ସ୍ଵର୍ଗତ ରଜତ କରଙ୍କ ସ୍ମରଣେ
ବିଶ୍ୱାସ ହେଉନି ରଜତ କରହେ
ଚାଲିଗଲ ଆରପୁରକୁ
ଭାଷା ସହିତ୍ୟର ଅଗ୍ରଣୀ ସେନାଙ୍କୁ
ପ୍ରଭୁ ନେଲେ ନିଜ ପାଖକୁ ॥
ପିତା କୁଳମଣି ମାତା ଇନ୍ଦୁମତୀ
କୋଳକୁ ମଣ୍ଡନ କରିଲ
କଟକ ଜିଲ୍ଲାର ମାହାଙ୍ଗା ଗ୍ରାମର
ନାମ ଯଶ ସବୁ ରଖିଲ ॥
ପଦ୍ମଶ୍ରୀ ବିଦ୍ଵାନ ଭଞ୍ଜ ଗବେଷକ
ଜଗା ସଂସ୍କୃତିର ପ୍ରବକ୍ତା
ନାଟକ ପ୍ରବନ୍ଧ କବିତା ସମୀକ୍ଷା
ସୁସାହିତ୍ୟିକ ସୁବକ୍ତା ॥
ଶିକ୍ଷା ବିଭାଗର ନିର୍ଦ୍ଦେଶକ ଥିଲ
ଉଦ୍ଘୋଷକ ରଥଯାତର
ଯୋଗଜନ୍ମା ତୁମେ ସାହିତ୍ୟ ସାରଥୀ
ସୁପୁତ୍ର ଓଡ଼ିଆ ଜାତିର ॥
କାଳିଆ ସଂସ୍କୃତି ପ୍ରଚାରକ ଥିଲ
ସମୀକ୍ଷକ ଥିଲ ପାଲାର
ଓଡ଼ିଆର ଘରେ ପ୍ରତ୍ୟେକ ହୃଦରେ
ଅଭୁଲା ସ୍ମୃତିକୁ ରଖିଲ ॥
ଅନେକ ସମ୍ମାନ ଅଧିକାରୀ ଥିଲ
ଲୋକ ମଧ୍ୟେ ବିଜ୍ଞ ସଜ୍ଜନ
ତୁମ ଶୂନ୍ୟସ୍ଥାନେ ଝୁରୁଛି ଓଡ଼ିଆ
ଏ ମାଟି ସୁଯୋଗ୍ୟ ସନ୍ତାନ ॥
ଉନିଶ ଚୌତ୍ରିଶି ଅକ୍ଟୋବର ଦୁଇ
ଆସିଥିଲ ଏଇ ଧରାକୁ
ଦୁଇ ହଜାରର ବାଇସି ମଇରେ
ଛାଡ଼ି ଚାଲି ଗଲ ଆମକୁ ॥
ଜନମ ମରଣ ସବୁ ତାଙ୍କ ଖେଳ
କିଏବା କରିବ ବାରଣ
ମହାନ ଆତ୍ମାଙ୍କ ସଦ୍ଗତି ନିମନ୍ତେ
ବିଭୁପାଦେ କରୁ ଜଣାଣ ॥
ରତିନାରାୟଣ ରାଉତ
ହରିଚନ୍ଦନପୁର , କେନ୍ଦୁଝର, ଓଡ଼ିଶା
