ତମେ ଗଲାପରେ
କାଙ୍ଗାଳୀ ଚରଣ ସେଠୀ
ତମେ ଗଲାପରେ ଅବିର ଫଗୁଣ
ଅର୍ଦ୍ଧଦଗ୍ଧ ମୋର ତନୁ
ଅକାଳ ମୃତ୍ୟୁକୁ ଆବୋରି ନେଇଛି
ଚିନ୍ତାମଗ୍ନ ସେଇ ଦିନୁ ।
କୋହରେ କାନ୍ଦୁଛି କୃଷ୍ଣଚୁଡା ଏଠି
ଲୁହରେ ଯାଇଛି ଭିଜି
ରଙ୍ଗ ହରା ରାତ୍ରୀ ରଜନୀଗନ୍ଧାର
କରବୀ ପାରୁନି ମଜି ।
ରକ୍ତଚନ୍ଦନରେ ରଙ୍ଗେଇ ପାରୁନି
ଜ୍ୟୋତ୍ସ୍ନା ଭରା ମଧୁରାତି
ଛାତିରେ ଚାପିଛି ତମରି ସ୍ମୃତିକୁ
ବୟସ ଯାଉଛି ବିତି ।
ଅଧୁରା ରହିଲା ପ୍ରଣୟ ପିଆଲା
ଅଧର ହେଲାଣି ମନ
ଶୁଭୁନାହିଁ ଆଉ ଶୁଭିବ ନାହିଁଟି
ଚୁତ ଡ଼ାଳେ ପିକ ସ୍ଵନ ।
ଘାଣ୍ଟି ହେଉଥିବି ଘଟଣା ଚକ୍ରରେ
ପିଣ୍ଡେ ଯେବେ ପ୍ରାଣ ଥିବ
କଥା ଦେଇକଥା ରଖିବ ନା ସତେ
କେବେ ତମେ ଲେଉଟିବ ?
ଯାଜପୁର
