ଏ ଫଗୁଣେ ତୁମେ
ତୁମେ ଫଗୁଣର ପ୍ରୀତି ପାଖୁଡାରେ
ସମର୍ପିତ ମଧୁ ବୁନ୍ଦା
ଭିଜା ଅନୁଭବେ ବାସ୍ନାୟିତ କ୍ଷଣ,
ଚେତନାର ଚାରୁ ସନ୍ଧ୍ୟା
ଯା’ ସାଥେ ଏ ପ୍ରାଣ ବନ୍ଧା
ତୁମେ ମୋର ସେଇ ଶେଷ ବସନ୍ତର
ଉଛୁଳା ଅଳକାନନ୍ଦା
ତୁମେ ପଳାଶର ପହିଲି ହସରେ
ମଳୟର ନିମନ୍ତ୍ରଣ
ତରୁ ତରୁଣୀର ରକ୍ତିମ ଆଭାରେ
ଜୀବନର ଆକର୍ଷଣ
ପାଟ ପାରି କିଆବଣ
ଚୋରା ଚଇତାଳି ପହିଲି ଭେଟରେ
ଫଗୁଣର ଶେଷ ରାଣ
ଆଶା ନଈଧାରେ ଅଳସୀ ବାଆର
ଅସରନ୍ତି ଅନୁରୋଧ
ଚକଟା କାଦୁଏ ତୁମ ପାଦଚିହ୍ନ
ସ୍ମୃତିର ସରଳ ସୁଧ
ହେଇ ନାହିଁ ପରିଶୋଧ
ଆଜିବି କାହିଁକି ଅବୁଝା ହିସାବ
ବୁଝେନା ମନ ଅବୋଧ