ନିର୍ମାଣର ବର୍ଷେ ହୋଇନି ରାସ୍ତାରୁ ଉଠିଲା ପିଚୁ ଓ ଚିପ୍ସ, ନିମ୍ନ ମାନର କାର୍ଯ୍ୟ ଅଭିଯୋଗ
ରାୟଗଡା /କୋଲନରା ବ୍ଲକ ଅନ୍ତର୍ଗତ କାଟିକଣା ଗ୍ରାମ ପଞ୍ଚାୟତର ଲେପଣା ଛକ ଠାରୁ ପେହେଲା ଗାଁ ପର୍ଯ୍ୟନ୍ତ ନିର୍ମାଣ କରାଯାଇଥିବା ଆରଡି ରାସ୍ତା ନିମ୍ନ ମାନର କାର୍ଯ୍ୟ ଯୋଗୁଁ ନିର୍ମାଣର ବର୍ଷେ ବି ହୋଇନି ରାସ୍ତାରୁ ପିଚୁ ଓ ଚିପ୍ସ ଉଠି ପଡ଼ିଥିବା ଦେଖିବାକୁ ମିଳିଛି | ଠିକାଦାର ଜଣକ ନିଜ ମନମୁଖୀ ନିମ୍ନ ମାନର କାର୍ଯ୍ୟ କରି ଚାଲି ଯାଇଥିବା ହେତୁ ରାସ୍ତା ଏବେ ନଷ୍ଟ ହେବାକୁ ବସିଲାଣି ବୋଲି ଲୋକେ ଅଭିଯୋଗ କରିଛନ୍ତି | ଏମିତିକି କେଉଁ ଯୋଜନାରେ ଉକ୍ତ ରାସ୍ତା ନିର୍ମାଣ କରାଗଲା ଆଜି ପର୍ଯ୍ୟନ୍ତ ତାହାର ସୂଚନା ଫଳକ ମଧ୍ୟ ଲଗାଯାଇ ନାହିଁ | ରାସ୍ତା ନିର୍ମାଣ ସମୟରେ ବିଭାଗୀୟ ଅଧିକାରୀଙ୍କ ରାସ୍ତାର ମାନ ତଦାରଖର ଅଭାବ ଯୋଗୁଁ ଏଭଳି ସମସ୍ୟା ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି | ସୂଚନା ମୁତାବକ, ପେହେଲା ଓ ଲେପଣା ଗ୍ରାମବାସୀ ରାସ୍ତା ନ ଥିବା ହେତୁ ଯିବା ଆସିବାରେ ବହୁତ ଅସୁବିଧାର ସମ୍ମୁଖୀନ ହେଉଥିବା ନେଇ ଏକ ଖବର ୨୦୨୨ ମସିହାରେ ଖବର ପ୍ରସାରଣ କରାଯାଇ ଜିଲ୍ଲା ପ୍ରଶାସନଙ୍କ ଦୃଷ୍ଟି ଆକର୍ଷଣ କରାଯାଇଥିଲା | କାରଣ ଯେଉଁ ରାସ୍ତା ରହିଛି ପୂର୍ବରୁ ବୁଲିକି ଲୋକଙ୍କୁ ୫ କିଲୋମିଟର ଯିବାକୁ ପଡୁଥିଲା | ଏବେ ଯେଉଁ ରାସ୍ତା ନିର୍ମାଣ ହୋଇଛି ତାହା ଦୁଇ ଗାଁ ମଧ୍ୟରେ ଦୂରତା କହିଲେ ୩ କିଲୋମିଟର | ଲୋକଙ୍କ ସମସ୍ୟାକୁ ଗୁରୁତ୍ବ ଦେଇ ପ୍ରଶାସନ ତରଫରୁ ଆରଡି ରାସ୍ତା ନିର୍ମାଣ କରିବା ନିମନ୍ତେ ପ୍ରାୟ ୩୮ ଲକ୍ଷ ଟଙ୍କା ଅନୁଦାନ ମଞ୍ଜୁର ହୋଇଥିଲା | ରାସ୍ତାର ନିର୍ମାଣ କାର୍ଯ୍ୟ ବୈକୁଣ୍ଠ ନାଏକ ନାମକ ଠିକାଦାର କାର୍ଯ୍ୟାଦେଶ ପାଇ ନିର୍ମାଣ କାମ ଆରମ୍ଭ କରିଥିଲେ | ତେବେ ଉକ୍ତ ରାସ୍ତା ନିର୍ମାଣ କାର୍ଯ୍ୟ ଚଳିତ ବର୍ଷ ଜାନୁଆରୀ କିମ୍ବା ଫେବୃଆରୀ ମାସରେ ନିର୍ମାଣ କାର୍ଯ୍ୟ ସମାପ୍ତ ହୋଇଥିଲା | ତେବେ ଉକ୍ତ ରାସ୍ତା ନିର୍ମାଣର ବର୍ଷେ ବି ହୋଇନାହିଁ କିଛି ସ୍ଥାନରେ ଚିପ୍ସ ଓ ପିଚୁ ଉଠିଯାଇ ଥିବା ଦେଖିବାକୁ ମିଳିଛି | ରାସ୍ତା