କବି ଭରତ ଚନ୍ଦ୍ର ଦାଶଙ୍କୁ ମିଳିଲା ” ଆମ ମାଟିର ଗୀତିକବି ସମ୍ମାନ “
ବାଲେଶ୍ବର,୦୫/୮/୨୪- ଉତ୍ତର ଆଧୁନିକ ରୋମାଣ୍ଟିକ ପଦ୍ୟ ସାହିତ୍ୟର ବିଶିଷ୍ଟ ରୂପକାର ତଥା ଓଡିଶା ସାହିତ୍ୟ ଏକାଡେମୀର ବାଲେଶ୍ବର ଜିଲ୍ଲାର ପ୍ରାକ୍ତନ ସଦସ୍ୟ କବି ଡକ୍ଟର ଭରତ ଚନ୍ଦ୍ର ଦାଶଙ୍କୁ ବାଲେଶ୍ବର ପ୍ରଜାପତି ସାହିତ୍ୟ ଶାଖା ଅକ୍ଷରର ଗୁଞ୍ଜରଣ ଗୀତିକବିତା ପର୍ବରେ ” ଆମ ମାଟିର ଗୀତିକବି ସମ୍ମାନ ” ମିଳିଛି । ଗତକାଲି ସଂଧ୍ୟାରେ ଆତିଥ୍ୟ ଭବନରେ ଅନୁଷ୍ଠିତ ଗୁଞ୍ଜରଣ ଗୀତିକବିତା ପର୍ବରେ ପ୍ରଜାପତିର ପ୍ରତିଷ୍ଠାତା କବି ପ୍ରଶାନ୍ତ ଦାସ ପୌରୋହିତ୍ୟ କରିଥିଲେ । ଏଥିରେ ମୁଖ୍ୟ ଅତିଥି ଭାବେ ଡକ୍ଟର ହିମାଂଶୁ ପଣ୍ଡା, ଅନ୍ୟତମ ଅତିଥିଭାବେ ଡକ୍ଟର ଲକ୍ଷ୍ମୀକାନ୍ତ ତ୍ରିପାଠୀ, ଡକ୍ଟର ହରିଶ୍ଚନ୍ଦ୍ର ବେହେରା, ଡକ୍ଟର ଶିରୀଶ କୁମାର ଜେନା, କବି କୃଷ୍ଣ କୁମାର ମହାନ୍ତି ପ୍ରମୁଖ ଯୋଗ ଦେଇ ତାଙ୍କୁ ମାନପତ୍ର, ଉତ୍ତରୀୟ ଓ ଉପଢୌକନ ପ୍ରଦାନ କରି ସମ୍ମାନିତ କରିଥିଲେ । କବି ଡକ୍ଟର ଦାଶ ଦୀର୍ଘ ୪ ଦଶନ୍ଧି ଧରି ସାହିତ୍ୟ ସାଧନା କରୁଛନ୍ତି । ସେ ଶିଳାପ୍ରତ୍ୟୟ , ପ୍ରୀତିପର୍ଣ୍ଣା, ପ୍ରୀତିପୁଷ୍ପ, ପ୍ରୀତିଶସ୍ୟ, ପ୍ରୀତି ସୁଧା, ପ୍ରୀତିଲଗ୍ନା , ପ୍ରୀତିପ୍ରଜ୍ଞା, ପ୍ରୀତିଛନ୍ଦା, ପ୍ରୀତିକଳା, ପ୍ରୀତିଲତା, ପ୍ରୀତିଲେଖା, ପ୍ରୀତିଗନ୍ଧା ପ୍ରୀତିପ୍ରଭା, ପ୍ରୀତିଝର ପ୍ରୀତିନନ୍ଦା ଆଦି ୧୫ ଖଣ୍ଡ କବିତା ସଂକଳନର ରଚୟିତା ଅଟନ୍ତି । ରୋମାଣ୍ଟିକ ଚେତନାର ଅନନ୍ୟ ରୂପକାର ଭାବେ ୨୬ ଶହ ଏକପଦୀ ରଚନା କରି ପ୍ରେମ ଓ ପ୍ରଣୟର କବିଭାବେ ପ୍ରତିଷ୍ଠା ଅର୍ଜନ କରିଛନ୍ତି । ଚେତନା ସାହିତ୍ୟ ସମ୍ମାନ, ଦୀନକୃଷ୍ଣ ସ୍ମୃତି ସଂସଦ, ଜଳେଶ୍ବର ପକ୍ଷରୁ କବିତା ସମ୍ମାନ, ଓଡିଶା ସେବାରତ୍ନ ସମ୍ମାନ ସମେତ ଓଡିଶା ସରକାରଙ୍କ ପ୍ରକୃତି ବନ୍ଧୁ ସମ୍ମାନ, ସୁଲେଖା କବି ସମ୍ମାନ, କବିବର କବିତା ସମ୍ମାନ ଲାଭ କରିଛନ୍ତି । ସୃଜନ ଶ୍ରୀକ୍ଷେତ୍ର, ମଦର ଟେରେସା ଫିଲାନଥ୍ରୋପିକ ଆସୋସିଏସନ, ଓଡିଆ ଭାଷା ସାହିତ୍ୟ ଶିକ୍ଷଣ ସଂସ୍ଥାନ, ଓଡିଆ ଶ୍ରୀ ଆଦି ବହୁ ଅନୁଷ୍ଠାନର ପ୍ରତିଷ୍ଠାତା ଭାବେ ଓଡିଆ ଭାଷା ସାହିତ୍ୟର ବିକାଶ, ପ୍ରଚାର ଓ ପ୍ରସାର ପାଇଁ କବି ଡକ୍ଟର ଦାଶ କାର୍ଯ୍ୟ କରୁଛନ୍ତି । ନିକଟରେ ସେ ସମାଜସେବା ପାଇଁ ନୂଆଦିଲ୍ଲୀରୁ ସମ୍ମାନଜନକ ଡକ୍ଟରେଟ ଉପାଧି ଲାଭ କରିଛନ୍ତି ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
