ଢେଙ୍କାନାଳ (ମ.ନି.ସ.)୨୦ା୯: ମାସ ପରେ ମାସ ବିତିବାରେ ଲାଗିଛି। ମାତ୍ର କମ୍ପାନୀ ନିଯୁକ୍ତିକୁ ନେଇ ଟାଳଟୂଳ ନୀତି ଅବଲମ୍ବନ କରୁଛି । ଏହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଢେଙ୍କାନାଳ ଜିଲ୍ଲା ଓଡାପଡା ବ୍ଲକ୍ ଅନ୍ତର୍ଗତ କୁରୁଣ୍ଟିସ୍ଥିତ ବି.ଆର.ଜି.କମ୍ପାନୀକୁ ଅଧିଗ୍ରହଣ କରିଥିବା ରିମଝିମ୍ କାରଖାନାରେ କ୍ଷତିଗ୍ରସ୍ତ ଜମିହରାମାନେ । କାରଖାନାରେ ନିଯୁକ୍ତି ପ୍ରସଙ୍ଗକୁ ନେଇ ମଙ୍ଗଳବାର ସପ୍ତମ ଥର ପାଇଁ ତ୍ରିପାକ୍ଷିକ ବୈଠକ ଜିଲ୍ଲା କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି । କମ୍ପାନୀ ତରଫରୁ ଆଜି ପର୍ଯ୍ୟନ୍ତ ୧୨ ଜଣ ଜମିହରାଙ୍କୁ ନିଯୁକ୍ତି ମିଳିଛି । ଅନ୍ୟ ୫୦ ଜଣଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଥିବା ବେଳେ ସେଠାରେ ଅଧାଲେଖାକୁ ନେଇ ଅସନ୍ତୋଷ ଦେଖାଦେଇଥିଲା । କାରଖାନା କର୍ତ୍ତୃପକ୍ଷଙ୍କ ଏହି ଚାଲବାଜି ଧରାପଡିଯିବା ପରେ ବୈଠକରେ ତୀବ୍ର ନିନ୍ଦା କରାଯାଇଥିଲା । ନିଯୁକ୍ତି ପତ୍ରକୁ ସଂଶୋଧନ କରାଯାଇ ନୂଆ ନିଯୁକ୍ତି ପତ୍ର ପ୍ରଦାନ କରାଯିବାକୁ ଦାବୀ କରାଯାଇଥିଲା । ଅବଶିଷ୍ଟ ୭୯ ଜଣଙ୍କୁ ଆସନ୍ତା ୨୦୨୩ ଜାନୁଆରୀ ମାସ ଶେଷ ସୁଦ୍ଧା ନିଯୁକ୍ତି ଦିଆଯିବ ବୋଲି କମ୍ପାନୀ କର୍ତ୍ତୃପକ୍ଷ ବୈଠକରେ ପ୍ରତିଶ୍ରୁତି ଦେଇଛନ୍ତି । ତେବେ ନିଯୁକ୍ତିକୁ ନେଇ ବାରମ୍ବାର ପ୍ରତିଶ୍ରୁତି ଦେଇ ଖିଲାପ କରୁଥିବା କମ୍ପାନୀର କଥାକୁ କ୍ଷତିଗ୍ରସ୍ତ ପ୍ରଜାମାନେ ଗ୍ରହଣ କରି ନ ଥିଲେ । ଏଥି ସହ କମ୍ପାନୀ ଦେଉଥିବା ନିଯୁକ୍ତି ପତ୍ରରେ କେବଳ ନାମ ଲେଖି ଛାଡି ଦେଉଥିବା ଏବଂ ସମ୍ପୂର୍ଣ୍ଣ ବିବରଣୀ ରହୁନଥିବାରୁ ଉଦବେଗ ପ୍ରକାଶ କରିଥିଲେ । ଶେଷରେ ଜିଲ୍ଲାପାଳ ଓ ପ୍ରଜାସଂଘ ଉପସ୍ଥିତିରେ କମ୍ପାନୀ କର୍ତ୍ତୃପକ୍ଷ ନିଜର ତ୍ରୁଟି ସୁଧାରିବା ସହ ସମୟସୀମା ସୁଦ୍ଧା ଶତ ପ୍ରତିଶତ ନିଯୁକ୍ତିକୁ ନେଇ ଲିଖିତ ରାଜିନାମା ପ୍ରଦାନ କରିଥିବା ଜଣାପଡିଛି । ଜିଲ୍ଲାପାଳ ସରୋଜ କୁମାର ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଢେଙ୍କାନାଳ ବିଧାୟକ ସୁଧୀର କୁମାର ସାମଲ, କ୍ଷତିଗ୍ରସ୍ତ ପ୍ରଜାସଂଘର ସଭାପତି ଗଙ୍ଗାଧର ସାମଲ, ଅତିରିକ୍ତ ଜିଲ୍ଲାପାଳ ଉଦୟ ମହାପାତ୍ର, ରିମଝିମ୍ କମ୍ପାନୀ ମୁଖ୍ୟ ଏମ୍ ପି ସିଂହଙ୍କ ସମେତ କମ୍ପାନୀ କର୍ତ୍ତୃପକ୍ଷ ଓ କ୍ଷତିଗ୍ରସ୍ତ ପ୍ରଜାସଂଘର ପ୍ରତିନିଧି ମଣ୍ଡଳୀ ଉପସ୍ଥିତ ଥିଲେ ।
ଢେ଼ଙ୍କାନାଳ ରୁ ସ୍ଵତନ୍ତ୍ର ପ୍ରତିନିଧି ନାୟକ ଅକ୍ଷୟ ରାଜ ହସ୍ତୀ ଙ୍କ ରିପୋର୍ଟ୍
