ବର୍ଷା ଆସିଲେ ଆତଙ୍କିତ ହାତୀନଦୀ କୂଳବାସୀ
ନଦୀର ୫୫ କିମି ଉପକୂଳ ଏବେ ବିପଦରେ
କଳାହାଣ୍ଡି ଜିଲ୍ଲାରେ ହାତୀନଦୀ କୁଳ ଲଂଘୁ ଥିବା ଯୋଗୁଁ ବର୍ଷା ଆସିଲେ କୁଳିଆ ଅଧିବାସୀ ମାନେ ଆତଙ୍କିତ ହୋଇ ପଡ଼ନ୍ତି । ବର୍ଷ ବର୍ଷ ଧରି ହାତୀନଦୀ କୂଳରେ ଆଡିବନ୍ଧ ନିର୍ମାଣ ପ୍ରତିଶ୍ରୁତି ପାଣିରଗାର ପାଲଟିଛି । ପ୍ରାୟ ୨୫ ରୁ ଉର୍ଦ୍ଧ୍ବ ଗାଁ କୁଳ ଖାଉଥିବା ଯୋଗୁଁ ଆଗକୁ ଆଡ଼ିବନ୍ଧ ନିର୍ମାଣ ପାଇଁ ପଦକ୍ଷେପ ନନେଲେ ପରିସ୍ଥିତି ଶୋଚନୀୟ ହେବା ଆଶଙ୍କା କରା ଯାଇଛି । 
ଇନ୍ଦ୍ରାବତୀ ପ୍ରକଳ୍ପ କାର୍ଯ୍ୟକାରୀ ହେବାପରେ ନିଷ୍କାସିତ ଜଳ ହାତୀନଦୀରେ ଛଡ଼ାଯିବା ଯୋଗୁଁ ନଦୀ କୁଳିଆ ଆଦିବାସୀଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି । ଗତ ୧୯୯୪ ମସିହାରୁ ହାତୀନଦୀରେ ନିଷ୍କାସିତ ଜଳ ଛଡା ଯାଉଥିବା ଯୋଗୁଁ ବର୍ଷସାରା ଅତ୍ୟଧିକ ପାଣି ବୋହିଥାଏ । ବର୍ଷା ଦିନେ ଇନ୍ଦ୍ରାବତୀର ନିଷ୍କାସିତ ଜଳ ଓ ନାଳ ମାନଙ୍କ ସଂଯୋଗ ଯୋଗୁଁ ହାତୀ ନଦୀରେ ଅତ୍ୟଧିକ ଜଳ ପ୍ରଭାହିତ ହୋଇଥାଏ । ଫଳରେ ପ୍ରତିବର୍ଷ ନଦୀ କୁଳ ଖାଇବାରେ ଲାଗିଛି । ଫଳରେ ନଦୀ ତଟ ବାସୀ ଆତଙ୍କିତ ଅବସ୍ଥାରେ ରହିଥାନ୍ତି ।
ବର୍ତ୍ତମାନ ହାତୀନଦୀ କୂଳରେ ଥିବା ୨୫ରୁ ଉର୍ଦ୍ଧ୍ବ ଗାଁ ର କୁଳ ଖାଉଥିବା ଯୋଗୁଁ ପ୍ରତିବର୍ଷ ମାଟି ଧୋଇ ନେଉଛି । ବର୍ଷା ଦିନେ ନଦୀ କୁଳିଆ ଗ୍ରାମବାସୀ ମାନେ ଆତଙ୍କିତ ଅବସ୍ଥାରେ ରହିଥାନ୍ତି । କୁଳ ଖାଉଥିବା ଯୋଗୁଁ ନଦୀ କୂଳରେ ଥିବା ଅନେକ ଚାଷୀଙ୍କ ଚାଷ ଜମି ହ୍ରାସ ପାଇବାରେ ଲାଗିଛି । ଇନ୍ଦ୍ରାବତୀ ପ୍ରକଳ୍ପର ଶକ୍ତି ଉତ୍ପାଦନ ପରେ ନିଷ୍କାସିତ ଜଳ ପ୍ରତିଦିନ ହାତୀନଦୀରେ ଛଡା ଯାଉଥିବା ଯୋଗୁଁ ଗାଁ ଗୁଡିକର କୁଳ ଏବେ ବିପଜ୍ଜନକ ଅବସ୍ଥାରେ ଅଛି ।
ବନ୍ୟା ଆସିଲେ ରାଜନେତାଙ୍କ ଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ ହାତୀନଦୀ କୁଳିଆ ଗ୍ରାମବାସୀଙ୍କ କଥା ମନେ ପଡେ । କିନ୍ତୁ ବନ୍ୟା ପରେ ଆଡ଼ିବନ୍ଧ ଦାବୀ ସରକାରୀ ଫାଇଲ ଭିତରେ ହଜିଯାଏ । ରାଜ୍ୟ ସରକାର ଏନେଇ ହାତୀ ନଦୀରେ ପ୍ରାୟ ୫୫ କିଲୋମିଟର ନଦୀକୂଳ ଅସୁରକ୍ଷିତ ଥିବା ଯୋଗୁଁ ଆଡ଼ିବନ୍ଧ ନିର୍ମାଣ ଓ ବ୍ୟାପକ ବୃକ୍ଷ ରୋପଣ ପାଇଁ ଠୋସ ପଦକ୍ଷେପ ନନେଲେ ୨୫ ରୁ ଉର୍ଦ୍ଧ୍ବ ଗାଁ ମାନଚିତ୍ରରୁ ନିଜର ଅସ୍ତିତ୍ବ ହରାଇବା ଆଶଙ୍କାକୁ ଏଡାଇ ଦିଆଯାଇ ପାରିବ ନାହିଁ ।
ଚିଲିଗୁଡା ରୁ ସୁନ୍ଦର ମୋହନ ଛତ୍ରିଆ ଙ୍କ ରିପୋର୍ଟ
