ଜାଗରଣ
ନଳିନୀ ପ୍ରଭା ମିଶ୍ର
ଜାଗରଣ ତୁମେ! ସୁପ୍ତ ଶିରାରେ
ପ୍ରବାହିତ ରକ୍ତ ସ୍ରୋତ
ତୁମେ ଜାଗରଣ ବିଦ୍ରୋହ ପଥେ
ଏକାନ୍ତ ଅମୋଘ ଅସ୍ତ୍ର।
ଜାଗରଣ ତୁମେ କଙ୍କାଳ ର କଥା
ସମ୍ମିଳିତ ପଦ ଧ୍ବନି
ତୁମେ ଜାଗରଣ ଉତ୍ତପ୍ତ ଲାଭା
ପ୍ରଜ୍ବଳିତ ଉଷ୍ମ ବହ୍ନି।
ଜାଗରଣ ତୁମେ ଅତୀତ ଚେତନା
ଯୁଗ ପ୍ରବର୍ତ୍ତକ ଧାରା
ପରିବର୍ତ୍ତନ ର ଚରମ ସୀମାରେ
ମୁକ୍ତ କର ଅନ୍ଧ କାରା।
ଜାଗରଣ ତୁମେ ବିକ୍ଷୁବଧ ମନର
କ୍ଷୋଭର ନିଦର୍ଶନ
ତୁମେ ଜାଗରଣ ରଣ ହୁଙ୍କାର
ବୀରତ୍ବର ଶଙ୍ଖ ସ୍ଵନ।
ଜାଗରଣ ତୁମେ ନବ ଉନ୍ମେଷ ର
ନବୀନ ଅଭ୍ୟୁଦୟ
ତୁମେ ଜାଗରଣ ସମୟ ଫଳକେ
ତରୁଣ ସୂର୍ଯ୍ୟୋଦୟ।
ଜାଗରଣ ତୁମେ ବୁଭୁକ୍ଷୁ ମଣିଷ
ଶୁଷ୍କ ଜବର ଚିରି
ଜାଗ୍ରତ କର ନିଃସ୍ଵତା ର ଛବି
ଶତ ସିଂହ ବଳ ଭରି।
ଜାଗରଣ ତୁମେ ଏକତାର ମନ୍ତ୍ର
ଜାତି ପ୍ରେମ କର୍ଣ୍ଣ ଧାର
ଇତିହାସ ପୃଷ୍ଠା କର ବିମଣ୍ଡିତ
ହୋଇ ଏକ ସ୍ଵର୍ଣ୍ଣାକ୍ଷର।
ମୁକୁନ୍ଦ ପୁର, ଆସ୍କା, ଗଞ୍ଜାମ
