ଢେଙ୍କାନାଳ, ତା ୨୯,୦୪, ୨୦୬୩ //ଆଜି ପୂର୍ବାହ୍ନରେ ଜିଲ୍ଲାପାଳଙ୍କ କାର୍ଯ୍ୟାଳୟ ସବଭାବନା ସଭାଗୃହଠାରେ ଜିଲ୍ଲାପାଳ ଶ୍ରୀ ସରୋଜ କୁମାର ସେଠାଙ୍କ ଅଧ୍ୟକ୍ଷତାରେ ବାଲ୍ୟ ବିବାହ ବାଳ ଶ୍ରମିକଙ୍କୁ କାର୍ଯ୍ୟରୁ ନିବୃତ କରିବା ଓ ଯୁବତୀ ଚାଲାଣ ରୋକିବା ଉଦ୍ଦେଶ୍ୟରେ ଏକ ସଚେତନତା ବୈଠକ ଅନୁଷ୍ଠିତ ହୋଇଯାଇଛି । କିଶୋର କିଶୋରୀମାନଙ୍କୁ ସ୍ଵାବଲମ୍ବୀ କରାଇ ସେମାନଙ୍କର ସାମଗ୍ରିକ ବିକାଶ ଦିଗରେ ଯବାନ ହେବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି । ଗରିବ ଓ ଅସହାୟ କିଶୋର କିଶୋରୀମାନଙ୍କୁ ଚିହ୍ନଟ କରି ସେମାନଙ୍କୁ ଆଇ.ଟି.ଆଇ, ପଲିଟେକ୍ନିକ୍ ଏବଂ ସ୍କୁଲ ସେଣ୍ଟରରେ ମାଗଣାରେ ପାଠ ପଢା ଓ ପ୍ରଶିକ୍ଷଣ ନିମନ୍ତେ ବ୍ୟବସ୍ଥା କରିବାକୁ ସେ ବିଭାଗୀୟ ଅଧିକାରୀଙ୍କୁ କହିଛନ୍ତି । ବିବାହ ନିମନ୍ତେ ଯେ ଗ୍ୟ ଅନାଥ ଯୁବକ ଯୁବତୀକୁ ଚିହ୍ନଟ କରି ସେମାନଙ୍କର ବିବାହ ନିମନ୍ତେ ଆବଶ୍ୟକ ବ୍ୟବସ୍ଥା କରିବାକୁ ସେ କହିଛନ୍ତି । ଏଥୁ ନିମନ୍ତେ ପ୍ରଶାସନ ପକ୍ଷରୁ ସେମାନଙ୍କୁ ବିବାହ ଖର୍ଚ୍ଚ ନିମନ୍ତେ ୫୦ ହଜାର ତାଙ୍କ ଆର୍ଥିକ ଅନୁଦାନ ମିଳିବ ବୋଲି ସେ ପ୍ରକାଶ କରିଛନ୍ତି । ବାଲ୍ୟ ବିବାହ ଓ ବାଳ ଶ୍ରମିକ ନିଯୋଜନକୁ ବନ୍ଦ କରିବା ଓ ଯୁବତୀ ଚାଲାଣ ରୋକିବା ନିମନ୍ତେ ଅଧିକ ଜନସଚେତନତା ସୃଷ୍ଟି ଦିଗରେ ଗୁରୁତ୍ବ ଦେବାକୁ ପରାମର୍ଶ ଦେଇଛନ୍ତି ।
ଆରକ୍ଷୀ ଅଧୀକ୍ଷକ ଶ୍ରୀ ଜ୍ଞାନ ରଞ୍ଜନ ମହାପାତ୍ର ବୈଠକରେ ଯୋଗଦେଇ, କିଶୋର କିଶୋରୀମାନେ ନିଜେ ସଚେତନ ହେବା ସହିତ ସାଙ୍ଗ ସାଥ୍ମାନଙ୍କୁ ମଧ୍ୟ ଏ ସମ୍ପର୍କରେ ସଚେତନ କରାଇବାକୁ ପରାମର୍ଶ ଦେଇଛନ୍ତି । ପ୍ରଚାର-ପ୍ରସାର ବିଭିନ୍ନ ସଚେତନତା କାର୍ଯ୍ୟକ୍ରମ ଏବଂ ବ୍ୟକ୍ତିଗତ ଉଦ୍ୟମରେ ବାଲ୍ୟ ନିଯୋଜନକୁ ବନ୍ଦ କରିବା ଓ ଯୁବତୀ ଚାଲାଣ ରୋକିବା ମତବ୍ୟକ୍ତ କରିଛନ୍ତି ।