ନିର୍ମାଣ ସମୟରେ ସ୍ଥାନୀୟ ଲୋକେ ରାସ୍ତା ଉପରେ ଭଲଭାବେ ପିଚୁ ପକାଇବାକୁ କହିଥିବା ବେଳେ ଠିକାଦାର ଜଣକ ଲୋକଙ୍କ କଥାକୁ ଗୁରୁତ୍ୱ ନ ଦେଇ ନିଜ ଇଚ୍ଛା ମୁତାବକ ନିମ୍ନ ମାନର କାର୍ଯ୍ୟ କରିଥିବା ଲୋକେ ଅଭିଯୋଗ କରିଛନ୍ତି | ଉକ୍ତ ରାସ୍ତାର ପେହେଲା ଗାଁ ପାଖରେ ପ୍ରାୟ ୨୦ ଫୁଟ ଦୂରତା ପର୍ଯ୍ୟନ୍ତ ପିଚୁ ଓ ଚିପ୍ସ ଉଠି ଯାଇଥିବା ବେଳେ ରାସ୍ତା ଉପରେ ଗୋଡ ପକେଇଲେ ଚିପ୍ସ ସବୁ ବାହାରି ପଡୁଛି | ସେହିପରି ଉକ୍ତ ଗାଁ ଠାରୁ ଅଧା କିଲୋମିଟର ଦୂରତାରେ ମଧ୍ୟ ସମାନ ଅବସ୍ଥା | ଆଦିବାସୀ ଅଧ୍ୟୁଷିତ ଅଞ୍ଚଳର ପ୍ରତ୍ୟେକ କ୍ଷେତ୍ରର ବିକାଶ କରିବା ଦିଗରେ ଉଭୟ କେନ୍ଦ୍ର ଓ ରାଜ୍ୟ ସରକାର ଯୋଜନା ଉପରେ ଯୋଜନା କରି କୋଟି କୋଟି ଟଙ୍କା ବ୍ୟୟ ବରାଦ କରୁଛନ୍ତି | କିନ୍ତୁ ଏହି ରାସ୍ତା ନିର୍ମାଣ କାର୍ଯ୍ୟ ଦେଖିଲା ପରେ ଗୋଟିଏ କଥା ମନକୁ ଆସୁଛି କି, ସରକାରଙ୍କ ଯୋଜନା କିଭଳି ବାଟମାରଣ ହେଉଛି | ଏଭଳି ନିମ୍ନ ମାନର କାର୍ଯ୍ୟ କରି ଠିକାଦାର ମାଲାମାଲ ହୋଇ ଚାଲି ଯାଉଛନ୍ତି କିନ୍ତୁ ଉକ୍ତ ରାସ୍ତା ଉପରେ ନିର୍ଭର କରୁଥିବା ଲୋକେ ଅସୁବିଧା ଭୋଗ କରୁଛନ୍ତି ତାହା କିଏ ବୁଝିବ | ବୁଲାଣି ସ୍ଥାନରେ ଚିପ୍ସ ଉଠି ଯାଇଥିବା ହେତୁ ପ୍ରାୟ ସମୟରେ ବାଇକ୍ ଆରୋହୀ ମାନେ ବାଇକ୍ ଚକା ସ୍ଲିପ ହୋଇ କିଛି ଲୋକେ ପଡ଼ି ଖଣ୍ଡିଆଖାବରା ହୋଇଥିବା ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି | ରାସ୍ତା ନିର୍ମାଣ ପରେ ତାର ରକ୍ଷଣା ବେକ୍ଷଣ ଦାୟିତ୍ଵ ମଧ୍ୟ ଠିକାଦାରଙ୍କ ହୋଇଥିବା ବେଳେ ଠିକାଦାରଙ୍କ ଦେଖା ମିଳୁ ନ ଥିବା ଲୋକେ କହିଛନ୍ତି ଏବଂ ଏହି ରାସ୍ତାର ଭବିଷ୍ୟତ କଣ ହେବ ତାହା କାହାକୁ ଜଣାନାହିଁ | କେବଳ ଏହି ରାସ୍ତା ନୁହେଁ ମାଣ୍ଡିଆକୋଟା ଗାଁ ପାଖରେ ଥିବା ଘାଟି ରାସ୍ତାରେ ମଧ୍ୟ କିଛି ସ୍ଥାନରେ ରାସ୍ତା ଖରାପ ହୋଇଯାଇଛି | ତେଣୁ ଜିଲ୍ଲା ପ୍ରଶାସନ ତୁରନ୍ତ ଏ ଦିଗରେ ଦୃଷ୍ଟି ଦେଇ ରାସ୍ତାର ମରାମତି କରିବା ଦିଗରେ ପଦକ୍ଷେପ ଗ୍ରହଣ କରିବାକୁ ଉଭୟ ପେହେଲା ଓ ଲେପଣା ଗ୍ରାମବାସୀ ଦାବି କରିଛନ୍ତି |
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
