ପ୍ରଶାନ୍ତ କୁମାର ଶତପଥୀ ଙ୍କ କବିତା ଓଡ଼ିଆ ନୂତନ ବର୍ଷ ଓ ପଣା ସଂକ୍ରାନ୍ତି

ଓଡ଼ିଆ ନୂତନ ବର୍ଷ ଓ ପଣା ସଂକ୍ରାନ୍ତି

 

ପ୍ରଶାନ୍ତ କୁମାର ଶତପଥୀ

ବସନ୍ତର ଶେଷ ଗ୍ରୀଷ୍ମର ପ୍ରବେଶ 

ବର୍ଷର ପ୍ରଥମ ସଂକ୍ରାନ୍ତି, 

ଅତି ହରଷରେ ଆନନ୍ଦ ମନରେ 

ଭକ୍ତିର ଅର୍ଘ୍ୟକୁ ଢାଳନ୍ତି l

ସୂରୁଜ ରୁହନ୍ତି ବିଷୁବ ରେଖାରେ 

ସଉର ମାସ ନାମେ ଖ୍ୟାତ, 

ଓଡ଼ିଆ ଘରରେ ଆନନ୍ଦ ଉତ୍ସବ 

ହୁଏ ଦେବମନ୍ଦିରେ ଯାତ l

ଓଡ଼ିଆ କହୁଛି ମୋ’ର ନବବର୍ଷ 

ହରଷରେ ଆଜି ପାଳୁଛି, 

ପଣାସଂକ୍ରାନ୍ତିର ନାମ ଅଟେ ଏହା 

ପଣାର ବାସନା ହେଉଛି l

ହନୁମାନଙ୍କର ଜୟନ୍ତୀ ପର୍ବରେ 

ମନ୍ଦିରରେ ଭିଡ଼ ଜମୁଛି, 

ମାଆଙ୍କ ମନ୍ଦିରେ ମେରୁ ସଂକ୍ରାନ୍ତିରେ 

ମହ ମହ ଝୁଣା ବାସୁଛି l

ଜଗତର ନାଥ କାଳିଆ ସାଆନ୍ତ

ସଭିଙ୍କର ହିତ ଦେଖୁଛି, 

ମୁରୁକି ମୁରୁକି ସୁନ୍ଦର ହସରେ

ଡୋରିରେ ସଭିଙ୍କୁ ବାନ୍ଧିଛି l

ସକାଳ ସୂର୍ଯ୍ୟଙ୍କ ପହିଲି କିରଣ 

କୋଣାର୍କ ମନ୍ଦିରେ ଦିଶୁଛି,  

ଝକମକ ହୋଇ ନୂତନ ବର୍ଷକୁ 

ସାଦରେ ସ୍ଵାଗତ କରୁଛି l

କାଳିଆ ପାଖରେ ନୂତନ ପଞ୍ଜିକା 

ଶୁଭାରମ୍ଭ ଆଜି ହେଉଛି, 

ଶୁଭାଶୁଭ ସହ ପରବ ପର୍ବାଣୀ

ସଭିଙ୍କୁ ଜଣାଇ ଦେଉଛି l

ଓଡିଆଙ୍କ ଏହି ନୂତନ ବର୍ଷରେ 

ସନ୍ଦେଶ ଆଜି ମୁଁ ଦେଉଛି, 

ଓଡ଼ିଶାର ଟେକ ସଭିଏଁ ରଖିବା  

ମାଆର ସମ୍ମାନ ରହିଛି l

ଛତ୍ରପୁର, ଗଞ୍ଜାମ