ଏହି ବୈଠକରେ ୟୁନିସେଫର ଜିଲ୍ଲା ସଂଯୋଜିକା ଶ୍ରୀମତୀ ଅଙ୍ଗୁର ମିଶ୍ର ବାଲ୍ୟ ବିବାହ ରୋକାବା ନିମନ୍ତେ ଜିଲ୍ଲାରେ ହେଉଥିବା କାର୍ଯ୍ୟକ୍ରମ ସମ୍ପର୍କରେ ଅବଗତ କରାଇଥିଲେ । ଜିଲ୍ଲାରେ ବିଗତ ୪ ବର୍ଷ ମଧ୍ୟରେ ୧୪୩ ଗୋଟି ବାଲ୍ୟ ବିବାହ ରୋକାଯାଇପାରିଛି ଏବଂ ବିଭିନ୍ନ କାର୍ଯ୍ୟକ୍ରମ ଏବଂ ସଚେତନତା ସୃଷ୍ଟି କରାଯାଇ ଜିଲ୍ଲାକୁ ବାଲ୍ୟ ବିବାହ ମୁକ୍ତ କରାଯିବାକୁ ଉଦ୍ୟମ ଜାରି ରହିଛି ବୋଲି ସେ ପ୍ରକାଶ କରିଛନ୍ତି । ବୈଠକରେ ବାଳ ଶ୍ରମିକ ନିଯୋଜନକୁ କିପରି ପ୍ରତିହତ କରାଯାଇ ସେମାନଙ୍କର ପାଠପଢା ବ୍ୟବସ୍ଥା, ଯୁବତୀ ଚାଲାଣକୁ ରୋକି ସେମାନଙ୍କର ଥଇଥାନ, ଅନାଥ ଓ ଗରିବ ପିଲାଙ୍କ ବିବାହ ଆଦି ସମ୍ପର୍କରେ ବିଷଦ ଆଲୋଚନା ହୋଇଥିଲା । କିଶୋର କିଶୋରୀମାନେ ସହରାଞ୍ଚଳ ଓ ଗ୍ରାମାଞ୍ଚଳରେ, ସାଙ୍ଗସାଥ୍, ସମ୍ପର୍କୀୟମାନଙ୍କୁ କିପରି ବାଲ୍ୟ ବିବାହ ରୋକିବାରେ ସଚେତନ କରାଉଛନ୍ତି ସେ ସମ୍ପର୍କରେ ବର୍ଣ୍ଣନା କରିଥିଲେ ।
ଏହି ବୈଠକରେ ଅତିରିକ୍ତ ଜିଲ୍ଲାପାଳ ଶ୍ରୀ ଉଦୟ କୁମାର ମହାପାତ୍ର ( ରାଜସ୍ଵ ), ଚାଇଲ୍ଡ ୱେଲଫେୟାର କମିଟିର ଚେୟାରମ୍ୟାନ ଶ୍ରୀ ପୁଷ୍ପକ ତ୍ରିପାଠୀ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ଶ୍ରୀମତୀ ଅନୁରାଧା ଗୋସ୍ବାମୀ, ଜିଲ୍ଲା ଶ୍ରମ ଅଧିକାରୀ ଶ୍ରୀ ସତ୍ୟନାରାୟଣ ଆଚାର୍ଯ୍ୟ, ଜିଲ୍ଲା ସମାଜ ମଙ୍ଗଳ ଅଧିକାରୀ ଶ୍ରୀମତୀ ପୂର୍ଣ୍ଣମାସୀ ସାହୁ, ସମ୍ପୃକ୍ତ ବିଭାଗୀୟ ଅଧିକାରୀ, ଜିଲ୍ଲାର ସମସ୍ତ ସିଡିପିଓ, ବିଭିନ୍ନ ମହାବିଦ୍ୟାଳୟ ଓ ବିଦ୍ୟାଳୟର କିଶୋର କିଶୋରୀ ଯୋଗଦେଇଥିଲେ ।
ଶୁଭମ୍ ପାଣି ଙ୍କ ରିପୋର୍ଟ
