ଜୟପାଟଣା:୨୩/୦୧(ଅନୁପମ ଭାରତ)ରାଜ୍ୟ ସରକାର ସର୍ବଦା ବିକାଶର ଡିଣ୍ଡିମ ପିଟୁଥିବାବେଳେ କେବଳ ହାତଗଣତି କିଛି ସହରକୁ ନୁଆଁ କନିଆଁ ସଜେଇ ଓଡ଼ିଶା କେତେ ସମୃଦ୍ଧ ଦେଖାଇବାକୁ ପ୍ରୟାସ ହେଉଥିବା ଅନୁମାନ କରାଯାଉଛି । କିନ୍ତୁ ତୃଣମୂଳ ସ୍ତରରେ ବିଭିନ୍ନ ଖଣି ଖୋଦାନ ଏବଂ ପ୍ରକଳ୍ପରୁ କୋଟି କୋଟି ଟଙ୍କା ରାଜସ୍ୱ ନେଇ ସେଇ ଅଞ୍ଚଳର ବିକାଶ ନାଁ ରେ ଲଲିପପ ଦେଇ ଲୋକଙ୍କୁ ବୋକା ବନାଉ ଥିବା ବୁଦ୍ଧିଜୀବୀ ମହଲରେ ଅଭିଯୋଗ ହେଉଛି । 
ସେହିପରି ଏକ ଉଦାହରଣ କଳାହାଣ୍ଡି ଜିଲ୍ଲାର ଇନ୍ଦ୍ରାବତୀ ଜଳ ବିଦ୍ୟୁତ ପ୍ରକଳ୍ପ । ସୂଚନାରୁ ଜଣାପଡେ ଏହି ପ୍ରକଳ୍ପରୁ ଦୈନିକ ୬୦୦ ମେଗାୱାଟ ବିଜୁଳି ଉତ୍ପାଦନ ହୋଇ କୋଟି କୋଟି ଟଙ୍କା ରାଜସ୍ୱ ସରକାରଙ୍କୁ ମିଳୁଛି । କିନ୍ତୁ ଦ୍ୱୀପ ତଳ ଅନ୍ଧାର ସଦୃଶ ଯଥା ପୂର୍ବଂ ତଥା ପର ହୋଇ ଏହାର ପାରିପାର୍ଶ୍ବିକ ଉନ୍ନୟନ ହୋଇ ନପାରିବା ଅତ୍ୟନ୍ତ ଦୁର୍ଭାଗ୍ୟଜନକ । ଏହି ପ୍ରକଳ୍ପର ପାଇଁ ଅନେକ ନିରୀହ ଅଧିବାସୀ ଗୃହ ଶୁନ୍ୟ ହୋଇଛନ୍ତି । ତାଙ୍କର ଜମି ବାଡି ହରେଇ ଭିଟାମାଟି ଛାଡିଛନ୍ତି । ସେମାନଙ୍କର ଥଇଥାନ ନାଁ ରେ ଲଲିପପ ଦେଇ ସେମାନଙ୍କୁ ଦବେଇ ଦିଆଗଲା । 
ଭାଗ୍ୟକୁ ଆଦରି ସେହି ବିସ୍ଥାପିତ ମାନେ ମୁଣ୍ଡ ଗୁଞ୍ଜିବା ପାଇଁ ଆଜିଯାଏଁ ବାର ଦୁଆର ହେଉଛନ୍ତି । ଇନ୍ଦ୍ରାବତୀ ଏପରି ମନୋରମ ପାହାଡ଼ ପର୍ବତ ସବୁଜିମାରେ ପରିପୂର୍ଣ୍ଣ ହୋଇଛି କିନ୍ତୁ ଆନ୍ତରିକତାର ଅଭାବ ଯୋଗୁଁ ଏହାର ପାରିପାର୍ଶ୍ବିକ ଉନ୍ନତିର ଅଭାବ ଯୋଗୁଁ ଏକ ସୁରମ୍ୟ ପର୍ଯ୍ୟଟନ ସ୍ଥଳି ହେବାରୁ ଆଜିଯାଏଁ ବାଦ ପଡିଛି । ଏହି ପ୍ରକଳ୍ପର ପରିଚୟ ଦେଇଥିବା ଇନ୍ଦ୍ରାବତୀ ନଦୀର ଉତ୍ପତ୍ତି ସ୍ଥଳ ପ୍ରକୃତିର ଅବଦାନ ସେହି ତିନୋଟି ପବିତ୍ର ଝରଣାର ତିନୋଟି