ସାମାଜିକ କର୍ମୀ ଭରତ ଚନ୍ଦ୍ର ଦାଶଙ୍କୁ ମିଳିଲା ସମ୍ମାନ ସୂଚକ ଡକ୍ଟରେଟ ଉପାଧି
ସିମୁଳିଆ, ୨୫/୭/୨୪- ମଦର ଟେରେସା ଫିଲାନଥ୍ରୋପିକ ଆସୋସିଏସନର ପ୍ରତିଷ୍ଠାତା, ସଂପାଦକ ତଥା ବିଶିଷ୍ଟ କବି ଭରତ ଚନ୍ଦ୍ର ଦାଶ ଶିକ୍ଷା ଓ ସମାସଜସେବା ପାଇଁ ନୂଆଦିଲ୍ଲୀ ଠାରେ ଭାରତ ସରକାରଙ୍କ ପ୍ରାଧିକୃତ ସଂସ୍ଥା ଆଇକନିକ ପିସ୍ ଆଓ୍ବାର୍ଡ କାଉନସିଲ୍ ଦ୍ବାରା ସମ୍ମାନ ସୂଚକ ଡକ୍ଟରେଟ ଉପାଧି ଲାଭ କରିଛନ୍ତି । ଶ୍ରୀ ଦାଶଙ୍କ ଘର ବାଲେଶ୍ଵର ସିମୁଳିଆ ବ୍ଲକରେ । ଗତ ୨୦ ତାରିଖ ଅପରାହ୍ଣରେ କନ୍ଷ୍ଟିଶ୍ଚ୍ୟୁସନ କ୍ଲବ ଅଫ ଇଣ୍ଡିଆର ସମ୍ମିଳନୀ କକ୍ଷରେ କାଉନସିଲର ସମାବର୍ତ୍ତନ ଉତ୍ସବରେ ଶ୍ରୀ ଦାଶଙ୍କୁ ସମ୍ମାନ ସୂଚକ ଡକ୍ଟରେଟ ଉପାଧି, ଉତ୍ତରୀୟ, ପ୍ରମାଣପତ୍ର, ଫଳକ , ଟ୍ରଫି ଓ ଆଜୀବନ ସଦସ୍ୟ ପଦର ପ୍ରମାଣପତ୍ର ପ୍ରଦାନ କରିଥିଲେ ଭାରତୀୟ ଜନତା ପାର୍ଟିର ବରିଷ୍ଠ କାର୍ଯ୍ୟକର୍ତ୍ତା ତଥା ରାଜ୍ୟସଭା ସାଂସଦ ନରେଶ ବଂଶଲ । ଏହି ସଭାରେ ଅଧ୍ୟକ୍ଷତା କରିଥିଲେ ଆଇକନିକ୍ ପିସ୍ ଆଓ୍ବାର୍ଡ କାଉନସିଲର ଅଧ୍ୟକ୍ଷ ସୁଷମା ଜୀ । ବିଶିଷ୍ଟ ଅତିଥିଭାବରେ ବୌଦ୍ଧ ଧର୍ମର ଆଚାର୍ଯ୍ୟ ୟେଶୀ ଫୁଣ୍ଟଶୋକ୍ ପ୍ରମୁଖ ଊପସ୍ଥିତ ଥିଲେ । ସାମାଜିକ କର୍ମୀ ଶ୍ରୀ ଦାଶ ୧୯୮୬ ମସିହାରେ ନୋବେଲ ପୁରସ୍କାର ବିଜେତା ଭଦର ଟେରେସାଙ୍କୁ ସାକ୍ଷାତ କରି ତାଙ୍କ ଆଶୀର୍ବାଦରେ ଭଦର ଟେରେସା ଫିଲାନଥ୍ରୋପିକ ଆସୋସିଏସନ ପ୍ରତିଷ୍ଠା କରି ଗୁଣ୍ଡୁଚି ମୁଷା ଭଳି ସାମାଜିକ ସେବାକାର୍ଯ୍ୟରେ ନିୟୋଜିତ ଅଛନ୍ତି । ପରିବେଶ ସୁରକ୍ଷା ଦିଗରେ କାର୍ଯ୍ୟ କରି ପ୍ରକୃତିବନ୍ଧୁ ପରସ୍କାର, ଓଡିଶା ସେବାରତ୍ନ ସମ୍ମାନ ସହ ବହୁ ସମ୍ମାନ ଓ ପୁରସ୍କାର ଲାଭ କରିଛନ୍ତି । ଓଡିଆ ଭାଷା ସାହିତ୍ୟ ଶିକ୍ଷଣ ସଂସ୍ଥାନ ‘ ଓଡିଆ ଶ୍ରୀ ‘ ର ସେ ପ୍ରତିଷ୍ଠାତ । ସୃଜନ ଶ୍ରୀକ୍ଷେତ୍ରର ସେ ପ୍ରତିଷ୍ଠାତା ସଚିବ। ଜଣେ ସାରସ୍ବତ ସାଧକଭାବେ ତାଙ୍କର ୧୫ ଟି କବିତା ସଂକଳନ ପ୍ରକାଶ ପାଇଛି । ଓଡିଶା ସାହିତ୍ୟ ଏକାଡେମୀର ପ୍ରାକ୍ତନ ସଦସ୍ୟଭାବେ ସେ ସଫଳତାର ସହ କାର୍ଯ୍ୟକରି ପ୍ରଶଂସିତ ହୋଇଛନ୍ତି । ସେ ଉଚ୍ଚକୋଟୀର ଜଣେ କବି ଭାବେ ଅନେକ ସମ୍ମାନ ଓ ପ୍ରତିଷ୍ଠା ଲାଭ କରିଛନ୍ତି । ସାହିତ୍ୟ ସାଧନା ତାଙ୍କର ପ୍ରବୃତ୍ତି ହୋଇଥିଲା ବେଳେ ବୃତ୍ତିର ସେ ଜଣେ ନିର୍ଭୀକ ସାମ୍ବାଦିକ । ତାଙ୍କୁ ସମ୍ମାନ ସୂଚକ ଡକ୍ଟରେଟ ଉପାଧି ମିଳିବାପରେ ବହୁ ବିଶିଷ୍ଟ ବ୍ୟକ୍ତି ଅଭିନନ୍ଦନ ଜଣାଇଛନ୍ତି ।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
