ରାଜ୍ୟରେ ନିଖୋଜ ଓ ଦୁଷ୍କର୍ମ ମାମଲା ଆସିଥିବା ସଂଖ୍ୟାକୁ ନେଇ ଗୃହରେ ଉତ୍ତର ରଖିଲେ ରାଜ୍ୟ ସ୍ବରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରା:
ରାଜ୍ୟରେ ୨୦୧୯-୨୨ ମସିହା ଭିତରେ ୧୦,୧୨୯ଟି ଦୁଷ୍କର୍ମ ମାମଲା ଆସିଥିବା ସ୍ବରାଷ୍ଟ୍ର ମନ୍ତ୍ରୀ ଙ୍କ ସୂଚନା….
ରାଜ୍ୟ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ରାଜ୍ୟରେ ନିଖୋଜ ଘଟଣା କୁ ନେଇ ଉତ୍ତର ରଖିଛନ୍ତି । ଯେତିକି ସଂଖ୍ୟାରେ ବାଳକ ନିଖୋଜ ହେଉଛନ୍ତି ତାହାର ପ୍ରାୟ ୫ଗୁଣା ବାଳିକା ଓ ପ୍ରାୟ ୨୦ଗୁଣ ମହିଳା ରହିଥିବା କହିଛନ୍ତି ମନ୍ତ୍ରୀ ।
ବିଜେଡି ବିଧାୟକ ପ୍ରଫୁଲ ସାମଲ ପଚାରିଥିବା ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ଦର୍ଶାଇଛନ୍ତି ଯେ, ୨୦୧୯ ମସିହାରେ ରାଜ୍ୟର ୫୩୮ଜଣ ବାଳକ ନିଖୋଜ ହୋଇଥିବା ବେଳେ ୨୬୯୩ ଜଣ ବାଳିକା ଓ ୯୬୮୭ଜଣ ମହିଳା ନିଖୋଜ ହୋଇଥିଲେ । ଏହି ସମୟରେ ନିଖୋଜ ବାଳକଙ୍କ ମଧ୍ୟରୁ ୪୭୭ଜଣଙ୍କୁ ଠାବ କରାଯାଇଥିବା ବେଳେ ଠାବ ହୋଇଥିବା ବାଳିକା ଓ ମହିଳାଙ୍କ ସଂଖ୍ୟା ଯଥାକ୍ରମେ ୨୨୯୮ ଓ ୪୭୯୬ ରହିଥିଲା ।
ସେହିଭଳି ୨୦୨୦ ମସିହାରେ ୩୩୯ ଜଣ ବାଳକ ନିଖୋଜ ହୋଇଥିବା ବେଳେ ୨୫୫୮ଜଣ ବାଳିକା ଓ ୮୯୭୦ଜଣ ମହିଳା ନିଖୋଜ ହୋଇଥିଲେ । ନିଖୋଜ ବାଳକଙ୍କ ମଧ୍ୟରୁ ୨୭୯ଜଣଙ୍କ ପତ୍ତା ମିଳିଥିବା ବେଳେ ଠାବ ହୋଇଥିବା ବାଳିକା ଓ ମହିଳାଙ୍କ ସଂଖ୍ୟା ଯଥାକ୍ରମେ ୨୦୬୧ ଓ ୩୬୭୦ ରହିଥିଲା ।
ଗତବର୍ଷ ଅର୍ଥାତ ୨୦୨୧ରେ ସମଗ୍ର ରାଜ୍ୟରେ ୨୧୯ଜଣ ବାଳକ ନିଖୋଜ ହୋଇଥିବା ବେଳେ ୨୪୫୨ ଜଣ ବାଳିକା ଓ ୭୩୧୬ ଜଣ ମହିଳା ନିଖୋଜ ହୋଇଥିଲେ । ନିଖୋଜ ବାଳକଙ୍କ ମଧ୍ୟରୁ ୧୫୧ଜଣ ଠାବ ହୋଇଥିବା ବେଳେ ଠାବ ହୋଇଥିବା ବାଳିକା ଓ ମହିଳାଙ୍କ ସଂଖ୍ୟା ଯଥାକ୍ରମେ ୧୫୧୨ ଓ ୧୪୫୪ ରହିଥିଲା ।
ସେହିପରି ରାଜ୍ୟରେ ୨୦୧୯-୨୨ ମସିହା ଭିତରେ ୧୦,୧୨୯ଟି ଦୁଷ୍କର୍ମ ମାମଲା ଆସିଛି । ତେବେ ଅପରାଧିକ ମାମଲା ନେଇ ବିଧାୟକ ସନ୍ତୋଷ ସିଂ ସାଲୁଜାଙ୍କ ପ୍ରଶ୍ନର ଉତ୍ତର ରଖିଛନ୍ତି ଗୃହରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରା । ତେବେ ମନ୍ତ୍ରୀ କହିଛନ୍ତି, ରାଜ୍ୟରେ ୨୦୧୯ ମସିହାରୁ ୨୦୨୨ ମସିହା ଭିତରେ ୧୦,୧୨୯ଟି ଦୁଷ୍କର୍ମ ମାମଲା ଆସିଥିବା ବେଳେ ୫୫୮୪ଟି ନାବାଳିକା ଦୁଷ୍କର୍ମ ମାମଲା ଆସିଛି ।
୨୦୧୯ ମସିହାରେ ୨୯୫୦ଟି, ୨୦୨୦ମସିହାରେ ୨୯୮୪ଟି, ୨୦୨୧ମସିହାରେ ୩୩୨୭ଟି, ୨୦୨୨ରେ ୮୬୮ଟି ଦୁଷ୍କର୍ମ ମାମଲା ଆସିଛି । ସେହିଭଳି ୨୦୧୯ରେ ୧୬୩୫ଟି ନାବାଳିକା ଦୁଷ୍କର୍ମ ମାମଲା, ୨୦୨୦ରେ ୧୬୪୬ଟି, ୨୦୨୧ରେ ୧୮୭୧ଟି, ୨୦୨୨ରେ ୪୩୨ଟି ନାବାଳିକା ଦୁଷ୍କର୍ମ ମାମଲା ଆସିଛି । ଏ ଖବର ସାମ୍ନାକୁ ଆସିବା ପରେ ସାରା ରାଜ୍ୟରେ ଏନେଇ ଚର୍ଚ୍ଚା ଜୋର ଧରିବାରେ ଲାଗିଛି ।
ଵିଦ୍ୟାଧର ସାହୁଙ୍କ ରିପୋର୍ଟ…..
