ପାଟଣାଗଡ ପାର୍ସଲ ବୋମା ବିସ୍ଫୋରଣ ମାମଲା । ଶେଷହେଲା ବିତର୍କ , ୨୮ ରେ ରାୟ ପ୍ରକାଶ ଦିନ ଧାର୍ଯ୍ୟ
ପାଟଣାଗଡ ବହୁ ଚର୍ଚ୍ଚିତ ପାଟଣାଗଡ ପାର୍ସଲ ବୋମା ବିସ୍ଫୋରଣ ମାମଲାର ଆଜି ଉଭୟ ପକ୍ଷର ଓକିଲ ଙ୍କ ମଧ୍ୟରେ ପାଟଣାଗଡ ଅତିରିକ୍ତ ଜିଲ୍ଲା ଦୌରାଜଜ୍ ଙ୍କ କୋର୍ଟରେ ବିତର୍କ (ଆର୍ଗୁମେଣ୍ଟ) ପ୍ରକିୟା ଶେଷ ହୋଇଯାଇଛି । ଆସନ୍ତା ୨୮ ରେ ଏହି ମାମଲାର ରାୟ ପ୍ରକାଶ ପାଇବ । ଅଭିଯୁକ୍ତ ପୁଞ୍ଜିଲାଲ ଙ୍କୁ କଣ ଦଣ୍ଡ ମିଲିବ, ଯଦି ମିଲିବ ତାହେଲେ କିପ୍ରକାର ଦଣ୍ଡ ମିଲିବ , ଏବେ ତା ଉପରେ ସମସ୍ତ ଙ୍କର ନଜର ରହିଛି । ମାମଲାର ମୁଖ୍ୟ ଅଭିଯୁକ୍ତ ପୁଞ୍ଜିଲାଳ ମେହେର ଙ୍କୁ ବଲାଙ୍ଗୀର ଜେଲରୁ ଆଜି ମଧ୍ୟ କଡା ସୁରକ୍ଷା ବଳୟ ଭିତରେ ପାଟଣାଗଡ଼ କୋର୍ଟକୁ ଅଣାଯାଇଥିଲା । କୋର୍ଟରେ ଉଭୟ ପକ୍ଷର ଓକିଲ ଶେଷ ପ୍ରକ୍ରିୟାର ବିତର୍କ କରିଥିଲେ । ଏହି ବିତର୍କକୁ ଶୁଣିବା ପାଇଁ ପଞ୍ଜିଲାଳ ଙ୍କ ପରିବାର ବର୍ଗ, ବନ୍ଧୁ ବାନ୍ଧବ ଉପସ୍ଥିତ ଥିଲେ । ପିଡିତା ପରିବାର ଙ୍କ ଓକିଲ ଚିତ୍ତରଞ୍ଜନ କାନୁନଗୋ ଙ୍କ କହିବା ଅନୁସାରେ ଅଭିଯୁକ୍ତ ଙ୍କ ବିରୁଦ୍ଧରେ ଯାହାସବୁ ତଥ୍ୟ ମିଲିଥିଲା ତାକୁ ଆମେ ସମ୍ପୁର୍ଣ୍ଣ ଭାବରେ ତଥ୍ୟ ଆଧାରରେ କୋର୍ଟରେ ପ୍ରମାଣ କରାଯାଇଅଛି । ଠିକ୍ ଭାବରେ ତଦନ୍ତ ପ୍ରକିୟା ହୋଇଛି । ଏପରିକି ଯାହାଆମେ ଉପସ୍ଥାପନ କରିଛୁ ନ୍ୟାୟ ପାଇବା ନିଶ୍ଚିତ ବୋଲି ଶ୍ରୀ କାନୁନଗୋ ଗଣମାଧ୍ୟମକୁ ସୁଚନା ଦେଇଛନ୍ତି । ଏହି ମାମଲାର ମୁଖ୍ୟ ଅଭିଯୁକ୍ତ ପୁଞ୍ଜିଲାଲ ଙ୍କ ଓକିଲ ପ୍ରମୋଦ ମିଶ୍ର ଙ୍କ କହିବା ଅନୁସାରେ ବିତର୍କ ପ୍ରକିୟା ସରିଯାଇଛି । ଖୁବଶୀଘ୍ର କୋର୍ଟ ନିଜର ଫଇସଲା ଶୁଣିଇବେ। ପୁଞ୍ଜିଲାଲକୁ ଏହି ମାମଲାରେ କ୍ରାଇମବ୍ରାଞ୍ଚ ଚାପଗ୍ରସ୍ତ ହୋଇ ଫସାଇଦେଇଛି । କ୍ରାଇମବ୍ରାଞ୍ଚ ଅନ୍ୟଦିଗ ଉପରେ ତଦନ୍ତ ନକରି ଆକ୍ରୋଷ ମୂଲକ ଭାବରେ ପୁଞ୍ଜିଲାଲକୁ କାଠଗଡାକୁ ଟାଣିବାସହ ନିଜ କାମ ସାରିଦେଇଛି । ପୁଞ୍ଜଲାଲ ଙ୍କ ବିରୁଦ୍ଧରେ ଯେତିକି ଅଭିଯୋଗ ଆସିଥିଲା ତାଠାରୁ ଅନ୍ୟ ମାନଙ୍କ ଉପରେ ଅଧିକ ଅଭିଯୋଗ ଥିଲା । କିନ୍ତୁ ପୁଲିସ ମଧ୍ୟ ଚାପଗ୍ରସ୍ତ ହୋଇ ସେମାନଙ୍କୁ ତଦନ୍ତ ପରିସରକୁ ଆଣି ମଧ୍ୟ ପରବର୍ତ୍ତି ସମୟରେ ଛାଡିଦେଇଥିଲା । ତେଣୁ ତଦନ୍ତ ଠିକ୍ ବାଟରେ ହୋଇନଥିବା ପୁଞ୍ଜିଲାଲ ଙ୍କ ଓକିଲ ଶ୍ରୀ ମିଶ୍ର କହିଥିଲେ । ସେପଟେ ମୃତ ସୌମ୍ୟଶେଖରଙ୍କ ବାପା ରବିନ୍ଦ୍ର ସାହୁ କ୍ରାଇମବ୍ରାଞ୍ଚ ଠିକ ଭାବରେ ଏହି ମାମଲାର ତଦନ୍ତ କରିଛି , ଆଗକୁ ଆମେ ନ୍ୟାୟ ପାଇବୁ ବୋଲି ଗଣମାଧ୍ୟମ ସମ୍ମୁଖରେ ତାଙ୍କର ପ୍ରତିକ୍ରିୟା ରଖିଥିଲେ । ସୁଚନା ଅନୁସାରେ ୨୦୧୮ ଫେବୃୟାରୀ ୨୩ ରେ ପାଟଣାଗଡ ପାର୍ସଲ ବୋମା ବିସ୍ଫୋରଣ ଘଟଣା ଘଟିଥିଲା । ବୃତ୍ତିଗତ ଶତ୍ରୁତାକୁ କେନ୍ଦ୍ରକରି ଅଧ୍ୟାପକ ପୁଞ୍ଜିଲାଳ ସେତେବେଳର କଲେଜ ଅଧ୍ୟକ୍ଷା ସଂଯୁକ୍ତ ସାହୁଙ୍କ ଘରକୁ ଏକ ପାର୍ସଲ ବୋମା ପଠାଇଥିଲେ । ରବିନ୍ଦ୍ର ଓ ସଂଯୁକ୍ତା ଙ୍କ ଏକମାତ୍ର ପୁଅ ସୌମ୍ୟ ଶେଖର ଙ୍କ ବାହାଘର ୨୦୧୮ ମସିହା ଫେବୃଆରି ୧୭ ତାରିଖରେ ହୋଇଥିଲା । ପୁଞ୍ଜିଲାଲ ବିବାହ ଉପହାର ଭାବେ କୋରିଅର ମାଧ୍ୟମରେ ଏହି ପାର୍ସଲ ଗିଫ୍ଟ ଦେଇଥିଲେ । ୨୩ ତାରିଖରେ ପାର୍ସଲ ଗିଫ୍ଟ ଖୋଲିବା ସମୟରେ ତାହା ବିସ୍ପୋରଣ ଘଟିଥିଲା । ଏଥିରେ ସୌମ୍ୟ ଶେଖର ଓ ତାଙ୍କ ଜେଜେମା ଜେନାମଣି ଙ୍କ ମୃତ୍ୟୁ ଘଟିଥିଲା । ନବବିବାହିତା ପତ୍ନି ରିମାରାଣି ସାହୁ ଗୁରୁତର ହୋଇ ଦୀର୍ଘଦିନର ଚିକିତ୍ସାପରେ ସୁସ୍ଥତା ଅନୁଭବ କରିଥିଲେ । ପ୍ରଥମେ ପାଟଣାଗଡ ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଥିଲା । ପରେ କ୍ରାଇମବ୍ରାଞ୍ଚ ଏଦିଗରେ ତଦନ୍ତ କରି ପୁଞ୍ଜିଲାଳ ମେହେର ଙ୍କୁ ମାମଲାର ମୁଖ୍ୟ ଏବଂ ଏକମାତ୍ର ଅଭିଯୁକ୍ତ ଭାବେ ଗିରଫ କରିଥିଲା । ସେହିଦିନଠାରୁ ପୁଞ୍ଜିଲାଲ ବଲାଙ୍ଗୀର ଜେଲରେ ବିଚାରଧୀନ ଭାବରେ ରହିଆସୁଛନ୍ତି ।
ଦୁର୍ଯୋଧନ ବର୍ଗେ ଙ୍କ ରିପୋର୍ଟ୍
