ଅନୁସୂଚିତ ଜନଜାତି ଓ ଜାତି ଉନ୍ନୟନ ବିଭାଗ ରୋଷେୟା ଏବଂ ସେବାୟତ ସଂଘର ମନ୍ତ୍ରୀଙ୍କୁ ଦାବିପତ୍ର ପ୍ରଦାନ
ଡାବୁଗାଁ, ୮/୭ (ମ.ନି.ସ.)- ନବରଙ୍ଗପୁର ଓ କୋରାପୁଟ ଜିଲାରୁ ମିଳିତ ଭାବେ ଅନୁସୂଚିତ ଜନଜାତି ଓ ଜାତି ଉନୟନ୍ନ ସଂଖ୍ୟାଲଘୁ ସମ୍ପ୍ରଦାୟ ଓ ପଛୁଆ ବର୍ଗ କଲ୍ୟାଣ ବିଭାଗ ଦ୍ଵାରା ପରିଚାଳିତ ବିଦ୍ୟାଳୟ ମାନଙ୍କରେ କାର୍ଯ୍ୟରତ ୪୦ରୁ ଊର୍ଦ୍ଧ୍ଵ ରୋଷେୟା ଏବଂ ସେବାୟତ ମାନେ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା, ଅନୁସୂଚିତ ଜନଜାତି ଓ ଜାତି ଉନ୍ନୟନ ବିଭାଗ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଙ୍କୁ ଏକ ଦାବିପତ୍ର ଉମରକୋଟ ସ୍ଥିତ ବାସଭବନରେ ସୋମବାର ପ୍ରଦାନ କରିଛନ୍ତି | ଆଜକୁ ଦୀର୍ଘ ୩୦ ବର୍ଷ ଅର୍ଥାତ ୧୯୯୩ ମସିହାରୁ ରୋଷେୟା ଓ ସେବାୟତ ମାନେ ବିଭାଗ ଅଧୀନ ବିଦ୍ୟାଳୟ ଗୁଡିକରେ ରୋଷେଇ କରି ପିଲା ମାନଙ୍କୁ ୨ ଓଳି ଖାଇବାକୁ ଦେବା ସହ ପିଲା ମାନଙ୍କ ସେବା ଯତ୍ନ ସହ ୨୪ ଘଣ୍ଟା ଉପସ୍ଥିତ ରହି ଦାୟିତ୍ଵ ତୁଲାଇ ଆସୁଛନ୍ତି | କିନ୍ତୁ ପୂର୍ବ ସରକାର ଙ୍କ ଠାରେ ବାରମ୍ବାର ଦାବି ଜଣାଇଥିଲେ ମଧ୍ୟ ସରକାର କର୍ଣ୍ଣପାତ କରୁନଥିବା ମନ୍ତ୍ରୀଙ୍କୁ ଅବଗତ କରିଥିଲେ | ମାସିକ ୧୨ ହଜାର ଟଙ୍କା ଦରମା ଆକାରରେ ପ୍ରଦାନ କରୁଥିବାରୁ ବହୁତ ଦୁର୍ଦିନ ଅବସ୍ଥାରେ ଦିନ କାଟୁଛନ୍ତି | ଦାବୀଗୁଡିକ ହେଲା :- ୧୦ ବର୍ଷରୁ ଉର୍ଦ୍ଧ୍ଵ କାର୍ଯ୍ୟ କରିଥିବା ରୋଷେୟାଙ୍କୁ ସ୍ଥାୟୀ ନିଯୁକ୍ତି ପ୍ରଦାନ, ୧୦ ବର୍ଷରୁ କମ କାମ କରିଥିବା ରୋଷେୟାଙ୍କୁ ମାସିକ ଦରମା ୧୨ ହଜାରରୁ ୨୫ ହଜାର ଟଙ୍କା କୁ ବୃଦ୍ଧି ଓ ସେମାନଙ୍କ କାର୍ଯ୍ୟକାଳ ସମୟରେ ମୃତ୍ୟୁ ହେଲେ ସେମାନଙ୍କ ପରିବାରର ଜଣକୁ ଚାକିରି ଓ ଅନୁକମ୍ପା ରାଶି ୧୦ ଲକ୍ଷ ଟଙ୍କା ପ୍ରଦାନ କରିବା ପାଇଁ ଦାବିପତ୍ରରେ ଉଲ୍ଲେଖ ରହିଛି | ଉକ୍ତ ଦାବୀ ଉପରେ ବିଚାର କରାଯାଇ ପଦକ୍ଷେପ ନିଆଯିବ ବୋଲି ମନ୍ତ୍ରୀ ପ୍ରତିଶ୍ରୁତି ଦେଇଥିଲେ | ଏହି ଦାବିପତ୍ର ପ୍ରଦାନ ସମୟରେ ରାଜେନ୍ଦ୍ର ନାୟକ, ସମାରୁ ରନ୍ଧାରୀ, ତୁଲେଶ୍ଵର ନାୟକ, ରାମାରାଓ ରଥୀଗଣ୍ଡ, ଇନ୍ଦ୍ର ଗଣ୍ଡ, ସୁରେନ୍ଦ୍ର ନାୟକ, ଲକ୍ଷ୍ମୀ ଭତ୍ରା, ସିନ୍ଧୁ ଭତ୍ରା, ଭୀମସେନ ଗଣ୍ଡ, ସମାରୁ ହରିଜନ ଓ ଅନ୍ୟମାନେ ଉପସ୍ଥିତ ଥିଲେ |
ଡାବୁଗାଁ ରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
