ଖୋଲିବ ପାଇଖାନା ଦୁର୍ନୀତି ଫାଇଲ କାଗଜପତ୍ର ସଂଗ୍ରହ କଲା ଭିଜିଲାନ୍ସ
ନବରଙ୍ଗପୁର:(ତା ୦୫/୦୭)(ରବି ନାରାୟଣ ମହାନ୍ତି)-ସ୍ୱଚ୍ଛ ଭାରତ ମିଶନରେ ପାଇଖାନା ଦୁର୍ନୀତିର ଫାଇଲ ଖୋଲିବ |ଏହି ମହାଦୁର୍ନୀତିର କିଙ୍ଗପିନଙ୍କ ମୁଖା ଖୋଳତାଡ଼ ଆରମ୍ଭ କରିଛି ଭିଜିଲାନ୍ସ |ଏଥିପାଇଁ ଆଜି ଝରୀଗାଁ ବ୍ଲକରୁ ଯୋଜନାର ଫାଇଲ ସଂଗ୍ରହ କରିଛି ଭିଜିଲାନ୍ସ |ନବରଙ୍ଗପୁର ଜିଲ୍ଲାରେ ପାଇଖାନା ନିର୍ମାଣରେ ପ୍ରାୟ ୧୦୦କୋଟି ଟଙ୍କାର ମହାଦୁର୍ନୀତି ହୋଇଥିବା ଅଭିଯୋଗ ହୋଇଥିଲା |ପୂର୍ବତନ ସାଂସଦ ପ୍ରଦୀପ ମାଝୀ କଂଗ୍ରେସ ଥିବା ସମୟରେ ଏହି ଦୁର୍ନୀତିକୁ ପ୍ରମୁଖ ମୁଦ୍ଦା କରିଥିଲେ |୨୦୨୩ମସିହା ପଞ୍ଚାୟତ ନିର୍ବାଚନ ପୂର୍ବରୁ ପ୍ରଦୀପ ବିଜେଡିରେ ଯୋଗଦେବା ପରେ ବି ଏହି ଦୁର୍ନୀତି ପଛର 
କାର୍ପଟଦାରଙ୍କୁ ଧରିବା ପାଇଁ ଦାବୀ କରିଥିଲେ |ବଡ଼ ପ୍ରସଙ୍ଗ ଓ ଜନଆକ୍ରୋଶ ଚାପ ପଡିବାରୁ ପ୍ରଶାସନ ଏହି ଦୁର୍ନୀତିର ବିଭାଗୀୟ ତଦନ୍ତ କରିଥିଲା |ତତ୍କାଳୀନ ଝରୀଗାଁ ବିଡ଼ିଓ ବାହାଦୁର ସିଂ ଧରୁଆ, ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ଯନ୍ତ୍ରୀ ଦେବବ୍ରତ ଦାସ ଓ ବ୍ଲକ କନିଷ୍ଠ ଯନ୍ତ୍ରୀ ସୁନୀଲ କୁମାର ସାମଲ ନିଲମ୍ବିତ ହୋଇଥିଲେ |ଏହାପରେ କେବଳ ଝରୀଗାଁ ନୁହଁ ରାଇଘର, କୋଷାଗୁମୁଡା, ଉମରକୋଟ ଓ ପାପଡାହାଣ୍ଡି ବ୍ଲକରେ ମଧ୍ୟ ତଦନ୍ତ ପାଇଁ ଦାବୀ ହୋଇଥିଲା |ତେଣୁ ଭିଜିଲାନ୍ସ ପକ୍ଷରୁ ତଦନ୍ତ ଆରମ୍ଭ କରି କିଛି ବ୍ଲକରୁ ଫାଇଲ ସଂଗ୍ରହ କରାଯାଇଥିଲା |କିନ୍ତୁ ଭିଜିଲାନ୍ସ ତଦନ୍ତ ରିପୋର୍ଟ ଲୋକଲୋଚନକୁ ଆସି ପାରିଲାନାହିଁ |ପ୍ରାୟ ଦୁଇବର୍ଷ ଧରି ତଦନ୍ତ କୋମା ସ୍ଥିତିରେ ରହିଥିଲା |କିଛିଦିନ ତଳେ “ଶୀତଳ ଭଣ୍ଡାର”ରେ ୧୦୦କୋଟି ଟଙ୍କାର ପାଇଖାନା ଦୁର୍ନୀତି ଖବର ଗଣମାଧ୍ୟମରେ ପ୍ରକାଶ ପାଇବାରୁ ଭିଜିଲାନ୍ସ ପୁଣି ତତ୍ପରତା ପ୍ରକାଶ କରିଛି |ନବରଙ୍ଗପୁର ଭିଜିଲାନ୍ସ ବିଭାଗ ଆଜି ଝରୀଗାଁ ବ୍ଲକ କାର୍ଯ୍ୟାଳୟରୁ ପାଇଖାନା ଫାଇଲ ସବୁ ସଂଗ୍ରହ କରିଛି |କେବଳ ଝରୀଗାଁ ବ୍ଲକ ନା ସାରା ଜିଲ୍ଲାରେ ଏଭଳି ତଦନ୍ତ ହେବ ତାହା ସ୍ପଷ୍ଟ ହୋଇପାରିନି |ବରିଷ୍ଠ ବିଜେଡି ନେତା ପ୍ରଦୀପ ମାଝୀଙ୍କ କହିବା ପ୍ରକାରେ ଜିଲ୍ଲାରେ ପ୍ରାୟ ୩୦୦କୋଟି ଟଙ୍କାର ପାଇଖାନା ଦୁର୍ନୀତି ହୋଇଛି |ତେଣୁ ଭିଜିଲାନ୍ସ ସାରା ଜିଲ୍ଲାରେ ଦୁର୍ନୀତିର ତଦନ୍ତ କରିବାକୁ ସେ ଦାବୀ କରିଛନ୍ତି |
ମସିହା ନିୟୁଜ୍ ସର୍ଭିସ୍
