ଡାକନାହିଁ ମୋତେ…
ବାଲାଜି ସେଠୀ
ଡାକନାହିଁ ମୋତେ
ପରବ ନାଆଁରେ
ଖେଳିବାକୁ ରଜଦୋଳି
କେଉଁ ଗଛେ ଦୋଳି
ବାନ୍ଧି ମୁଁ ଖେଳିବି
କଂକ୍ରିଟ ଜଙ୍ଗଲ ତୋଳି ।
କେଉଁ ଗୀତ ଗାଇ
ଝୁଲିବି ଝୁଲଣା
ବନସ୍ତରେ ନାହିଁ ଗଜ
ବିକଳେ ଆସୁଛି
ଜନ ବସତିକୁ
ମରୁଛି ଖାଇ ବାରୁଦ ।
ଆସୁଛି ତ ରଜ
ବରଷକୁ ଥରେ
ଗାଇ ନୁଆଁ ନୁଆଁ ଗୀତି
ଘୋର ବିପତ୍ତିରେ
ଝୁଲା ଝୁଲିବାକୁ
ମନେ ସଂଚାରଇ ଭୀତି ।
କେଉଁ ବସ୍ତ୍ର ପିନ୍ଧି
କରିବି ମଉଜ
ବନ୍ଦ ବଜାର କବାଟ
ମୋ ଭାଇ ଫେରିଛି
ଦୂର ପରବାସୁ
ପିନ୍ଧି ଦାଦନ ମୁକୁଟ ।
ରଜ ପିଠାପଣା
ଅଳପ କରିବି
ସାଇତି ରଖିବି ବିରି
ମନରେ ଆଶଙ୍କା
ଆସନ୍ତା ଋତୁରେ
ପଙ୍ଗପାଳ ଯିବେ ଚରି ।
ରଜ ତ ଆମର
ଓଡ଼ିଆ ପରବ
ମାତୃ ଜାତି ସମର୍ପିତ
ମାତା ବସୁମତୀ
ହୁଏ ଋତୁମତୀ
ପରିପୂର୍ଣ୍ଣେ ଶସ୍ୟ କ୍ଷେତ ।
ଏ ବରଷ ରଜ
ପରବ ପାଳିବି
ମାଆ କୁ ସମ୍ମାନ ଦେଇ
ଜଙ୍ଗଲ ସୁରକ୍ଷା
ପ୍ରାଣୀ କୁଳ ରକ୍ଷା
ବାର୍ତ୍ତା ଖିଲିପାନ ଦେଇ ।।
ଚିତ୍ରକୋଣ୍ଡା, ମାଲକାନଗିରି
