ମ.ରାମପୁର,୧୫/୨(ମସୀହା): କଳାହାଣ୍ଡି ଜିଲ୍ଲା ମ.ରାମପୁର ବ୍ଲକ ଅନ୍ତର୍ଗତ ମୋହନଗିରି ସ୍ଥିତ ପ୍ରାଚୀନ ଶୈବପୀଠ ଧବଳେଶ୍ୱର୍ ମନ୍ଦିର ରେ ଜାଗର ମେଳା ଏବଂ ଚଣ୍ଡୀ ପୂଜା ପାଇଁ ଜୋରଦାର ପ୍ରସ୍ତୁତି ଚାଲିଛି l ଏହି ମନ୍ଦିର ଟି ମନ୍ଦିର ମୁଖଶାଳା ଶିଳା ଲିପି ଏବଂ ଐତିହାସିକଙ୍କ ମତରେ ଖ୍ରୀଷ୍ଟୀୟ ୬ଷ୍ଠ ଶତାବ୍ଦୀ ରେ ମୁଦ୍ଗଲ ବଂଶର ରାଜା ଶ୍ରୀସ୍ମିତ ଚନ୍ଦ୍ରଙ୍କ ଦ୍ଵାରା ନିର୍ମିତ ହୋଇଥିବା ଜଣାପଡେ l କିନ୍ତୁ ମନ୍ଦିରଟି ଭଗ୍ନ ଅବସ୍ଥାରେ ପଡ଼ି ରହିଥିଲା l 
ଏହାକୁ ୧୯୩୩ ମସିହାରେ ତତ୍କାଳୀନ ମୋହନଗିରି ଫାଣ୍ଡି ଅଧିକାରୀ ସ୍ବର୍ଗତ କୃତିବାସ ଦଣ୍ଡସେନା ମନ୍ଦିରକୁ ଲୋକଲୋଚନକୁ ଆଣି ଏହାର ପୁନରୁଦ୍ଧାର କରିବାର ନେତୃତ୍ଵ ନେଇଥିଲେ ଏବଂ ଗ୍ରାମବାସୀଙ୍କ ସହଯୋଗରେ ନୂତନ ମନ୍ଦିର ନିର୍ମାଣ କରାଯାଇଥିଲା l ପ୍ରତ୍ନତତ୍ତ୍ଵ ବିଭାଗ ଜରିଆରେ ୧୯୯୮-୯୯ ରେ ମନ୍ଦିର ମୁଖ ଶାଳା ନିର୍ମାଣ କରାଯାଇଛି l 
ମନ୍ଦିର ପରିଚାଳନା ପାଇଁ ଦେବୋତ୍ତର ବିଭାଗ କିଛି ଅର୍ଥ ସହାୟତା ମଧ୍ୟ ଦେଇଛି l ପୁରାତନ ଭଗ୍ନ ମନ୍ଦିର ର ପ୍ରସ୍ତର ଖଣ୍ଡ ଗୁଡିକ ବିକ୍ଷିପ୍ତ ହୋଇ ପଡ଼ି ରହିଛି l ସେଗୁଡିକ ବିଲୁପ୍ତ ହେବାକୁ ବସିଛି l ବର୍ତ୍ତମାନ ଉକ୍ତ ମନ୍ଦିରରେ ଧବଳେଶ୍ଵର ବାବା ପୂଜା ପାଉଛନ୍ତି l ପ୍ରତି ବର୍ଷ ମହାସମାରୋହରେ ସପ୍ତାହ ବ୍ୟାପୀ ଜାଗର ଯାତ୍ରା ପାଳନ କରାଯାଏ l ସୀମାନ୍ତବର୍ତ୍ତୀ ଅଞ୍ଚଳ ହୋଇଥିବାରୁ କଳାହାଣ୍ଡି ଜିଲ୍ଲା ସମେତ କନ୍ଧମାଳ, ବୌଦ୍ଧ, ବଲାଙ୍ଗିର ଜିଲ୍ଲାରୁ ଯାତ୍ରା ସମୟରେ ହଜାର ହଜାର ଭକ୍ତଙ୍କ ସମାଗମ ହୁଏ l ମୂଖ୍ୟତଃ ଆଦିବାସୀ ଏବଂ ପାହାଡିଆ ଅଞ୍ଚଳ ହୋଇଥିବାରୁ ଅନେକ ପାହାଡିଆ ଆଦିବାସୀ ଲୋକମାନେ ଆସିଥାନ୍ତି l 
ସେମାନେ ଦିନେ ଦୁଇ ଦିନ ରହି ଯାତ୍ରା ଦେଖି ନିଜ ଘର କୁ ଫେରନ୍ତି l ମନ୍ଦିର ର ବିଭିନ୍ନ ସମସ୍ୟା ରହିଛି l ଭୋଗ ମଣ୍ଡପ ନାହିଁ , ପାନ୍ଥ ନିବାସ ନାହିଁ, ପାନୀୟ ଜଳ ସୁବିଧା ନାହିଁ କି ବିଦ୍ୟୁତ ସୁବିଧା ମଧ୍ୟ ନାହିଁ l ଏ ବର୍ଷ ଜାଗର ମେଳା ଏବଂ ଚଣ୍ଡୀ ପୂଜା ଆସନ୍ତା ୧୮ ତାରିଖରୁ ଆରମ୍ଭ ହୋଇ ୨୪ ତାରିଖ ପର୍ଯ୍ୟନ୍ତ ମହା ସମାରୋହରେ ପାଳନ କରାଯିବ ବୋଲି ଶ୍ରୀ ଶ୍ରୀ ଧବଳେଶ୍ଵର ମନ୍ଦିର ପରିଚାଳନା କମିଟି, ଦେଉଳିଶୁଲିଆ କର୍ମକର୍ତ୍ତା ସୂଚନା ଦେଇଛନ୍ତି l ସଭାପତି ପୂର୍ଣାନନ୍ଦ ବଗର୍ତ୍ତୀ, ସମ୍ପାଦକ ଶ୍ରୀପତି ଭୋଇ, ସହ ସମ୍ପାଦକ କୁବେର ପଧନ,ଯୁଗ୍ମ ସମ୍ପାଦକ ଅଶ୍ଵତ୍ଥାମା ପୁଟା, ଦାୟିତ୍ଵ ନିର୍ବାହ କରୁଥିବାବେଳେ ଲଳିତ ଥନାପତି, ମାଧୋଇ ଥନାପତି, ଲଡୁକେଶ୍ୱର ଥାନାପତି ମନ୍ଦିର ପୂଜକ ଦାୟିତ୍ୱରେ ଅଛନ୍ତି l ନବୀନ ପଧାନ,ଶୁକଦେବ ସାହୁ,,କପିଳେଶ୍ୱର ସାହୁ, ଲକ୍ଷ୍ମୀକାନ୍ତ ବେହେରା ପ୍ରମୁଖ ଉପଦେଷ୍ଟା ରହିଛନ୍ତି l
ମ ରାମପୁର ରୁ ପରମାନନ୍ଦ ବିଶି ଙ୍କ ରିପୋର୍ଟ
