ଡାବୁଗାଁ, ୧୮/୪ – (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ଚାଟିଗୁଡା ଗ୍ରାମରେ ମଙ୍ଗଳବାର ଅପରାହ୍ନରେ ସ୍ଵାମୀ ମାଡରେ ସ୍ତ୍ରୀ ର ମୃତ୍ୟୁ ଘଟିଛି | ସୂଚନାଯୋଗ୍ୟ:- ଡାବୁଗାଁ ଥାନା ଅଧୀନ ଚାଟିଗୁଡା ଗ୍ରାମର କ୍ଷେତ୍ରୀ ସମରଥ ଓ ତାଙ୍କ ସ୍ତ୍ରୀ ମିଥୁଲା ସମରଥ (୪୩) ଆଜି ଅପରାହ୍ନ ପ୍ରାୟ ୨ ଘ. ସମୟରେ ମଧ୍ୟାନ୍ନ ଭୋଜନ ଖାଇବାକୁ ନେଇ ପାଟିତୁଣ୍ଡ ହୋଇଥିଲେ | ପାଟିତୁଣ୍ଡ ପରେ ସ୍ଵାମୀ କ୍ଷେତ୍ରୀ ହଠାତ ସ୍ତ୍ରୀ ମିଥୁଳା ଙ୍କୁ ଏକ ମୁଥ ମାରିଦେଇଥିଲେ | ମାଡ ମାରିବା ପରେ ମିଥୁଳା ତଳେ 
ପଡିଯାଇଥିଲେ | ତଳେ ପଡିଯିବା ପରେ ମିଥୁଳାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା | ଏହାପରେ ଉକ୍ତ ଖବର ଗ୍ରାମରେ ପ୍ରସାରିତ ହେବାପରେ ଗ୍ରାମବାସୀ କ୍ଷେତ୍ରୀଙ୍କ ଘର ଆଗରେ ଜମା ହୋଇଯାଇଥିଲେ | ଏହାପରେ ମୃତକର ଭାଇ ଖବର ପାଇ ଘଟଣାସ୍ଥଳରେ ପହଞ୍ଚି ଡାବୁଗାଁ ଥାନା କୁ ଖବର ଦେଇଥିଲେ | ଖବର ପାଇ ଥାନା ଆଇଆଇସି ସୁନୀଲ କୁମାର ପ୍ରଧାନ, ସବଇନିସ୍ପେକ୍ଟର ଚନ୍ଦନ ସାହୁ ପ୍ରମୁଖ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଥିଲେ | ପରେ ମୃତକର ଭାଇ ମଦନ ନାୟକ ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲାକୁ ଭିତ୍ତି କରି ଥାନା କେସନଂ ୮୨/୨୩ ରେ ଏକ ମାମଲା ରୁଜୁ କରାଯାଇଛି | ବୁଧବାର ସାଇଣ୍ଟିଫିକ ଦଳ ଆସି ତଦନ୍ତ କରିବା ପରେ ଶବ ବ୍ୟବଚ୍ଛେଦ ପାଇଁ ପଠାଯିବ | ମୃତକର ସ୍ଵାମୀ କ୍ଷେତ୍ରୀ ସମରଥ ଙ୍କୁ ପୋଲିସ ଅଟକ ରଖିଛି |
ଡାବୁଗାଁ ରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
