ପୂଜାରିଣୀ
ବେଣୁଧର ସୂତାର
ତୁମେ ମୋ ମନର ଦିବ୍ୟ ସୁରକାର
ପ୍ରଣବ ଓଁକାର ଧ୍ବନି
ମୁଁ ଯେ ମମତାର ମଧୁମତୀ ଧାରା
ତନ୍ମୟୀ ତପସ୍ବୀନୀ
ବ୍ୟାପ୍ତି ଓ ଦୀପ୍ତିର ଅନନ୍ତ ତୃପ୍ତିର
ଅନୁରାଗ ବନ୍ଦୀଶାଳା
ତୁମେ ମୋ ମନର ମଧୁ ସପନର
ଉତ୍ତାଳ ଉର୍ମିମାଳା ।।
ନିତ୍ୟ ସବୁଜ ଏ ଅନ୍ତର ତଳେ
ତୁମେ ପାରିଜାତ ହସ
ବିପୁଳ ଉପାସ୍ୟ ତପସ୍ୟା ବେଦୀର
ଅମୃତର ଅଭିଳାଷ ।।
ତୁମେ ପରା ଭରା ଗଙ୍ଗଶିଉଳିର
ବାସ୍ନା ବିଭୋର ମନ
ରେଶମୀ ରାତିର ସୁନେଲି ସ୍ବପ୍ନ
ମଧୁଝରା ରୂପା ଜହ୍ନ ।।
ସ୍ନେହ ସୋହାଗର ଅମିୟ ପସରା
ପ୍ରୀତିଭରା ଆତ୍ମୀୟତା
ଚିତ୍ରଭାନୁ ତୁମେ ଚଇତି ଚାନ୍ଦର
ତେଜୋଦୀପ୍ତ ତାରୁଣ୍ୟତା ।।
ତୁମେତ ବିଚିତ୍ର ସ୍ବପ୍ନ ଚାରୁଚିତ୍ର
ସୃଷ୍ଟି ସମଷ୍ଟିର ଧାରା
ତୁମରି ପ୍ରେମର ପୀୟୂଷ ପ୍ଳାବନେ
ମୁଁ ଯେ ଆଜି ଆତ୍ମହରା ।।
ମୁଁ ତପଶ୍ଚାରିଣୀ ତୁମ ପୂଜରିଣୀ
ଅୟୁତ ଅତନ୍ଦ୍ର ରାତି
ସମର୍ପି ଦେଇଛି ବଳକା ଆୟୁଷ
ପବିତ୍ର ପ୍ରେମରେ ବିତି ।।
ମୋ ଜୀବନଯଜ୍ଞ ସମାବର୍ତ୍ତେ ତୁମେ
ଯଜ୍ଞାନଳର ହବିଃ
ନିତ୍ୟ ପ୍ରେମମୟ ଭାବକଳ୍ପ ତୁମ
ଚିର ଚନ୍ମୟ ଛବି ।।
ସୁନ୍ଦର ତୁମେ ଶାଶ୍ବତ ତୁମେ
ମୃତ୍ୟୁଞ୍ଜୟ ଧରା ତଳେ
ତୁମରି ଚରଣ ଆଶ୍ରିତା ମୁଁ ଯେ
ପାବନ ପ୍ରଦୀପ ଜାଳେ ।।
କେଶଦୁରାପାଳ କେନ୍ଦୁଝର
