ଖଇରା ଉପ-ନିବନ୍ଧକ ଓ ତହସିଲ କାର୍ଯ୍ଯାଳୟରେ ଅଦ୍ଭୁତ ଘଟଣା, କବଲା ମିଥ୍ୟା ହେଲେ ଜମି ବିକ୍ରି ପାଇଁ ମସୁଧା
ଖଇରା,୧୪/୩/୨୫- ବାଲେଶ୍ବର ଜିଲ୍ଲା ଖଇରା ଉପ-ନିବନ୍ଧକ ଓ ତହସିଲ କାର୍ଯ୍ୟାଳୟରେ ଅଦ୍ଭୁତ ଘଟଣା ଦେଖିବାକୁ ମିଳିଛି । ଯାହା ରାଜସ୍ବ ବିଭାଗ ପ୍ରତି କଳଙ୍କ କହିଲେ ଅତ୍ୟୁକ୍ତି ହେବ ନାହିଁ । ଖଇରା ଉପ-ନିବନ୍ଧକ ଏବଂ ତହସିଲ କାର୍ଯ୍ୟାଳୟର ମୌଜା ଆଳଦା, ଥାନା ନମ୍ବର ୧୩୫ର ଏଭଳି ଏକ ଘଟଣାକୁ ନେଇ ପଦ୍ମଲୋଚନ ଦାସ ଅଭିଯୋଗ କରିଛନ୍ତି । ତାଙ୍କ ଅଭିଯୋଗରୁ ଜଣାଯାଏ ଯେ ହାଲ ବନ୍ଦୋବସ୍ତ(୧୯୬୮-୬୯)ରେ ମୌଜା ଆଳଦା, ଥାନା ନମ୍ବର ୧୩୫, ଖାତା ୬୫, ପ୍ଲଟ ୫୪ ଏ୦.୦୮ ଏବଂ ପ୍ଲଟ ୭୦ ଏ୦.୦୯ ଡିସିମିଲ ଜମି ଦୁର୍ଗା ଚରଣଦାସ ପିତା ଦୈତାରି ଦାସ ଓଗେରଙ୍କ ନାମରେ ଥିଲା । ଖାତା ଆସାମି ଏବଂ ତାଙ୍କ ଅଂଶୀଦାରଙ୍କ ଠାରୁ ତୋରାଣିପଦା ମୌଜାର ପ୍ରହଲ୍ଲାଦ ଚରଣ ବେହେରା, ଦଲିଲ ନମ୍ବର ୨୬୨୬ ତା ୧୯.୯.୧୯୭୫ ଏବଂ ପିତାମ୍ବର ପଟ୍ଟନାୟକ ଦଲିଲ ନମ୍ବର ୧୦୯୩ ତା ୨୬.୫.୧୯୭୫ରେ କ୍ରୟ କରିଥିବା ଦାବି କରନ୍ତି । କିନ୍ତୁ କ୍ରେତା ଦ୍ବୟ ପ୍ରକୃତ ୬୫ ଖାତା ପରିବର୍ତ୍ତେ ୭୫ ଖାତାରୁ ଜମି କ୍ରୟ କରିଛନ୍ତି, ଯେଉଁଥିରେ ୫୪ ଏବଂ ୭୦ ପ୍ଲଟ ନାହିଁ । ଯାହା ଉପ-ନିବନ୍ଧକ କାର୍ଯ୍ୟାଳୟ ରେକର୍ଡ ଅର୍ଥାତ ଇସି ପ୍ରମାଣ ଦିଏ । ଭୁଲ୍ ଖାତା ଓ ୨ଟି ପ୍ଲଟରୁ ଜମି କ୍ରୟ, ଗୋଟିଏ ପ୍ଲଟର କ୍ରୟ ପରିମାଣ ଓ ଦଖଲ କି ଆଶ୍ଚର୍ଯ୍ୟ ଘଟଣା ? କ’ଣ ଚାଲିଛି ଉପ-ନିବନ୍ଧକ କାର୍ଯ୍ଯାଳୟରେ ? ସତରେ କ’ଣ ଲୋକଙ୍କ ଭରସା ତୁଟିବ ?
ସେହିପରି ତହସିଲ କାର୍ଯ୍ଯାଳୟ ମଧ୍ୟ ଚର୍ଚ୍ଚାକୁ ଆସିଛି । ଦଲିଲରେ ୭୫ ଖାତା, କ୍ରେତା ଦ୍ବୟ ତହସିଲ କାର୍ଯ୍ୟାଳୟରେ ନାମୋଜାରି କେସ୍ ଫଏସଲା କରି ନିଜ ନାମରେ ହାସଲ କରିଥିବା ପଟ୍ଟାରେ ଉଲ୍ଲେଖ ହୋଇଛି ଖାରଜ ଖାତା ୬୫ ଓ ପ୍ଲଟ ୫୪ । କ୍ରୟ କଲେ ୫୪ ଓ ୭୦ ପ୍ଲଟରୁ କିନ୍ତୁ ତହସିଲ କାର୍ଯ୍ଯାଳୟ ନାମୋଜାରୀ କରି କ୍ରେତାଙ୍କୁ ପଟ୍ଟା ଦେଲା ୫୪ ପ୍ଲଟରୁ । ୭୦ ପ୍ଲଟରୁ କ୍ରୟ କରିଥିବା ଜମି ଗଲା କୁଆଡ଼େ ? ଭୁଲ ଦଲିଲ ନାମୋଜାରି ହେଲା କେମିତି ? କାହାର ଅଛି ହାତ ଓ କିଏ ଖାଇଲା ଟଙ୍କା ? ପ୍ରଜାଙ୍କ ରେକର୍ଡ ସୁରକ୍ଷିତ ରଖିବା ଏବଂ ଉଚିତ୍ ନ୍ୟାୟ ପ୍ରଦାନ କରିବା ରାଜସ୍ବ ଅଧିକାରୀଙ୍କ ଦାୟିତ୍ବ । ଖଇରା ଉପ-ନିବନ୍ଧକ ଏବଂ ତହସିଲରେ ଘଟିଛି ଏଭଳି ବିରଳ ଘଟଣା । ପୁଣି ଭୁଲ୍ ଦଲିଲରୁ ଅନ୍ୟକୁ ଜମି ବିକ୍ରୟ ଉଦ୍ୟମ । କୌଣସି ସୂତ୍ରରୁ ଖବର ପାଇ ଖାତା ଆସାମିଙ୍କ ଉତ୍ତରାଧିକାରୀ ପଦ୍ମଲୋଚନ ଦାସ ଉପ-ନିବନ୍ଧକ ଓ ତହସିଲଦାରଙ୍କ ନିକଟରେ ଅଭିଯୋଗ କରିଛନ୍ତି ଏବଂ ଗଣମାଧ୍ୟମ ସାମ୍ମାରେ ପ୍ରକାଶ କରିଛନ୍ତି । ବିଭାଗୀୟ କାର୍ଯ୍ୟାଳୟ ଉପଯୁକ୍ତ ତଦନ୍ତ କଲେ ସତ୍ୟ ପଦାକୁ ଆସିବ ବୋଲି ଅଭିଯୋଗକାରୀ ପ୍ରକାଶ କରିଛନ୍ତି ।।
ବାଲେଶ୍ବରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
