ନର୍ଲା : (ମନିସ)ନର୍ଲା ବ୍ଳକ ସମନ୍ୱୟ ସମିତି ଓ ମା ଭଗବତୀ ପ୍ରଜ୍ଞାମଣ୍ଡଳ ନର୍ଲାରୋଡ ଦ୍ଵାରା ଏକ ବିଶେଷ କାର୍ଯ୍ୟକ୍ରମରେ କଳାହାଣ୍ଡି ଜିଲ୍ଲାର ନବ ନିଯୁକ୍ତ ଜିଲ୍ଲା ସଂଯୋଜକ ତପନ କୁମାର ସାହୁଙ୍କୁ ସ୍ଵାଗତ ସମ୍ବର୍ଦ୍ଧନା ଦିଆଯାଇଥିଲା। ବ୍ଳକ ସମନ୍ୱୟ ସମିତି ସଂଯୋଜକ ମେଦିନୀଧର ଜାନୀ, ସହ ସଂଯୋଜକ ଚକ୍ରଧର ସା, ବରିଷ୍ଠ ପରିଜନ ପର୍ଶୁରାମ ପଣ୍ଡା, ଜହରଲାଲ ବିଶ୍ୱାଳ, ତିର୍ଥବାସୀ ବୁଦ୍ଧିଆ, ଦିଲିପ ମାଝୀ ଏଥିରେ ଉପସ୍ଥିତ ଥିଲେ। ନୂତନ ସଂଯୋଜକଙ୍କୁ ବରିଷ୍ଠ ପରିଜନ ପର୍ଶୁରାମ ପଣ୍ଡା ଓ ମେଦିନୀଧର ଜାନୀ ସ୍ବାଗତ ସମ୍ବର୍ଦ୍ଧନା ଜଣାଇ ନର୍ଲା ଗାୟତ୍ରୀ ପରିବାରର କାର୍ଯ୍ୟଧାରାରେ ଶ୍ରୀ ସାହୁଙ୍କ ଆଗମନ ସାଂଗଠନିକ ଦକ୍ଷତାର ପରିପ୍ରକାଶ ହେବ ବୋଲି ମତପୋଷଣ କରିଥିଲେ। ଏଠାରେ ସୂଚନାଯୋଗ୍ୟ ତପନ କୁମାର ସାହୁ ଗତ ୨୯ ଜାନୁଆରୀରେ ଭବାନୀପାଟଣା ଶକ୍ତିପୀଠରେ ଜିଲ୍ଲା ପୁନଃ ଗଠନ କାର୍ଯ୍ୟକ୍ରମରେ ଜିଲ୍ଲା ସଂଯୋଜକ ଭାବରେ ମନୋନୀତ ହୋଇଥିଲେ। ପରିଶେଷରେ ଶାନ୍ତିପାଠ ସହ କାର୍ଯ୍ୟକ୍ରମର ସମାପନ ହୋଇଥିଲା।
ପ୍ରଦୀପ କୁମାର ଗଉଡ ନର୍ଲା ମସୀହା ପ୍ରତିନିଧି
