ୍ୱାର ଗ୍ରାମବାସୀ । ଆଜି କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଅର୍ଜୁନ ମୁଣ୍ଡାଙ୍କ ଗସ୍ତ ସମୟରେ ସେମାନେ ଲାଞ୍ଜିଗଡଠାରେ ମନ୍ତ୍ରୀଙ୍କୁ ସାକ୍ଷାତ କରି ଏନେଇ ଅଭିଯୋଗ କରିଥିଲେ । ଏହାସହିତ ବେଦାନ୍ତ ଲିମିଟେଡ ସବୁଯାକ ନୀତି ନିୟମକୁ ଉଲ୍ଲଂଘନ କରୁଥିବାବେଳେ ସ୍ଥାନୀୟ ବିସ୍ଥାପିତ ଓ ଅଞ୍ଚଳବାସୀଙ୍କ ସମସ୍ୟା ପ୍ରତି ଆଖି ବୁଜି ଦେଇଥିବା ସେମାନେ ଅଭିଯୋଗ କରିଥିଲେ । ଅଭିଯୋଗ ପତ୍ର ଗ୍ରହଣ କରିବା ସହିତ ମନ୍ତ୍ରୀ ଶ୍ରୀ ମୁଣ୍ଡା ଖୁବ୍ ଶୀଘ୍ର ଏଥିପ୍ରତି ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ ।
ଲାଞ୍ଜିଗଡ଼ ରୁ ସୁଶୀଲ କୁମାର ବାଗ ଙ୍କ ରିପୋର୍ଟ।
