ଜହ୍ନରାତି
ରାଗ (ରାମକେରୀ)
କି ସୁନ୍ଦର ଆହା ସଂସାର
ସୁଧା ସିନ୍ଧୁରେଭରା
ବିଧାତାଙ୍କ ସୁନା କଳସ
ପୂର୍ଣ୍ଣ ଶାଶ୍ଵତ ଗରା|୧|
ପ୍ରକୃତିର ଶୋଭା ସଦନ
ତାଙ୍କ ଅପୂର୍ବ ଦାନ
ପ୍ରାଣୀଙ୍କର ପ୍ରାଣ ପେଟିକା
ଚିର ସୁନ୍ଦର ମାନ|୨|
ଆଲୋକ ଅନ୍ଧାର ଭବନ
ଶୋଭା ରାଣୀଙ୍କ ଘର
ରୂପ ବିଭବର ସୁଷମା
ପୂର୍ଣ୍ଣ ସିନ୍ଧୁ ସାଗର|୩|
ଦିନ ରାତି ସଞ୍ଜ ସକାଳ
ଖରା ଛାଇର ଖେଳ
ମେଘ ବାଦଲର ସୁନ୍ଦର
ରୁପ ବିଭବ ମେଳ|୪|
ଶୂନ୍ୟ ସମୀରଣ ଉତ୍ତାପ
ଜଳ ସ୍ଥଳ ଆଧାର
ସେ ସବୁର ରମ୍ୟ ମିଶ୍ରଣ
ରମଣୀୟ ଭଣ୍ଡାର|୫|
ଶୁକ୍ଳ ପକ୍ଷ ଆଉ ପୂର୍ଣ୍ଣିମା
ଅମାବାସ୍ୟାର ଘର
ବିଚିତ୍ର ସୃଷ୍ଟିର ରହସ୍ୟ
ନାହିଁ ତା ପଟାନ୍ତର|୬|
ଜହ୍ନ ରାତି ହେଲେ ବରଷେ
ଧରା ବକ୍ଷରେ ସୁଧା
ତାହା ପାଇଁ ଗର୍ବ ଗୌରବେ
ନୃତ୍ୟ କରେ ବସୁଧା|୭|
ଜହ୍ନ ରାତି ମିଠା ପୀୟୂଷ
ଢାଳେ ଜଗତ ସାରା
ପ୍ରତି ପ୍ରାଣେ ପ୍ରାଣ ସଞ୍ଚରେ
ପ୍ରାଣୀ ପ୍ରାଣ ସାହାରା|୮|
ଜହ୍ନ ରାତି ଦିଏ ମାନବ
ଦେହେ ପ୍ରେମ ପସରା
ରୂପ ଯୌବନର ତରଙ୍ଗ
ସୁଖ ଆନନ୍ଦ ଝରା |୯|
ଜହ୍ନ ରାତି ମିଠା ପୀୟୂଷ
ଦହେ ମନ ଯୌବନ
ଉପବନ ବନ ବୁଲାଏ
କରେ ହୃଦ ଦହନ |୧୦|
ନଦୀ ଝରଣାରେ ଘୁରାଏ
କାମ ପୀଡ଼ାରେ ଦହି
ସଂସାର ବିତୃଷ୍ଣା କରାଏ
ପ୍ରେମ ସାଗରେ ରହି |୧୧|
ବାର ମାସ ବାର ଦିବସ
ହୁଏ ପୂର୍ଣ୍ଣିମା ରାତି
ଶୁକ୍ଳ ପକ୍ଷ ହେଲେ ଆସଇ
ମଧୁର ଜହ୍ନ ରାତି |୧୨|
ପୂର୍ଣ୍ଣିମାର ରମ୍ୟ ମିଶ୍ରଣ
ସିନ୍ଧୁ ବେଳାର ଢେ଼ଉ
ଉଠାଏ ପକାଏ ରସିକେ
ଯୌବନେ ପଦ ଦେଉ |୧୩|
ଜହ୍ନ ରାତି ମିଠା ସପନ
ତନ୍ଦ୍ରା ଭରା କମ୍ପନ
ଜହ୍ନରାତିସୁଧା ବର୍ଷଣ
ମଧୁ ମୟ ମିଳନ |୧୪|
ସଂସାରର ଶ୍ରେଷ୍ଠ ସମ୍ପଦ
ପୀୟୁଷ ଜହ୍ନ ରାତି
ତାଙ୍କୁ ଝୁରି ହୋଇ ଥାଆନ୍ତି
ଯୁବା ପ୍ରେମରେ ମାତି |୧୫|
ଶ୍ରୀ ବିଦ୍ୟାଧର ମହାନ୍ତ ତମ୍ବାହରା
ହରି ଚନ୍ଦନ ପୁର କେନ୍ଦୁଝର
