ମୋ ଜଗା ଆସିବ
ପ୍ରେମାନନ୍ଦ ବେହେରା
ଆସିବ ଏଥର ମୋ ଜଗା ଆସିବ
ଝୁଲି ଭାଇ ଭଗ୍ନୀ ସାଥେ
ରଥ ଯାତରାରେ ମାଉସୀ ଘରକୁ
ଯିବ ବଡ଼ଦାଣ୍ଡ ପଥେ ।।
ଦେଖିବ ନୟନ ହୋଇବ ପବିତ୍ର
ଖୁସି ଭରା ଅଶ୍ରୁପାତେ
ଆନନ୍ଦେ ମଗନ ହୋଇଯିବି କହି
କଣ୍ଠରେ ହୋ ଜଗନ୍ନାଥେ ।।
ସିଂହ ଦୁଆରରେ ରହିଥିବି ଘେନି
ତୁଳସୀର ମାଳା ହାତେ
ଗଳାରେ ତୁମର ପିନ୍ଧାଇ ଦେବି ହେ
ଭକ୍ତି ଭାବେ ପ୍ରଣିପାତେ ।।
ଗତ ଦୁଇ ବର୍ଷ ଏକା ଏକା ଗଲ
ଠକି ଦେଇଥିଲ ସତେ
ଏ ସନ ଭକତ ଗହଣେ ନାଚିବି
ଭୋଳ ହେବି ତୁମ ଗୀତେ ।।
ଘଣ୍ଟ ବାଜୁଥିବ ମୃଦଙ୍ଗର ତାଳେ
ବସିଥିବ ତୁମେ ରଥେ
ଗଡି ଯାଉଥିବ ପୁଣ୍ୟ ନନ୍ଦିଘୋଷ
ସାରଥୀ ଦାରୁକ ସାଥେ ।।
ଟାଣି ନେଉଥିବେ ଭିଡି ଧରିଥିବେ
ରଥ ଦଉଡିକୁ ହସ୍ତେ
ହରିବୋଲ ସଙ୍ଗେ ଜୟ ଜୟକାର
ଶୁଭୁଥିବ ଭକ୍ତ ମୁଖେ ।।
ତୁମେ ତ ଠାକୁର ଶ୍ରୀପୁରୁଷୋତ୍ତମ
ଦୟା ରଖିଥିବ ଭକ୍ତେ
ଏତିକି ମାଗୁଣି କରିବି ଠାକୁରେ
ଧନ୍ୟ ତୁମ୍ଭେ ଏ ଜଗତେ ।।
ପଦ୍ମପୁର, ବରଗଡ଼