ଧାର ଇନ୍ଦ୍ରାବତୀ ପ୍ରକଳ୍ପ ର ଜନ୍ମ ଦାତ୍ରୀ ଆଜି ନିଜର ପରିଚୟ ପାଇବା କୁ ଅନାଇ ବସିଛି । ବହୁମୁଖୀ ଇନ୍ଦ୍ରାବତୀ ଜଳ ବିଦ୍ୟୁତ ପ୍ରକଳ୍ପ ଆଜି ଓଡିଶାକୁ ବିଶ୍ବ ଦରବାରରେ ପରିଚୟ ଶ୍ରୁଷ୍ଟି କରାଇଛି । କିନ୍ତୁ ପ୍ରକଳ୍ପ ପ୍ରତି ବିଭାଗୀୟ କତ୍ତୃପକ୍ଷ ତଥା ସରକାରଙ୍କର ଉଦାସିନତା ଏହାର ସ୍ଥିରତା ନେଇ ପ୍ରଶ୍ନବାଚୀ ସୃଷ୍ଟି କରିଛି ।
ପର୍ଯ୍ୟଟନ ମାନଚିତ୍ରରେ ଇନ୍ଦ୍ରାବତୀର ଉତ୍ପତ୍ତି ସ୍ଥଳ ସ୍ଥାନ ନପାଇବା ଦୁଃଖ ଦାୟକ । କଳାହାଣ୍ଡି ଜିଲ୍ଲା ଆଦିବାସୀ ଅଧ୍ୟୁଷିତ ବଣ ପାହାଡ ଘେରା ଥୁଆମୂଳ ରାମପୁର ବ୍ଲକ ଅଞ୍ଚଳର ମରଡି ଗୁଡାଗାଁର ଆମ୍ବ ଗଛ ତଳୁ ବାହାରିଥିବା ଝରଣାର ତିନୋଟି ପବିତ୍ର ଧାରା ଯେ ଦିନେ ଏକ ବିଶ୍ବ ପରିଚିତ ପ୍ରକଳ୍ପର ଜନ୍ମ ଦାତ୍ରୀ ହେବ ଓ ଲୋକେ ଉପକୃତ ହେବେ ଭାବିଲେ ଆଶ୍ଚର୍ଯ୍ୟ ହେଲେ ବି ତାହା ଆଜି ବାସ୍ତବ ରୂପ ନେଇଛି । ମହୁଲପାଟଣା ଅଣଓସାରିଆ ଘାଟି ବିପଦଜ୍ଜନକ ଅବସ୍ଥାରେ ରହିବା । ଉପରମୁଣ୍ଡରେ ଜଳ ଧାରଣ ଶକ୍ତି ହ୍ରାସ ପାଇବା ତାହାର ପଙ୍କଉଦ୍ଧାର ହୋଇ ନପାରିବା ଆଗାମୀ ଦିନରେ ପ୍ରକଳ୍ପର ସ୍ଥିରତା ନେଇ ନିଃସନ୍ଦେହରେ ବିପଦ ଶ୍ରୁଷ୍ଟି କରିବ । ତଳମୁଣ୍ଡେ ମଙ୍ଗଳପୁର ବ୍ୟାରେଜର ସ୍ଥିରତାକୁ ନେଇ ମଧ୍ୟ ପ୍ରଶ୍ନବାଚୀ ।ଏହି ପ୍ରକଳ୍ପ ମାଧ୍ୟମରେ କଳାହାଣ୍ଡି ର ଶହ ଶହ ହେକ୍ଟର ଚାଷଜମି ଜଳସେଚିତ ହୋଇ ଏକ ସବୁଜ ବିପ୍ଲବ ସୃଷ୍ଟି କରି ପାରିଛି । କଳାହାଣ୍ଡି ଜିଲ୍ଲା ଦେଶର ଦ୍ଵିତୀୟ ସର୍ବ ବୃହତ ଧାନ ଉତ୍ପାଦନ କରିବାର କୃତିତ୍ୱ ଅର୍ଜନ କରିଛି । ଏହି ପ୍ରକଳ୍ପର ସୁରକ୍ଷା ଓ ସୌନ୍ଦର୍ଯ୍ୟକରଣ ହେଲେ କୋଟି କୋଟି ଜନମାନସରେ ହସ ଫୁଟାଇବ । ଏଣୁ ଏହାର ସୁରକ୍ଷା ଅପରିହାର୍ଯ୍ୟ ।
ଜଗମୋହନ ପଟ୍ଟନାୟକ(ବରିଷ୍ଠ ସାମ୍ବାଦିକ)
