“ଦାରିଦ୍ର୍ଯ ଭଞ୍ଜନୀ ମାଗୋ କମଳିନୀ”
ଶ୍ଯାମା ପ୍ରସାଦ୍ ବୋଷ୍
ଦାରିଦ୍ର୍ଯ ଭଞ୍ଜନୀ ମାଆ କମଳିନୀ
ସୁଦୟା କରିବ ମୋତେ
ଦାରିଦ୍ର୍ଯ ପୀଡନେ ସୁଖର ସପନେ
ଦୁଃଖ ଦେବ ଆଉ କେତେ ? ।
ନାହିଁ ମୋ ଭକତି ବାନ୍ଧିବା ଶକତି
ମାଗୋ କମଳିନୀ ତୋତେ
ଜାଣେନାହିଁ ତୋର ବ୍ରତ ପୂଜା ବିଧି
ଜାଣେନା ପୂଜିବା ସେତେ ।
ନୁହେଁ ମାଗୋ ମୁହିଁ ଶ୍ରୀୟା ଚଣ୍ଡାଳୁଣୀ
ନାହିଁ ସେ ଭକତି ଭାବ
ସେଥିପାଇଁ କିବା ଦାରିଦ୍ର୍ଯ କଷଣେ
ଭଙ୍ଗା ମୋ ସଂସାର ନାବ ।
ମାର୍ଗଶୀର ମାସ ଗୁରୁବାରେ ମାଗୋ
ସର୍ବ ବିଧି ବିଧାନ ରେ
ଶୁଦ୍ଧ ପୁତ ଚିତ୍ତେ ତୁମରି ପୂଜନେ
ଦାରିଦ୍ର୍ଯ ଟି ଯାଏ ଦୂରେ ।
ହେଲେ ଏ ଅଧମ ବୁଦ୍ଧି ତାର ବାମ
ଜାଣେ ନାହିଁ ପୂଜା ବିଧି
ଦାରିଦ୍ର୍ଯ ପଣରେ ଡାକୁଛି ଚିତ୍ତ ରେ
ମିଳୁ ତୁମ୍ଭ କୃପା ନିଧି ।
ମାଗୋ କମଳିନୀ ସଂସାର ପାଳିନୀ
ଅନ୍ନଦାତ୍ରୀ ଅନ୍ନପୂର୍ଣ୍ଣା
ଦାରିଦ୍ର୍ଯ ଭଞ୍ଜନୀ ଲକ୍ଷ୍ମୀ ଠାକୁରାଣୀ
ଜଗତେ ସ୍ବୟଂ ସଂମ୍ପୂର୍ଣ୍ଣା ।
ମାଆ କମଳିନୀ ଦାରିଦ୍ର୍ଯ ଭଞ୍ଜନୀ
ଆକୁଳେ ଡାକୁଛି ମୁହିଁ
ଜଗତ ଜନନୀ କୃପା ପ୍ରଦାୟିନୀ
ତବ କରୁଣା କୁ ଚାହିଁ ।
ତୁମ୍ଭେ ଦୟା କଲେ ଦାରିଦ୍ର୍ଯ ହଟିବ
ଧନ ଧାନ୍ଯେ ଯିବ ଭରି
ସୁଖ ଶାନ୍ତି ସଦା ବିରାଜ କରିବ
ଦୁଃଖ ମୋର ଯିବ ସରି ।
ଦାରିଦ୍ର୍ଯ ଭଞ୍ଜନୀ ମାଗୋ କମଳିନୀ
ଏତିକି ସୁଦୟା ହେଉ
ତୁମ କୃପା ବଳେ ଦୁଃଖ ଦାରିଦ୍ର୍ଯ ମୋ
ଅଚିରେ ମା ଘୁଞ୍ଚି ଯାଉ ।
ଶ୍ଯାମା ପ୍ରସାଦ୍ ବୋଷ୍
ଗ୍ରାମ :- ବେଗୁନିଁଆ , ମଲ୍ଲୀକ୍ ସାହି
ପୋଷ୍ଟ :- ଗୋପ୍ , ଜିଲ୍ଲା :- ପୁରୀ
